බීලා එලවන අයටයි ස්පීඩ් යන අයටයි වැඩ වරදියි- පොලීසියෙන් රට පුරා විශේෂ මෙහෙයුමක්

පාසල් නිවාඩු සමයත් සමඟ දිවයින පුරා ජනතාව විවිධ ප්‍රදේශවල සංචාරය කිරීමේ ප්‍රවණතාව ඉහළ යාම හේතුවෙන්, රථවාහන අනතුරු අවම කිරීම සඳහා පොලීසිය විශේෂ රථවාහන මෙහෙයුම් ආරම්භ කර තිබේ.

විශේෂයෙන්ම අධික වේගයෙන් රිය ධාවනය කරන රියැදුරන් සහ බීමත්ව රිය පදවන පුද්ගලයන් හඳුනාගෙන ඔවුන්ට එරෙහිව නීතිමය ක්‍රියාමාර්ග ගැනීම සඳහා මෙම මෙහෙයුම් ක්‍රියාත්මක කර ඇති බව පොලීසිය පවසයි.

 අධික වේගයෙන් රිය ධාවනය කිරීම මෙන්ම බීමත්ව රිය පැදවීම රිය අනතුරුවලට ප්‍රධාන හේතු අතරට අයත් වන බැවින්, එවැනි රියැදුරන් පිළිබඳ දැඩි අවධානයක් යොමු කරමින් පරීක්ෂණ සිදුකිරීමට නියමිතය.

විශේෂයෙන්ම සංචාරකයන් බහුලව ගැවසෙන ප්‍රදේශ, ප්‍රධාන මාර්ග සහ අධික රථවාහන තදබදයක් පවතින මාර්ග ආශ්‍රිතව රථවාහන නීති ක්‍රියාත්මක කිරීම දැඩි කිරීමටද පොලීසිය කටයුතු කර තිබේ.

ඩොලරය හමුවේ රුපියල නැවතත් ඉදිරියට- ප්‍රධාන බැංකු කිහිපයකම අද ඩොලර් මිල ගණන් මෙන්න

පාසල් නිවාඩු කාලය තුළ දරුවන් සහ පවුල් සමඟ දිගු ගමන්වල නිරත වන රියැදුරන් වඩාත් සැලකිලිමත් විය යුතු බව පොලීසිය අවධාරණය කරයි. රිය පැදවීමේදී මාර්ග නීති අකුරටම පිළිපදින ලෙසත්, නියමිත වේග සීමාවන් ඉක්මවා රිය ධාවනය නොකරන ලෙසත් පොලීසිය රියැදුරන්ගෙන් ඉල්ලා සිටී.

එමෙන්ම මත්පැන් පානය කිරීමෙන් අනතුරුව කිසිදු අවස්ථාවක රිය පැදවීමෙන් වළකින ලෙසත්, තමන්ගේ මෙන්ම මාර්ගයේ ගමන් කරන අනෙකුත් පුද්ගලයන්ගේ ජීවිත ආරක්ෂාව පිළිබඳවද වගකීමෙන් කටයුතු කරන ලෙසත් පොලීසිය ජනතාවගෙන් වැඩිදුරටත් ඉල්ලා සිටී.

පාසල් නිවාඩු සමයේ සිදුවිය හැකි රථවාහන අනතුරු අවම කරමින් ජනතාවට ආරක්ෂිතව සිය ගමන් බිමන්වල නිරත වීමට අවශ්‍ය පරිසරය සැලසීම මෙම විශේෂ මෙහෙයුම්වල ප්‍රධාන අරමුණ බව පොලීසිය පවසයි.