ජනවාරියේ ඉන්ධන, ගෑස් හිඟයක්? - ඉන්ධන මිල සූත්‍රය නව රජයෙන් ඉවත් කරයි.?
Wayomi
ඉන්ධන සහ ගෘහස්ථ ගෑස් හිඟයකින් තොරව ලබන වසර දක්වා ලබාදීමට නම් පසුගිය රජය විසින් ගිවිසුම්ගතව ඇති ටෙන්ඩර් අත්හිටුවන්නේ නැතිව තවදුරටත් ක්‍රියාත්මක කළ යුතුව ඇති බව ජනාධිපති අනුර කුමාර දිසානායක පවසා තිබෙනවා.
ඒ, අනුව පසුගිය රජය විසින් ගෘහස්ථ ගෑස් සැපයීම සම්බන්ධව විදෙස් සමාගමක් සමඟ අත්සන් කර ඇති ගිවිසුම අහෝසි කළහොත් ලබන ජනවාරි මාසය වනවිට රටේ ගෑස් හිඟයක් ඇතිවන බව ද සඳහන් කරනවා.
ජනපති අනුර වැඩිදුරටත් කියා සිටින්නේ,එම ගිවිසුම්වලින් ක්ෂණිකව ඉවත්විය නොහැකි බවත් 2025 ජනවාරි මාසයෙන් පසු එම ගිවිසුම්වලින් ඉවත්වීමට රජය උත්සාහ ගන්නා බවත්ය.
එමෙන්ම ඉන්ධන අලෙවිය සම්බන්ධව දැනට පවතින මිල සූත්‍රයෙන් නව රජය ඉවත්වීමට බලාපොරොත්තු වන බවත් එවිට ඇතැම් ඉන්ධන සැපයුම් සමාගම් මෙරටින් ඉවත්ව යා හැකි බවත් ඇතැම් සමාගම් දේශපාලන අරමුණු වෙනුවෙන් තවදුරටත් රැඳී සිටිය හැකි බවත් ජනාධිපතිවරයා සඳහන් කළා.
මේ අතර ඉන්ධන අලෙවියෙන් ඛනිජ තෙල් සංස්ථාව ඉවත් නොවන බවත් ඉන්ධන මිල පාලනයට රජයේ මැදිහත්වීමක් තිබිය යුතු බව තමා විශ්වාස කරන බවත් ජනාධිපති අනුර කුමාර දිසානායක පවසනවා.
