ජීවිත තර්ජනයක් ද? - ජනපති නගින වේදිකාව ෆොටෝ ගත් අයෙක් අත්අඩංගුවට!
Shehan
කොළඹ ගාලුමුවදොර පිටියේ ජාතික ජන බලවේගය විසින් සංවිධානය කළ මැයි දින උත්සවයේදී පීඨිකාව අනවසරයෙන් ජංගම දුරකතනයෙන් ඡායාරූප ගත් සැකකරුවෙකු මැයි 1 උදෑසන කොටුව පොලිසිය විසින් අත්අඩංගුවට ගෙන ඇත.
සැකකරුගේ ජංගම දුරකතනය සහ ඔහු පැමිණි යතුරුපැදිය ද පොලිසිය විසින් අත්අඩංගුවට ගෙන තිබේ.
ලෝක කම්කරු දිනය නිමිත්තෙන් පැවති මෙම රැලියට ජනාධිපති, අගමැති, මැති ඇමතිවරු ඇතුළු පාර්ලිමේන්තු මන්ත්‍රීවරුන් විශාල පිරිසක් සහභාගී වීමට නියමිතව තිබිණි.
සැකකරු යතුරුපැදියකින් පැමිණ, පීඨිකාව, උත්සව භූමිය සහ මාර්ගය ඡායාරූප ගනිමින් සිටියදී පොලිස් නිලධාරීන්ගේ අවධානයට ලක්ව ඇති අතර, ඔහු අත්අඩංගුවට ගෙන විමර්ශන සඳහා පොලිසියට භාර දී ඇත.
අත්අඩංගුවට ගත් පුද්ගලයා දෙමෝදර, උඩුවර, නේපියර් පහළ කොටසේ පදිංචි, වයස 28ක පින්තාරුකරුවෙකු බවත්, ඔහු තාවකාලිකව කිරුළපනේ පදිංචි බවත් මූලික විමර්ශනවලදී හෙළි වී ඇත.
කොටුව පොලිස් ස්ථානාධිපති, ප්‍රධාන පොලිස් පරීක්ෂක දිලීප සී. පෙරේරාගේ උපදෙස් මත, අපරාධ විමර්ශන අංශයේ පොලිස් පරීක්ෂක රෝහණ ද සිල්වා ඇතුළු නිලධාරීන් කණ්ඩායමක් විමර්ශන මෙහෙයවයි.
![ජාත්‍යන්තර කම්කරු දිනය අදයි[VIDEO]](https://cdn.ibcstack.com/article/643851d1-01af-4bfe-abfe-597fa15f06c8/25-6812d9fa6cfdb-sm.webp)
