මඟුල් ගෙවල්, සාද, DJ සහ පොදු ස්ථානවල සංගීතය වාදනයට බලපත්‍රයක් අනිවාර්ය කෙරේ

බුද්ධිමය දේපළ අයිතිවාසිකම් ආරක්ෂා කිරීමේ අරමුණින්, විවාහ මංගල්‍ය, සාද, ආයතනික උත්සව, DJ වැඩසටහන් මෙන්ම බැංකු සහ සුපිරි වෙළඳසැල් ඇතුළු වාණිජ ස්ථානවල සංගීතය වාදනය කිරීම සඳහා බලපත්‍රයක් ලබා ගැනීම අනිවාර්ය කරමින් නව රෙගුලාසි ගැසට් මගින් ප්‍රකාශයට පත් කර තිබේ.

ජාතික බුද්ධිමය දේපළ කාර්යාලය (NIPO) යටතේ ක්‍රියාත්මක වන ශ්‍රී ලංකාවේ නිර්මාණකරුවන්ගේ සහ ප්‍රකාශකයන්ගේ සංගමය (ACPOSL) විසින් හඳුන්වා දී ඇති මෙම රෙගුලාසි පසුගිය අඟහරුවාදා සිට බලාත්මක වී ඇත.

ඒ අනුව, සංගීතය ඇතුළත් වැඩසටහන් සංවිධානය කරන හෝටල් සහ ආයතන බලපත්‍රයක් ලබාගත යුතු අතර, ඒ සඳහා අය කෙරෙන ගාස්තු සහභාගී වන පුද්ගලයින් සංඛ්‍යාව අනුව රුපියල් 20,000 සිට රුපියල් 125,000 දක්වා පරාසයක පවතී.

හෙට සියලු පාසල් වසයිද? අයහපත් කාලගුණ තත්ත්වයක් පවතින සියලුම දිස්ත්‍රික්කවල පාසල් සම්බන්ධයෙන් විශේෂ දැනුම්දීමක්

මෙම බලපත්‍ර ක්‍රමය මූලික වශයෙන් ACPOSL නියෝජනය කරන ශ්‍රී ලාංකීය සංගීත නිර්මාණ සහ ඉන්දියාවේ Performing Rights Society (IPRS) හරහා නියෝජනය වන හින්දි හා දෙමළ සංගීත නිර්මාණ සඳහා අදාළ වේ.

ඉංග්‍රීසි හෝ වෙනත් විදේශීය සංගීත නිර්මාණ පමණක් භාවිත කරන වැඩසටහන් සඳහා මෙම බලපත්‍රය අවශ්‍ය නොවන බව සඳහන් වේ. ACPOSL පවසන පරිදි, නව අවශ්‍යතාවය විවාහ මංගල්‍ය සහ පිළිගැනීමේ උත්සව, පෞද්ගලික සාද, ආයතනික උත්සව, රාත්‍රී භෝජන නර්තන වැඩසටහන්, සම්මාන උළෙල, නිෂ්පාදන හඳුන්වාදීමේ උත්සව, ප්‍රවර්ධන වැඩසටහන්, DJ සංදර්ශන, සජීවී සංගීත ප්‍රසංග, දෙමුහුන් උත්සව සහ සංගීතය ඇතුළත් සම්මන්ත්‍රණ ඇතුළු පුළුල් පරාසයක වැඩසටහන් සඳහා අදාළ වේ.

DJ වැඩසටහන් සඳහා පුද්ගලයින් 100කට අඩු අවස්ථා සඳහා රුපියල් 20,000ක් ද, 100ත් 300ත් අතර සහභාගිවන්නන් සඳහා රුපියල් 30,000ක් ද, පුද්ගලයින් 300කට වැඩි අවස්ථා සඳහා රුපියල් 40,000ක් ද ලෙස ගාස්තු නියම කර තිබේ.

සජීවී සංගීත වැඩසටහන් සඳහා එම කාණ්ඩ අනුව පිළිවෙළින් රුපියල් 25,000ක්, රුපියල් 35,000ක් සහ රුපියල් 50,000ක් අය කෙරේ. පෞද්ගලික හෝ ආයතනික DJ වැඩසටහන් සඳහා රුපියල් 25,000, රුපියල් 40,000 සහ රුපියල් 50,000ක් වන අතර, දෙමුහුන් හෝ සජීවී ආයතනික උත්සව සඳහා රුපියල් 50,000 සිට රුපියල් 125,000 දක්වා ගාස්තු නියම කර ඇත.

'සන්ඩේ ටයිම්ස්' වාර්තාවකට අනුව, ගායකයින්ට සාපේක්ෂව ඇතැම් අවස්ථාවල නිසි ඇගයීමක් හෝ ප්‍රතිලාභයක් නොලබන සංගීත නිර්මාණකරුවන්, ගීත රචකයන් සහ ප්‍රකාශකයන් වෙත හිමිකම් ගෙවීම් නිසි පරිදි බෙදා හැරීම සහතික කිරීම මෙම ක්‍රමයේ ප්‍රධාන අරමුණකි.

ACPOSL සභාපති නිලා සඳහන් කර ඇත්තේ මෙම ක්‍රමය ප්‍රධාන වශයෙන් වාණිජමය අරමුණින් සංවිධානය කරන වැඩසටහන් ඉලක්ක කර ගන්නා බවත්, ඇතැම් කුඩා පරිමාණ කලාකරුවන් සඳහා නිදහස් කිරීම් පවතින බවත්ය.

නව රෙගුලාසි අනුව, ACPOSL බලපත්‍රයක් නොමැතිව උත්සව සඳහා අවසර ලබා නොදෙන ලෙස හෝටල් වෙත දැනුම් දී තිබේ. එමෙන්ම, උත්සවයේදී වාදනය කළ සංගීත නිර්මාණ හඳුනා ගැනීම සඳහා වැඩසටහන අවසන් වූ පසු එහි ශ්‍රව්‍ය පටිගත කිරීමක් ලබාදීමට සංවිධායකයින්ට සිදුවේ.

බෙංගාල බොක්කේ අඩු පීඩන ප්‍රදේශය නිසා දිවයිනට තවදුරටත් වැසි-පැය 24ක් පුරා වලංගු වන පරිදි රතු එළියක්

මෙම බලපත්‍ර ක්‍රමය සුපිරි වෙළඳසැල්, බැංකු, සිල්ලර වෙළඳසැල්, සාප්පු සංකීර්ණ, සිනමා ශාලා සහ කාර්යාල ගොඩනැගිලි වැනි වාණිජ පරිශ්‍ර සඳහා ද අදාළ වේ. මීට අමතරව, බස් රථ, සංචාරක වෑන් රථ සහ මගී දුම්රිය ඇතුළු පොදු හා වාණිජ ප්‍රවාහන සේවාවල සංගීතය භාවිත කිරීම ද මෙම ක්‍රමයට ඇතුළත් කර තිබේ.

වාණිජ පරිශ්‍ර සඳහා වාර්ෂික බලපත්‍ර නිකුත් කෙරෙන අතර, ඒ සඳහා අය කෙරෙන ගාස්තු පරිශ්‍රයේ ප්‍රමාණය සහ අදාළ පළාත් පාලන ආයතන බල ප්‍රදේශය අනුව වෙනස් වන බව සඳහන් වේ.