ඊසානදිග එංගලන්තයේ දරුණු අනතුර- 7 දෙනෙක් එවලේම මියයයි

ඊසානදිග එංගලන්තයේ සෙනසුරාදා අලුයම සිදුවූ දරුණු රිය අනතුරකින් පොලිස් නිලධාරීන් දෙදෙනෙකු ඇතුළු පුද්ගලයින් හත්දෙනෙකු ජීවිතක්ෂයට පත්ව තිබේ. ක්ලීව්ලන්ඩ් පොලිසිය සඳහන් කළේ, මිඩ්ල්ස්බ්‍රෝ හි ඊස්ට් සවුත් බෑන්ක් ප්‍රදේශය ආසන්නයේදී අලුයම 3.39ට පමණ අනතුර සිදුව ඇති බවයි.

ප්‍රධාන මාර්ගයක වැරදි දිශාවට ධාවනය වූ මෝටර් රථයක්, සලකුණු සහිත පොලිස් සන්නද්ධ ප්‍රතිචාර රථයක ගැටීමෙන් අනතුර සිදුව තිබේ. අනතුරට සම්බන්ධ වූ වාහන දෙකෙහි සිටි සියලු දෙනාම එම ස්ථානයේදීම මියගොස් ඇති බව පොලිසිය තහවුරු කළේය. “මෙය ක්ලීව්ලන්ඩ් සඳහා ඇදහිය නොහැකි තරම් දුක්බර දවසක්,” ක්ලීව්ලන්ඩ් පොලිස් ප්‍රධාන කොස්තාපල් වික්ටෝරියා ෆුලර් පැවසුවාය.

මියගිය පොලිස් නිලධාරීන් දෙදෙනා 37 හැවිරිදි මැතිව් බ්ලේඩ්ස් සහ 38 හැවිරිදි ටොම් ක්ලෝ ලෙස හඳුනාගෙන තිබේ. ඔවුන් “නිර්භීත නිලධාරීන්” ලෙස හැඳින්වූ ෆුලර්, සේවා මුරය අවසන් කර තම පවුල් වෙත ආපසු යාමට නොහැකි වූ බව සඳහන් කළාය.

අනෙක් වාහනය වූ වොක්ස්වැගන් පැසැට් රථයේ සිටි පුද්ගලයින් හඳුනාගැනීමේ කටයුතු සිදුකරමින් පවතින අතර, ඔවුන්ගේ පවුල් වෙත දැනුම්දීමේ කටයුතුද ආරම්භ කර තිබේ.

සිද්ධිය සම්බන්ධයෙන් අග්‍රාමාත්‍ය ඇන්ඩි බර්න්හැම් ද සිය කණගාටුව පළ කර ඇති අතර, පොලිස් හැසිරීම සම්බන්ධයෙන් බ්‍රිතාන්‍යයේ ස්වාධීන පොලිස් හැසිරීම් කාර්යාලය විසින් සුපුරුදු පරිදි සමාලෝචනයක් සිදුකිරීමට නියමිතය. මෙම අනතුර සිදුව ඇත්තේ ඩබ්ලින් ආසන්නයේ මෑතකදී සිදුවූ මාරක රිය අනතුරු දෙකක් සම්බන්ධයෙන් අවධානය යොමුව ඇති පසුබිමකය.

එම අනතුරු අතරින් එකකදී පුද්ගලයින් පස්දෙනෙකු මියගොස් තිබිණි. මේ අතර, අයර්ලන්ත පොලිස් ප්‍රධානියා මෙම සතියේ අනතුරු අඟවා තිබුණේ ඇතැම් තරුණයින් සමාජ මාධ්‍යවල ජනප්‍රියත්වය ලබාගැනීම සඳහා යතුරුපැදි වැරදි දිශාවට ධාවනය කරන බවයි.

අයර්ලන්ත පාර්ලිමේන්තු කමිටුවක් විසින් TikTok වෙතින් ද මාර්ගවල සිදුවන භයානක හා නීති විරෝධී හැසිරීම් උත්කර්ෂයට නංවන බව පෙනෙන අන්තර්ගතයන් ඉවත් කිරීමට ගන්නා ක්‍රියාමාර්ග පැහැදිලි කරන ලෙස ඉල්ලා තිබේ. අයර්ලන්ත මාධ්‍ය නියාමකයාද අඟහරුවාදා එවැනිම ඉල්ලීමක් ඉදිරිපත් කර තිබුණි.