මාලිමාව Youtube, Tiktok වලින් ගහපු ගේම - රජය ඩොලර් බිලියන 7.3ක ණයක් ගන්න සොයයි..
Shehan
සමගි ජන බලවේගයේ පාර්ලිමේන්තු මන්ත්‍රී එස්. එම්. මරික්කාර් මහතා පවසන්නේ වත්මන් රජය මෙම වසර සඳහා පමණක් ඩොලර් බිලියන 7.3ක ණය මුදලක් ලබා ගැනීමට සැලසුම් කර ඇති බවයි.
කොළඹ පැවති මාධ්‍ය හමුවකදී ඔහු මේ බව සඳහන් කළේය.
ජාතික ජන බලවේගයට අමතක වී ඇති බවක් පෙනෙන්නේ, අනුර කුමාර දිසානායක මහතා ජනාධිපති ධූරයට පත් වී පසුගිය සැප්තැම්බර් 21 වැනිදා සිට මාස හයක් ගත වී ඇති බවයි. ජනාධිපති ධූර කාලය මාස 60ක් වන බැවින්, එයින් 10%ක් දැනටමත් අවසන් ය. එහිදී ඔවුන් ජනතාවට, විශේෂයෙන් මේ රටේ කාන්තාවන්ට, අධ්‍යාපනය, සෞඛ්‍යය සහ ආහාර පාන සඳහා බදු සම්පූර්ණයෙන් ඉවත් කරන බවට පොරොන්දු විය. YouTube සහ TikTok හරහා මේවා ඇසූ ජනතාව විශ්වාස කළේ, අවුරුදු 76ක කාලයක් පුරා සිදු වූ වංචා නිසා මෙම බර වැඩි වූ බවත්, අනුර කුමාර දිසානායක මහතා සහ ජාතික ජන බලවේගය පළමු අයවැයෙන් බදු බිංදුවට අඩු කර ජනතාවට සහන ලබා දෙන බවත්ය. රෝගී වූ විටත් බදු, දරුවන්ට ඉගෙනීමටත් බදු, ආහාර සඳහාත් බදු ගෙවිය යුතු බව ඔවුන් පැවසූ අතර, මේ සියල්ල සම්පූර්ණයෙන් ඉවත් කරන බවට පොරොන්දු විය.
ඊළඟට, විදුලි බිල රුපියල් 6,000 සිට 4,000ට අඩු කරන බවත්, විදුලිබල මණ්ඩලයේ ණය මහා භාණ්ඩාගාරයට ඇතුළත් කර ඇති නිසා ඉන්ධන ලීටරයකට රුපියල් 50ක බද්ද වහාම ඉවත් කරන බවත් ඔවුන් කීවේය. මේ නිසා කාන්තාවන් බලාපොරොත්තු වූයේ, ස්වාමිපුරුෂයා උපයන මුදලෙන් ආහාර පාන සඳහා වැය වන ප්‍රමාණය ඉතිරි වන බවයි. එසේම, දරුවන්ගේ ටියුෂන් ගාස්තු, පොත්පත්, ලිවීමේ උපකරණ, ඖෂධ, ඉන්ධන, විදුලි බිල්, බස් සහ ත්‍රීවීල් ගාස්තු අඩු වී, ජීවිතයට විශාල සහනයක් ලැබෙනු ඇතැයි ඔවුන් විශ්වාස කළහ. මේ විශ්වාසයෙන් යුතුව මේ රටේ කාන්තාවෝ එකමුට්ට වී ජාතික ජන බලවේගයට සහය දුන්නෝය. නමුත්, මාස හයක් ගත වී ඇතත්, මේ එක පොරොන්දුවක්වත් ඉටු කර ගැනීමට නොහැකි වී, ආණ්ඩුව දැන් කෙඳිරිගාමින් සිටී. ණය ගෙන රටක් පාලනය කරන්නේ ඇයිදැයි ප්‍රශ්න කළ අය, දැන් මේ වසරේ අයවැය හිඟය පියවීමට ඩොලර් බිලියන 7.3ක ණයක් ගැනීමට සූදානම් වෙති. බලාපොරොත්තු වූ ආදායම නොලැබුණහොත් මෙම ණය තවත් වැඩි වනු ඇත.
පසුගිය අවුරුදු 76 තුළ ඩොලර් බිලියන 95ක් ණය ගෙන ඇති අතර, අනුර කුමාර ජනාධිපතිතුමාගේ ආණ්ඩුව එක් වසරකට පමණක් ඩොලර් බිලියන 7.3කට වඩා වැඩි මුදලක් ණයට ගැනීමට සැලසුම් කරයි. එවිට අපි ප්‍රශ්න කරන්නේ, මේ අයට ප්‍රාදේශීය සභා ඕනෑ වන්නේ VAT බද්ද අඩු කිරීමටද? ප්‍රාදේශීය සභාවකට විදුලි බිල් හෝ ඉන්ධන මිල අඩු කළ හැකිද? දැන් ජනතාවට වැටහී ඇත්තේ, තමන් රැවටුණාද, නැතිනම් රැවටීමකට ලක් කෙරුණාද යන්නයි. අපි ජනතාවගෙන් ඉල්ලා සිටින්නේ, ප්‍රාදේශීය සභා මැතිවරණයෙන් පසු මේ ආණ්ඩුව පෙරළෙන්නේ නැති බව සත්‍යයකි. එබැවින්, ඔබව රැවටූ, බොරු පොරොන්දු දුන් ආණ්ඩුවට පාඩමක් උගන්වා, ජනමතයේ බලය පෙන්වා, ඔබට දුන් පොරොන්දු ඉතිරි වසර තුන තුළ ඉටු කර ගැනීමට නම්, ආණ්ඩුවට විරුද්ධව ඡන්දය දිය යුතුය. එසේ නොකර ආණ්ඩුවටම ඡන්දය දුන්නොත්, ආණ්ඩුව සිතන්නේ, තමන් කියන ඕනෑම බොරුවක් ජනතාව පිළිගන්නා බවයි.
