කොත්මලේ ජලාශය ආශ්‍රිතව සිදුවූ බව කියන නිලධාරී මාරුවීම් කතාවේ ආන්දෝලනාත්මක තත්වයක්

මෙරටට මෑතකදී බලපෑ දරුණු සුළි කුණාටු තත්ත්වය කළමනාකරණයේදී රජය 'බරපතළ අතපසුවීම්' සිදු කළ බවට චෝදනා කරමින්, හිටපු පාර්ලිමේන්තු මන්ත්‍රී නිමල් පියතිස්ස මහතා කොත්මලේ ජලාශය ආශ්‍රිත නිලධාරී මාරුවීම් සහ ජල කළමනාකරණ අකාර්යක්ෂමතාවන් පිළිබඳ දැඩි ප්‍රකාශයක් ඉදිරිපත් කළේය.

මාධ්‍ය සාකච්ඡාවකදී අදහස් දක්වමින් හිටපු මන්ත්‍රීවරයා සඳහන් කළේ, කොත්මලේ ජලාශය භාරව සිටි ජ්‍යෙෂ්ඨ ඉංජිනේරුවන් තිදෙනෙකු ඉවත් කර, ජනතා විමුක්ති පෙරමුණට (ජවිපෙ) හිතවත් ආධුනික ඉංජිනේරුවරුන් එම තනතුරුවලට පත් කර ඇති බවට තොරතුරු ලැබී ඇති බවයි.

ලක්ෂ 3ක පිරිසක් මිය යයි.. - ජපානය පළමු මෙගා භූමිකම්පා අනතුරු ඇඟවීම ගැන අනාවැකියක්

"මෙම තීරණයන් ජලාශයේ ආරක්ෂාව සහ කළමනාකරණයට බරපතළ තර්ජනයක්" යැයි ඔහු චෝදනා කළේය.

දරුණු සුළි කුණාටුවක් පිළිබඳව කාලගුණ දෙපාර්තමේන්තුව සහ ජාත්‍යන්තර කාලගුණ විද්‍යා ආයතන විසින් මිලිමීටර් 400-500ක වැසි ධාරිතාවක් සහිතව අනතුරු ඇඟවීම් නිකුත් කළද, අදාළ නිලධාරීන් ජලාශයේ ජලය ඉහළම මට්ටමට ළඟා වන තෙක් ක්‍රියාමාර්ග ගැනීමට අපොහොසත් වූ බව නිමල් පියතිස්ස මහතා පෙන්වා දෙයි.

ඔහුගේ චෝදනාවට අනුව, ක්‍රමානුකූල ජල ප්‍රමාණය අඩු කිරීමේ පූර්ව සූදානම් ක්‍රියාවලියකට යොමු නොවීම මෙම අකාර්යක්ෂමතාවේ ප්‍රධාන හේතුවකි. "ධාරාණිපාත වර්ෂාපතනයත් සමඟ ජලාශයේ ජලය පිටාර ගැලීම්, නාය යෑම් සහ කඳුකර ප්‍රදේශවල බරපතළ ඛේදවාචක ඇති වීමට මෙය බරපතළ ලෙස හේතු වූවා" යැයි ඔහු අවධාරණය කළේය. වත්මන් ආණ්ඩුව මෙම අනතුරු ඇඟවීම් නොසලකා හැර, ආපදාව සිදුවීමට 'ඉඩදීමක්' කළ බවට ද ඔහු බරපතළ චෝදනාවක් එල්ල කළේය.

2005 අංක 13 දරන ආපදා කළමනාකරණ පනත යටතේ, මෙවැනි තත්ත්වයක් වාර්තා වූ විට ආපදා තත්ත්වය ප්‍රකාශයට පත් කිරීමේ බලය ජනාධිපතිවරයාට පැවරී ඇති බව පෙන්වා දෙන හිටපු මන්ත්‍රීවරයා, අතීත රජයන් මෙන් ආපදා කළමනාකරණ කමිටුව කැඳවා ක්‍රමානුකූල සැලැස්මක් සකස් කිරීමට වත්මන් පාලනය අපොහොසත් වූ බව චෝදනා කරයි.

ගුරු විදුහල්පති හා සිසුන්ට ණය සහන - මෙන්න ඉල්ලීම්

"අපි අපේ ජනතාවගේ ජීවිත ආරක්ෂා කිරීමට බැරි වුණේ මේ බරපතළ අතපසුවීම් නිසා. රජය මෙයට වගකීමක් ගන්න ඕනෑ" යැයි නිමල් පියතිස්ස මහතා වැඩිදුරටත් පවසමින්, එම චෝදනාවලට රජයෙන් පිළිතුරු ලබාදීමක් බලාපොරොත්තු වන බව ද ප්‍රකාශ කළේය.

මෙම චෝදනාවලට රජයේ ප්‍රතිචාරයක් තවමත් නොලැබී ඇති අතර, කඳුකර ප්‍රදේශවල බලපෑමට ලක්වූ ජනතාවගේ ආපදා ප්‍රතිචාර කටයුතු දිගින් දිගටම සිදුවෙමින් පවතී.