පමුණුවේ වෙළෙන්දන්ට වෙළෙඳාම් කිරීමට තහංචියක්!
Shehan
උත්සව සමයේදී පමුණුවේ වෙළෙඳාම් කිරීමට මෙතෙක් ලබා දී තිබූ අවසරය මෙවර මහරගම නගර සභාව විසින් අහෝසි කර ඇති බව මහරගම පමුණුව අලුයම සළුපිළි වෙළෙඳ සංගමය පවසමින් අප්‍රසාදය පළ කර තිබේ.
මහරගම නගර සභාවේ මෙම තීරණය හේතුවෙන් තම වෙළෙඳ කටයුතුවලට බාධා එල්ල වී ඇතැයි චෝදනා කරමින් එම සංගමය මාධ්‍ය හමුවක් කැඳවා තිබුණි.
එහිදී සංගමයේ සභාපති කුසුම්සිරි දසනායක මෙසේ අදහස් පළ කළේය;
"මේකට රජයෙන් කිසිම මැදිහත්වීමක් වුණා කියලා මම හිතන්නේ නැහැ. මහරගම නගර සභාව වෙනදා අපිට දුන්න පහසුකම් දැන් අහෝසි කරලා. ඒක රජය අපහසුතාවයට පත් කරන්නද කියලා අපිට තේරෙන්නේ නැහැ." "මෙච්චර කාලයක් අපි උත්සව සමයේ වෙළෙඳාම් කළා.
අවුරුදු ගණනාවකට පස්සේ මේ වගේ ගැටලුවක් අපිට මතු වෙලා තියෙනවා. සාමාන්‍යයෙන් උත්සව කාලයේ අපි උදේ 9.30 වෙනකල් වෙළෙඳාම් කරනවා. දැන් ඒකත් අහිමි වෙලා, උදේ 8.30 වෙනකොට අපිට වෙළෙඳ ස්ථානවලින් ඉවත් වෙන්න කියනවා. ඒ විතරක් නෙවෙයි, මහරගම නගර සභාව පදික වේදිකාව උඩ වෙළෙඳ කුටි හදලා, අපෙන් බඩු ගන්න අයට ඒවා කුලියට දීලා තියෙනවා. අපි අවුරුද්ද පුරාම බදු ගෙවලා මේ ව්‍යාපාරය පවත්වාගෙන එනවා. ඒ කැපවීම් සියල්ල අපිම කරනවා. නමුත් නගර සභාව වෙන කුටි හදලා, ඒ අයට අවස්ථාව දීලා, අපිට යන්න කියනවා.
උත්සව කාලයේ කොළඹ නගරයේ පාරවල් වැහුවත්, එහේ වෙළෙඳුන්ට වෙළෙඳාම් කරන්න අවස්ථාව දෙනවා. එහෙම නම් ඇයි මහරගමට විතරක් මෙහෙම සලකන්නේ? රජය මැදිහත් වෙලා මේ ප්‍රශ්නයට විසඳුමක් දෙන්න ඕනේ. පමුණුවේ අලුයම වෙළෙඳාම් කරන අපි ගැන කිසිම රජයකින් අවධානයක් යොමු වෙලා නැහැ. මේ අය බලයට එනකොට කිව්වා දේශීය කර්මාන්ත රැකගන්නවා කියලා.
ඒ රැකගැනීම ඉෂ්ට කරන්න ඕනේ. අපි කඩාකප්පල්කාරී විදියට හැසිරෙන්නේ නැහැ. උද්ඝෝෂණවලට යන්නෙත් නැහැ. අපි අහිංසකව ඉල්ලීමක් විතරයි කරන්නේ. අපිට උද්ඝෝෂණ කරන්න වෙලාවක් නැහැ, මොකද මේ උත්සව කාලයේ අපිට මේ ව්‍යාපාරයේ නියැළෙන්න ඕනේ."