ඔවුන්ට ඕනෑ ලෙස රැවටීමට, බොරු කීමට, උඩඟුකමින් සිටීමට ඉඩ තිබේ. ඔබේ ජනමතයේ බලය පෙන්විය යුත්තේ විපක්ෂයට ඡන්දය භාවිත කරමිනි. ප්‍රධාන විපක්ෂය වන සමගි ජන බලවේගයට ඡන්දය දීමෙන් පමණක් ආණ්ඩුවට එහි බලපෑම දැනෙනු ඇත. ගමට වගකියන, බොරු නොකියන කණ්ඩායමක් අවශ්‍යය. ගමේ ජීවත් වන, ගම ගැන හොඳින් දන්නා, ඔබේ ගැටලුවලට විසඳුම් ලබා ගත හැකි පුද්ගලයන් ප්‍රාදේශීය සභාවලට පත් කර ගත යුතුය.
මාලිමාවේ ප්‍රතිපත්ති ප්‍රකාශනයේ සඳහන් වූයේ, පුනර්ජනනීය විදුලිබලය පුළුල් කර, පුනර්ජනනීය බලශක්ති විප්ලවයක් ඇති කරන බවයි. නමුත් දැන් කැබිනට් පත්‍රිකාවක් ඉදිරිපත් කර, රුපියල් 27ක සූර්ය බලශක්ති ගාස්තුව රුපියල් 19.61ට අඩු කිරීමට සැලසුම් කරයි. 20-100 kW අතර ඒකක රුපියල් 17.46ටත්, 100-500 kW අතර ඒකක රුපියල් 15.79ටත් අඩු කිරීමට යෝජනා වේ.
මෙය විදුලිබල මාෆියාවට සහ ඉංජිනේරු මාෆියාවට යටත් වීමකි. මෙය බලවතුන්ගේ උවමනාවට නටන ආණ්ඩුවක්ද?
ආණ්ඩුවේ වම් අතට දකුණු අත කරන දේ නොපෙනෙයි. දකුණු අත කරන දේ කකුල් දෙකට නොතේරෙයි. එකිනෙකට විරුද්ධ, සම්පූර්ණයෙන් අවුල් සහගත වැඩපිළිවෙළකි.
එක් ඇමතිවරයෙක් පවසන්නේ, ගුවන් අනතුරක් සිදු වූයේ එල්බෝ ආරක්ෂකයක් නොපැළඳීම නිසා නොව, පුහුණු නියමුවෙකුගේ වැරදි නිසා බවයි. නමුත් ගුවන් හමුදා මාධ්‍ය ප්‍රකාශක කියන්නේ, තවමත් පරීක්ෂණ වාර්තා ලැබී නැති බවයි.
දැන් එක්සත් රාජධානිය විසින් ශවින්ද්‍ර සිල්වා මහතා ඇතුළු හමුදාපතිවරුන් තිදෙනෙකුට සම්බාධක පනවා ඇත. අපි විනය ගැන කතා කරන්නේ නැත.
සාමාන්‍යයෙන් මෙවැනි දෙයක් සිදු කරන විට විදේශ කටයුතු අමාත්‍යාංශය දැනුවත් කරනු ලැබේ. නමුත් පැය 48ක් ගත වී ඇතත්, ආණ්ඩුව තම ස්ථාවරය ප්‍රකාශ කර නැත. මෙම හමුදාපතිවරු රාජ්‍යය වෙනුවෙන් යුද්ධ කළ අයයි. එසේ රාජ්‍යය වෙනුවෙන් කළ යුද්ධයක් නිසා ඔවුන්ට මෙම තහනම් පැනවී ඇත්නම්, රාජ්‍යයේ මතය කුමක්දැයි පැහැදිලි කළ යුතුය.
ඔවුන්ට මෙවැනි තහනමක් පැනවීමට හේතුව කුමක්දැයි රාජ්‍යයට විමසීමට අයිතියක් ඇත. දැන් ප්‍රාදේශීය සභා ඡන්දය නිසා උතුරු සහ නැගෙනහිර ඡන්ද ලබා ගැනීමට කට වසා සිටින බව පෙනේ. මේ රටේ දෙමළ ජනතාවට අසාධාරණයක් සිදු විය යුතු නැත. අපි සිංහල, දෙමළ, මුස්ලිම් සියලු ජනතාව එක කණ්ඩායමක් ලෙස සලකන අතර, දෙමළ ජනතාවට ඇති වී ඇති ගැටලු සම්බන්ධයෙන් සාධාරණ පරීක්ෂණයක් අවශ්‍යය.
එය වෙනම කතාවකි. නමුත් රාජ්‍යය වෙනුවෙන් යුද්ධ කළ හමුදාපතිවරුන්ට තහනම් පැනවෙනවා නම්, ඒ සම්බන්ධයෙන් රජයට වගකීමක් ඇත. විදේශ ඇමතිවරයා මේ ගැන දැනුවත් නැද්ද? මෙතරම් ප්‍රමාද වීමට හේතුව කුමක්ද? 88/89 කාලයේ වෛරයන් මතක තබා ගැනීමට කමක් නැතත්, රාජ්‍යය සමඟ සෙල්ලම් නොකරන ලෙස අපි පවසමු.
