වසර 3කට පෙර පාතාලයේ පින්තු ඝාතනයට පළිගැනීමක් (UPDATE)
Akash
කටුනායක - සීදුව 18 කණුව ප්‍රදේශයේදී ජුකී මැෂින් අමතර කොටස් අලෙවිසලක හිමිකරුවකු බව කියන ඉඳිකටු ජූඩ් නමැත්තා පාතාල කුලී ඝාතකයන් විසින් ඊයේ (08 දා) පෙරවරුවේ වෙඩි තබා ඝාතනය කර ඇත්තේ ඩුබායි රාජ්‍යයේ සැඟවී සිටින මත්ද්‍රව්‍ය ජාවාරම්කරුවකු බව කියන ගිහාන් ෆොන්සේකා නමැත්තාගේ නියෝග මත බවට පොලිසිය සැක පහළ කරයි.
මීට වසර 3කට පෙර පොලිස් විශේෂ කාර්ය බළකායේ නිලධාරීන් එල්ල කළ ප්‍රහාරයකින් පාතාල නායකයකු බව කියන ලලිත් පින්තු නමැත්තා මරුමුවට පත් වූ අතර ඒ සඳහා ඔත්තු ලබාදුන්නේ ඉඳිකටු ජූඩ් නමැත්තා බවට සැකකර ඔහු මෙසේ ඝාතනය කරන්නට ඇති බව පොලිසිය පවසයි.
ඉඳිකටු ජූඩ් නමැත්තා සීදුව 18 කණුව ප්රදේශයේ සිය අලෙවිසල තුළ සිටයදී යතුරුපැදියකින් පැමිණි කුලී ඝාතකයන් පිස්තෝල අවියකින් ඔහුට වෙඩි තබා පලාගොස් තිබේ.
ප්‍රහාරයෙන් බරපතළ තුවාල ලැබූ ජූඩ් නමැත්තා මීගමුව රෝහලට ඇතුළත් කිරීමෙන් පසු මියගොස් ඇත. ප්‍රසන්න ජූඩ් ප්‍රනාන්දු නොහොත් ඉඳිකටු ජූඩ් නැමැත්තා ජුකී මැෂින් අමතර කොටස් අලෙවිසලක් පවත්වාගෙන යන පුද්ගලයෙකි.
මොහු මීට වසර 3කට පෙර කොළඹ බේස්ලයින් මාර්ගයේදී පොලිස් විශේෂ කාර්ය බළකාය අතින් වෙඩි ප්‍රහාරයට ලක්ව මියගිය ලලිත් පින්තු නමැති පාතාල ප්‍රබලයාගේ හිතවතෙකි.
පොලිස් විශේෂ කාර්ය බළකාය ලලිත් පින්තු නමැත්තාට වෙඩි තබන අවස්ථාවේ ජූඩ් නමැත්තා ද මොහු සමග එහි සිට ඇත. විශේෂ කාර්ය බළකායේ නිලධාරීන්ට ප්‍රහාරයක් එල්ල කිරීමට සූදානම් වෙද්දී එම නිලධාරීන් සිදුකළ ප්‍රහාරයෙන් ලලිත් පින්තු ඝාතනයට ලක්විය.
ලලිත් පින්තු නමැත්තා පාතාල නායක මාකඳුරේ මධුෂ්ගේ කල්ලියේ ප්‍රබල සාමාජිකයෙකි. ගිහාන් ෆොන්සේකා නමැති පාතාල නායකයාගේ නියෝග මත එම ඝාතනය කරන්නට ඇති බවට තොරතුරු ලැබී ඇතැයි පොලිසිය පවසයි.
ගිහාන් ෆොන්සේකා ද මාකඳුරේ මධුෂ් සමග එකට මත්ද්‍රව්‍ය ජාවාරම් කළ පුද්ගලයෙකි. සීදුව පොලිසිය මේ සම්බන්ධයෙන් විමර්ශන පවත්වාගෙන යයි.
-------------------------------
පාතාල කල්ලි අතර ගැටුමක්... මරාගනිති.. (12.00 PM - 2025.04.09)
කටුනායක 18 කණුව ප්රදේශයේ වෙඩි තැබීමක් සිදුව ඇත. තුවාල ලැබූ පුද්ගලයකු මීගමු රෝහලට ඇතුළත් කිරීමෙන් පසු මිය ගොස් ඇත.
ප්රදේශයේ හෝටලයක් අසල මෙම වෙඩි තැබීම සිදුව ඇති අතර කල්ලි දෙකක් අතර ආරවුලක් මත මෙය සිදු කරන්නට ඇතැයි පොලිසිය සැක කරයි.
පොලිස් පරීක්‍ෂණ ක‍්‍රියාත්මකයි.
-------------------------------
කටුනායක වෙඩි තැබීමක් (12.10)
කටුනායක 18 කිලෝමීටර් කණුව අසල වෙඩි තැබීමක් සිදුව තිබෙනවා.
එම වෙඩි තැබීමෙන් පුද්ගලයෙකු තුවාල ලබා ඇති බවටයි වාර්තා වෙන්නේ.
තුවාල ලැබූ පුද්ගලයා මීගමුව රෝහලය ඇතුළත් කර ඇති බවයි පොලිසිය පවසන්නේ.
![දේශබන්දුගේ නොදුටු පැත්ත සහ පාස්කු ප්‍රහාරයට සම්බන්ධ වුන හැටි මෙන්න [VIDEO]](https://cdn.ibcstack.com/article/8188a173-26d0-4cf2-b00e-4088ab61ae29/25-67f38dc094dcf-sm.webp)
