අනුර ප්‍රියදර්ශන යාපාට එරෙහි නඩුවක් කල්යයි

ලංකා ඛනිජ තෙල් නීතිගත සංස්ථාවට (CPC) අයත් රුපියල් මිලියන 6.1කට (ලක්ෂ 61) අධික මුදලක් සාවද්‍ය ලෙස පරිහරණය කළ බවට චෝදනා ලැබ සිටින හිටපු අමාත්‍ය අනුර ප්‍රියදර්ශන යාපා මහතා ඇතුළු විත්තිකරුවන් හත්දෙනෙකුට එරෙහි නඩුව ලබන ජූනි මස 19 වනදා නැවත කැඳවීමට කොළඹ මහාධිකරණය අද (2026 මැයි 13) නියෝග කළේය.

මෙම නඩුව අද දින කොළඹ මහාධිකරණ විනිසුරු උදේශ් රණතුංග මහතා ඉදිරියේ කැඳවූ අවස්ථාවේදී, විත්තිකාර හිටපු අමාත්‍යවරයා සහ ඔහුගේ බිරිඳ ඇතුළු විත්තිකරුවන් පිරිස අධිකරණය හමුවේ පෙනී සිටියහ.

ලංකාවේ තෙල් මිල හා විදුලි බිල ඉහළට? ජනපති අනුරගෙන් ප්‍රකාශයක් නිකුත් වේ

ඉදිරිපත් වූ කරුණු සලකා බැලූ විනිසුරුවරයා නඩු විභාගය ජූනි මාසය දක්වා කල් තැබීමට තීරණය කළේය.

නීතිපතිවරයා විසින් ගොනු කර ඇති අධිචෝදනා පත්‍රයට අනුව, 2014 දෙසැම්බර් 26 සහ 2015 ජනවාරි 26 අතර කාලසීමාව තුළ (එනම් 2015 ජනාධිපතිවරණ සමයේදී), ගංවතුර ආධාර සපයන බව පවසමින් ලංකා ඛනිජ තෙල් නීතිගත සංස්ථාවේ අරමුදල් රුපියල් 6,146,110ක් අනීතික ලෙස වැය කරමින් මෙම මූල්‍ය වංචාව සිදුකර ඇති බවට චෝදනා එල්ල වී ඇත.

රජයේ මුදල් මැතිවරණ ප්‍රචාරක කටයුතු හෝ වෙනත් පෞද්ගලික අවශ්‍යතා සඳහා මෙලෙස අවභාවිත කිරීම සම්බන්ධයෙන් පවරා ඇති මෙම නඩුව මෙරට දේශපාලන ක්ෂේත්‍රයේ දැඩි අවධානයට ලක් වූවකි.

පවතින කාලගුණික තත්ත්වය මත ප්‍රධාන ජලාශ 16ක් තවදුරටත් වාන් දමයි