AI සහ ව්‍යාජ පුවත් රැල්ලට එරෙහිව ශ්‍රී ලංකාව සහ ඉන්දියාව එකම වේදිකාවක

ශ්‍රී ලංකාව සහ ඉන්දියාව අතර මාධ්‍ය ක්ෂේත්‍රයේ සහයෝගීතාව, වෘත්තීය සබඳතා සහ දැනුම් හුවමාරුව ශක්තිමත් කිරීමේ අරමුණින් ශ්‍රී ලංකා–ඉන්දියානු මාධ්‍ය මිත්‍රත්ව සංගමය (SLIMFA) සංවිධානය කළ SLIMFA මාධ්‍ය සම්මන්ත්‍රණය 2026 පසුගියදා කොළඹ ටාජ් සමුද්‍රා හෝටලයේදී පැවැත්විණි.

"වෙනස්වන ලෝකයක අදාළත්වය රැක ගැනීම" යන තේමාව යටතේ පැවති මෙම සම්මන්ත්‍රණයේදී ශ්‍රී ලංකා හා ඉන්දියානු මාධ්‍ය වෘත්තිකයන් අතර සහයෝගීතාව වර්ධනය කිරීම, අත්දැකීම් හුවමාරු කිරීම සහ වේගයෙන් වෙනස් වන මාධ්‍ය පරිසරයට ගැළපෙන නව දැනුම ගොඩනැගීම පිළිබඳ අවධානය යොමු කෙරිණි.

බිම් මල් වගා කරන අයට නව රක්ෂණාවරණයක් - හානියක් වුණොත් ගෙවන මුදල මෙන්න

සමාරම්භක අවස්ථාවට ජනමාධ්‍ය නියෝජ්‍ය අමාත්‍ය ආචාර්ය කෞෂල්‍යා ආරියරත්න මහත්මිය ප්‍රධාන ආරාධිත අමුත්තා ලෙස සහභාගී වූ අතර, පස්වරුවේ සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතාද එක් විය.

අමාත්‍ය නලින්ද ජයතිස්ස මහතා සඳහන් කළේ, වසර දෙකක් වැනි කෙටි කාලයක් තුළ ශ්‍රී ලංකා–ඉන්දියානු මාධ්‍ය මිත්‍රත්ව සංගමය දෙරටේ මාධ්‍යවේදීන් අතර දැනුම, අත්දැකීම් සහ වෘත්තීය සබඳතා වර්ධනය කරන වැදගත් වේදිකාවක් බවට පත්ව ඇති බවයි.

AI, ඩිජිටල් තාක්ෂණය සහ සමාජ මාධ්‍ය හේතුවෙන් ජනතාව තොරතුරු භාවිත කරන ආකාරය වේගයෙන් වෙනස් වන බව ඔහු පෙන්වා දුන්නේය. එමෙන්ම, ප්‍රේක්ෂකයන් තොරතුරු ලබාගන්නා පාර්ශ්වයක් පමණක් නොව ඒවා සත්‍යාපනය කිරීම සහ ඇතැම් අවස්ථාවලදී පුවත් නිර්මාණයටද දායක වන පාර්ශ්වයක් බවට පත්ව ඇති බවද සඳහන් කළේය. මෙම වෙනස්කම් මධ්‍යයේද ජනතාව මාධ්‍යයෙන් අපේක්ෂා කරන්නේ නිවැරදි, සාධාරණ, ස්වාධීන සහ වගකීම් සහගත තොරතුරු බව අමාත්‍යවරයා අවධාරණය කළේය.

වැරදි හා නොමඟ යවන තොරතුරු වේගයෙන් ව්‍යාප්ත වන පසුබිම තුළ වෘත්තීය මාධ්‍යකරණයේ වගකීම තවදුරටත් ඉහළ ගොස් ඇති අතර, මාධ්‍ය ආයතනවල ප්‍රධානතම වත්කම විශ්වසනීයත්වය බවද ඔහු සඳහන් කළේය.

සම්මන්ත්‍රණයට ශ්‍රී ලංකාවේ සහ ඉන්දියාවේ ප්‍රමුඛ මාධ්‍යවේදීන්, සංස්කාරකවරුන්, මාධ්‍ය ආයතන ප්‍රධානීන්, ඩිජිටල් මාධ්‍ය නිර්මාණකරුවන්, විද්වතුන් සහ සිසු සිසුවියන් රැසක් සහභාගී වූහ. AI, ඩිජිටල් පරිවර්තනය, මාධ්‍ය විශ්වසනීයත්වය, සත්‍ය තොරතුරු තහවුරු කිරීම සහ අනාගත මාධ්‍ය භාවිතය පිළිබඳ පුළුල් සාකච්ඡා මෙහිදී පැවැත්විණි.

රටම බලා සිටි ඓතිහාසික රුහුණු මහා කතරගම දේවාලයේ ඇසළ පෙරහර අද සිට ඇරඹෙයි - පළමු පෙරහර සම්බන්ධයෙන් දැනුම්දීමක්