ජාත්‍යන්තරයෙන් ලංකාවට ඉහළ ප්‍රශංසාවක්

ජාත්‍යන්තර මූල්‍ය අරමුදලේ කළමනාකාර අධ්‍යක්ෂ ක්‍රිස්ටලිනා ජෝර්ජිවා මහත්මිය ශ්‍රී ලංකා මහ බැංකුවට පැමිණ මහ බැංකු අධිපති ආචාර්ය නන්දලාල් වීරසිංහ මහතා සහ ජ්‍යෙෂ්ඨ නිලධාරීන් හමුවී ඇත.

මෙම හමුව ඊයේ  (පෙබරවාරි 17)  මහ බැංකු මූලස්ථානයේදී පැවැත්වුණු අතර, ශ්‍රී ලංකාවේ ජාත්‍යන්තර මූල්‍ය අරමුදලේ සාමාජිකත්වයේ 75 වැනි සංවත්සරය සහ මහ බැංකුවේ 75 වැනි සංවත්සරය සමරනු ලබන කාලයට සමගාමීව සිදු විය.

හමුවේදී ආචාර්ය නන්දලාල් වීරසිංහ මහතා වත්මන් විස්තීර්ණ අරමුදල් පහසුකම යටතේ ලබා දුන් ස්ථිර සහයෝගය සහ ණය ප්‍රතිව්‍යුහගත කිරීමේ ක්‍රියාවලිය සම්පූර්ණ කිරීමට ලබා දුන් සක්‍රීය සහයෝගය සඳහා ක්‍රිස්ටලිනා ජෝර්ජිවා මහත්මියට සහ ජාත්‍යන්තර මූල්‍ය අරමුදලේ කණ්ඩායමට සිය කෘතඥතාව පළ කළේය.

තවද, මුදල් ප්‍රතිපත්තිය, මැක්‍රෝප්‍රුඩන්ෂල් විශ්ලේෂණය, මූල්‍ය අංශ ප්‍රතිපත්ති ආදී ක්ෂේත්‍රවල ජාත්‍යන්තර මූල්‍ය අරමුදල විසින් ලබා දුන් විස්තරාත්මක තාක්ෂණික සහාය සඳහාද ඔහු ස්තූති කළේය.

ක්‍රිස්ටලිනා ජෝර්ජිවා මහත්මිය මෙහිදී ප්‍රකාශ කළේ, වත්මන් ජාත්‍යන්තර මූල්‍ය අරමුදලේ වැඩසටහන යටතේ ශ්‍රී ලංකාවේ කාර්ය සාධනය සාර්ථක කතාවක් බවත්, ආර්ථික අර්බුදයෙන් පසු සාර්ව ආර්ථික ස්ථාවරත්වය යථා තත්ත්වයට පත් කිරීමේදී මහ බැංකුව දැක්වූ කාර්යභාරය ප්‍රශංසනීය බවත්ය.

ඇය වැඩිදුරටත් සඳහන් කළේ, අවශ්‍ය ව්‍යුහාත්මක ප්‍රතිසංස්කරණ ආරම්භ කර ආර්ථිකය තිරසාරව පවත්වාගෙන යාම හරහා ශ්‍රී ලංකාවට ඉහළ ආර්ථික වර්ධනයක් ලබා ගැනීමේ හැකියාව පවතින බවයි.

මෙම හමුව ක්‍රිස්ටලිනා ජෝර්ජිවා මහත්මියගේ ශ්‍රී ලංකා සංචාරයේ කොටසක් වන අතර, එහිදී ඇය ජනාධිපති අනුර කුමාර දිසානායක මහතා, අග්‍රාමාත්‍ය ආචාර්ය හරිනි අමරසූරිය මහත්මිය ඇතුළු රජයේ ඉහළ නිලධාරීන් හමුවී ඇති අතර, දිට්වා සුළි කුණාටුවෙන් බලපෑමට ලක්වූ ප්‍රදේශ නිරීක්ෂණය කිරීමද සිදු කළාය.

ආයේ YouTube නැද්ද? - හදිසියේම ලොව පුරා YouTube බිඳ වැටෙයි