ඉන්දීය අග්‍රාමාත්‍ය නරේන්ද්‍ර මෝදිගේ පිළිගැනීමේ නිල උත්සවය (LIVE)
Shehan
මෙරටට පැමිණි ඉන්දීය අග්‍රාමාත්‍ය නරේන්ද්‍ර මෝදි මහතාගේ පිළිගැනීමේ නිල උත්සවය මේ වන විට කොළඹ නිදහස් චතුරශ්‍රය පරිශ්‍රයේදී පැවැත්වෙමින් පවතිනවා.
ජනාධිපති අනුර කුමාර දිසානායක මහතාගේ ආරාධනයකට අනුව, තම දෙදින ශ්‍රී ලංකා රාජ්‍ය සංචාරය ආරම්භ කරමින්, ඉන්දීය අග්‍රාමාත්‍ය නරේන්ද්‍ර මෝදි ඊයේ (04) රාත්‍රී 8:30ට පමණ ඉන්දියානු ගුවන් සේවයේ යානයකින් කටුනායක බණ්ඩාරනායක ජාත්‍යන්තර ගුවන්තොටුපොළට පැමිණියා.
දෙරට අතර “සියවස් ගණනක මිත්‍රත්වයෙන් සෞභාග්‍යමත් අනාගතයකට බැඳීම” යන සංකල්පය තහවුරු කරමින් ඉන්දීය අග්‍රාමාත්‍යවරයා මෙම සංචාරයේ නිරත වනවා.
අග්‍රාමාත්‍යවරයා සමඟ ඉන්දීය විදේශ අමාත්‍ය ආචාර්ය එස්. ජයිශංකර් මහතා ඇතුළු දූත පිරිසක් ද දිවයිනට පැමිණ සිටිනවා.
මෙම උත්සවයෙන් අනතුරුව, ඉන්දීය අග්‍රාමාත්‍යවරයා ජනාධිපති ලේකම් කාර්යාලයේදී ජනාධිපති අනුර කුමාර දිසානායක මහතා සමඟ ද්විපාර්ශ්වික සාකච්ඡාවලට එක්වීමට නියමිතයි.
ඉන් පසුව, ආරක්ෂක, බලශක්ති, ඩිජිටල්කරණය සහ සෞඛ්‍ය යන ක්ෂේත්‍රවලට අදාළ අවබෝධතා ගිවිසුම් කිහිපයකට අත්සන් තැබීමට ද සැලසුම් කර තිබෙන බව වාර්තා වෙනවා.
එහිදී, ශ්‍රී ලංකාවේ ඉන්දීය ණය ප්‍රතිව්‍යුගතකරණයට අදාළ ගිවිසුම් හුවමාරු කිරීමත් සිදුවීමට නියමිතයි. ඉන්දියාවේ සහයෝගයෙන් ඉදිවන සාම්පූර් සූර්ය විදුලි බලාගාර ව්‍යාපෘතියේ පළමු අදියර ආරම්භ කිරීම, අග්‍රාමාත්‍ය නරේන්ද්‍ර මෝදි මහතාගේ සම්බන්ධීකරණයෙන් මාර්ගගත ක්‍රමය ඔස්සේ සිදු කෙරෙනු ඇති.
එසේම, මෙරට ආගමික ස්ථාන 5000ක වහලවල සවිකර ඇති සූර්ය පැනල ව්‍යාපෘතිය විවෘත කිරීම ද එහිදී සිදුවනවා. උෂ්ණත්වය සහ ආර්ද්‍රතාවය පාලනය කළ හැකි ලෙස දඹුල්ලේ ඉදිකළ ශීතාගාර සහිත කෘෂි ගබඩා සංකීර්ණයත් මෝදි මහතා අතින් විවෘත කිරීමට නියමිතයි.
එහි ධාරිතාව මෙට්‍රික් ටොන් 5,000ක්. දෙදින ශ්‍රී ලංකා රාජ්‍ය සංචාරය අවසන් කරමින්, ඉන්දීය අග්‍රාමාත්‍යවරයා අප්‍රේල් 06 වන දින පස්වරුවේ දිවයිනෙන් පිටත්ව යාමට සැලසුම් කර තිබෙනවා.
