චෙන්නායි හැර ගිය කෙනිෂා සහ සබරිමාල වන්දනාවට ගිය රවිමෝහන් - දෙමළ සිනමාව කැළඹූ ආදර කතාවේ අලුත්ම පෙරළිය

ප්‍රමුඛ දෙමළ නළු රවිමෝහන් සිය බිරිඳ ආර්තී සමඟ ඇති වූ පවුල් මතභේද හේතුවෙන් වෙන්ව ජීවත් වන අතර, ඔවුන්ගේ දික්කසාද නඩුව මේ වන විට අධිකරණයේ විභාග වෙමින් පවතී.

මෙම සිද්ධිය අතරතුර පසුබිම් ගායිකා කෙනිෂා, රවිමෝහන්ගේ ජීවිතයේ වැදගත් චරිතයක් බවට පත්ව ඇති බවට සමාජ මාධ්‍ය තුළ දැඩි කතාබහක් ඇති වී තිබේ.

රවිමෝහන් සහ ආර්තී අතර ගැටලු උත්සන්න වීමට කෙනිෂා හේතුවක් බවට සමාජ මාධ්‍යවල චෝදනා එල්ල වූ අතර, ඒ සම්බන්ධයෙන් විවේචනවලට කෙනිෂා ද වරින් වර ප්‍රතිචාර දක්වා තිබිණි.

පසුව, ආර්තීගේ පවුලේ අය අධිකරණයට ගොස්, කෙනිෂා විසින් ආර්තීට අපහාස කර ඇති බවට චෝදනා කර තිබේ. එම නඩුව විභාග කිරීමෙන් අනතුරුව, ආර්තී සම්බන්ධයෙන් සමාජ මාධ්‍යවල අදහස් පළ කිරීමෙන් වැළකී සිටින ලෙස අධිකරණය කෙනිෂාට අතුරු තහනම් නියෝගයක් නිකුත් කර ඇත.

මේ අතර, කෙනිෂා පසුගිය 14 වැනිදා රාත්‍රියේ සිය සමාජ මාධ්‍ය ගිණුම හරහා රවිමෝහන් සහ චෙන්නායි නගරයෙන් ඉවත් වන බව ප්‍රකාශ කිරීමත් සමඟ තවත් ආන්දෝලනයක් මතුවිය.

ඉන් අනතුරුව, 16 වැනිදා රවිමෝහන් චෙන්නායිහි සිය චිත්‍රාගාරයේදී මාධ්‍ය හමුවක් පවත්වමින්, “පසුගිය වසර දෙක පුරාම මම නිහඬව සිටියා. තවත් එසේ සිටිය නොහැකියි” යනුවෙන් ප්‍රකාශ කළේය.

තමන්ට විශාල සාක්ෂි ප්‍රමාණයක් ඇති බවත්, ඒවා ඉදිරියේදී හෙළි කරන බවත් ඔහු පැවසීය. එමෙන්ම තම දරුවන් පවා දැකීමට අවස්ථාව ලබා නොදෙන බවට ආර්තීගේ පවුලට චෝදනා එල්ල කළේය.

මේ අතර, රවිමෝහන් මේ වන විට අධ්‍යාත්මික ගමනක නිරතව සිටින බවද වාර්තා වේ. ඔහු සබරිමාලා කෝවිල වෙත ගොස් අයියප්ප දෙවියන්ට මල්මාලාවක් පැළඳ උපවාසයක් ආරම්භ කර ඇති බව සඳහන් වේ.

මෙම තත්ත්වය හේතුවෙන්, රංගනයෙන් තාවකාලිකව ඉවත් වී අධ්‍යාත්මික ජීවිතයකට යොමු වී ඇති බවට සමාජ මාධ්‍ය භාවිතා කරන්නන් අතර විවිධ අදහස් පළවෙමින් පවතී.