කෙහෙළිය, දී.මූ හා ටී.බි දෙන්නම් කියලා සල්ලි අරන්.. - හිටපු මැති ඇමතිවරු ගත් මුදල් ගැන CID විමර්ශන ඇරඹේ!
Shehan
ඉකුත් වසර 2008 සිට 2024 දක්වා කාලය තුළ ජනාධිපති අරමුදලෙන් මුදල් ලබාගැනීමට උත්සාහ කර අගතියට පත්වූවන් ඇත්නම්, එය ලිඛිතව අපරාධ පරීක්ෂණ දෙපාර්තමේන්තුවේ අධ්‍යක්ෂවරයාට දැනුම් දෙන ලෙස එම දෙපාර්තමේන්තුවේ මූල්‍ය හා වාණිජ අපරාධ විමර්ශන අංශය මහජනතාවගෙන් ඉල්ලීමක් කර ඇත.
2008 සිට 2024 දක්වා වූ කාලපරිච්ඡේදයේ ජනාධිපති අරමුදලෙන් මුදල් ලබාගැනීම සම්බන්ධයෙන් හිටපු මැති ඇමතිවරුන් ඇතුළු මහජන නියෝජිතයන් 22 දෙනෙකු පිළිබඳව අපරාධ පරීක්ෂණ දෙපාර්තමේන්තුවේ මූල්‍ය හා වාණිජ අපරාධ විමර්ශන අංශය විසින් විමර්ශනයක් ආරම්භ කර තිබේ.
මෙම විමර්ශනවලට සමගාමීව සිදු කෙරෙන පරීක්ෂණ සඳහා, අගතියට පත් පුද්ගලයන් සිටී නම්, ඔවුන්ගෙන් තොරතුරු ලබාගැනීමට අපරාධ පරීක්ෂණ දෙපාර්තමේන්තුවේ මූල්‍ය හා වාණිජ අපරාධ විමර්ශන අංශය මෙම ඉල්ලීම සිදු කර ඇත. දෙපාර්තමේන්තුවට ලැබුණු පැමිණිල්ලක් මත පදනම්ව මෙම විමර්ශන කටයුතු සිදු කෙරේ.
විමර්ශනයට අදාළව ජනාධිපති අරමුදලේ ගිණුමෙන් නිකුත් කළ චෙක්පත්වල විස්තර ලබා ගැනීමට, විමර්ශන නිලධාරීන් පසුගිය (02) වැනිදා කොටුව මහෙස්ත්‍රාත් අධිකරණයෙන් නියෝගයක් ලබාගෙන ඇත. ඒ අනුව, ජනාධිපති අරමුදලට සම්බන්ධ ලිපිගොනු 22ක් විමර්ශන නිලධාරීන් විසින් භාරයට ගෙන තිබේ යැයි පොලිසිය පවසයි. එම ලිපිගොනුවල තොරතුරු අනුව, මහජන නියෝජිතයන් 22 දෙනෙකු විවිධ මුදල් ප්‍රමාණයන් ලෙස රුපියල් කෝටි 10කට වැඩි මුදලක් ලබාගෙන ඇති බව හෙළි වී ඇත.
එහිදී, කෙහෙලිය රඹුක්වැල්ල, දි.මූ. ජයරත්න සහ ටී.බී. ඒකනායක යන මහත්වරුන් නැවත ගෙවීමේ පදනම මත අරමුදලෙන් මුදල් ලබාගෙන ඇති අතර, ඔවුන් එම මුදල් නැවත ගෙවූවා ද යන්න පිළිබඳව ද විමර්ශන සිදු කෙරෙමින් පවතී.
මුදල් ලබාගත් මහජන නියෝජිතයන් ඉදිරියේදී අපරාධ පරීක්ෂණ දෙපාර්තමේන්තුවට කැඳවා ඔවුන්ගේ ප්‍රකාශ සටහන් කර ගැනීමට විමර්ශන නිලධාරීන් සැලසුම් කර ඇතැයි වාර්තා වේ.
