සත්කාරක එංගලන්ත කාන්තාවන් අවසන් මහා තරගයට දොර විවර කරගනී

කාන්තා T20 ලෝක කුසලාන තරගාවලියේ දෙවැනි අවසන් පූර්ව තරගයේදී දකුණු අප්‍රිකානු කාන්තා කණ්ඩායම ලකුණු 40කින් පරාජය කළ එංගලන්ත කාන්තා කණ්ඩායම අවසන් මහා තරගයට සුදුසුකම් ලබා ගත්තේය.

ලන්ඩනයේ ඕවල් ක්‍රීඩාංගණයේ පැවති මෙම තරගයේදී පළමුව පන්දුවට පහරදුන් එංගලන්තය නියමිත පන්දුවාර 20 අවසානයේ කඩුලු 5ක් දැවී ලකුණු 169ක් රැස් කළේය.

ආබාධයකින් සුවය ලබා නැවත කණ්ඩායමට එක්වූ නායිකා නැට් ස්කයිවර්-බ්‍රන්ට් පන්දු 47කින් හතරේ පහර 11ක් සහ හයේ පහරක් සමඟ ලකුණු 75ක් රැස් කරමින් ඉනිමේ වැඩිම ලකුණු ලාභිනිය වූ අතර, හෙදර් නයිට් ලකුණු 58ක් රැස් කළාය. මෙම දෙදෙනා සිව්වැනි කඩුල්ල සඳහා ලකුණු 133ක සබඳතාවක්ද ගොඩනැගූහ.

ලකුණු 170ක ජයග්‍රාහී ඉලක්කයක් හඹා ගිය දකුණු අප්‍රිකානු කණ්ඩායමට නියමිත පන්දුවාර 20 අවසානයේ කඩුලු 8ක් දැවී රැස් කරගත හැකි වූයේ ලකුණු 129ක් පමණි.

ටස්මින් බ්‍රිට්ස් ලකුණු 51ක් රැස් කළ අතර, නායිකා ලෝරා වොල්වාර්ඩ්ට් ලකුණු 17ක් ලබා ගත්තාය. එංගලන්තය වෙනුවෙන් පන්දු යැවීමේදී චාලි ඩීන් කඩුලු 3ක් දවා ගත් අතර, ලෝරන් බෙල් කඩුලු 2ක් සහ ලින්සි ස්මිත් එක් කඩුල්ලක් දවා ගත්තාය.

"දරුවෙක් ලැබුණා කියලා ක්‍රීඩාව ඉවර වෙන්නේ නැහැ" - ක්‍රිකට් ලෝකය කැළඹූ ICCයේ අලුත්ම මාර්ගෝපදේශය

තරගයෙන් පසු නට් ස්කයිවර්-බ්‍රන්ට් පැවසුවේ: "මෙවැනි අවස්ථාවක පීඩනය වැඩියි. ආබාධය නිසා තරග කිහිපයක් මඟ හැරුණා.

තරගය ආරම්භ වීමට පෙර හැඟීම් ගොඩක් තිබුණත් උණුසුම් වීමේ අභ්‍යාසයෙන් පසු මගේ අවධානය සම්පූර්ණයෙන්ම තරගයට යොමු කළා." "මැරිසාන් කාප් සහ ශබ්නිම් ඉස්මයිල් ලෝක මට්ටමේ වේග පන්දු යවන්නියන්.

ඒ නිසා හෙදර් නයිට් සමඟ එක්ව ඔවුන්ගේ මුල් පීඩනය දරාගෙන අනෙක් පන්දු යවන්නන්ට එරෙහිව ලකුණු රැස් කිරීමේ සැලැස්ම සාර්ථකව ක්‍රියාත්මක කළා."

දකුණු අප්‍රිකානු නායිකා ලෝරා වොල්වාර්ට්ගේ අදහස: "අද අපිට වඩා හොඳින් ක්‍රීඩා කළේ එංගලන්තයයි.

ඔවුන්ගේ ඉනිමේ තිබූ ප්‍රධාන වෙනස වූයේ විශාල සබඳතා ගොඩනැගීමයි. අපේ පිතිකරුවන්ට එවැනි සාර්ථක සබඳතාවක් ගොඩනගා ගැනීමට නොහැකි වුණා." "ලකුණු 170ක් ආරක්ෂා කළ හැකි ඉලක්කයක් කියලා අපි හිතුවා.

නමුත් එංගලන්තය ඉතා හොඳ පන්දු යැවීමක් කළා. මේ වගේ විශාල තරගයක මෙලෙස පරාජය වීම කනගාටුදායකයි. කෙසේ වෙතත්, අපි නැවතත් සැලසුම් සකස් කර ශක්තිමත්ව නැවත පැමිණෙන්න බලාපොරොත්තු වෙනවා."         

මෙම ජයත් සමඟ එංගලන්තය ඉරිදා ලෝඩ්ස් ක්‍රීඩාංගණයේදී පැවැත්වෙන අවසන් මහා තරගයේදී හය වතාවක් T20 ලෝක ශූරයන් වූ ඔස්ට්‍රේලියාව සමඟ ශූරතාව සඳහා තරග වැදීමට නියමිතය. 2009 වසරේ පැවති පළමු කාන්තා T20 ලෝක කුසලානය ජයග්‍රහණය කිරීමෙන් පසු නැවත වරක් ශූරතාව දිනා ගැනීම එංගලන්තයේ අරමුණ වී තිබේ.

2011 ලෝක කුසලාන ඉන්දියානු කණ්ඩායමේ ශ්‍රීසාන්ත් කියපු සංවේදී කතාව