පාස්කු ප්රහාරයේ සැඟවුණු කුමන්ත්රණ හෙළි කරගන්න රජයෙන් දැවැන්ත මෙහෙයුමක්
පාස්කු ඉරුදින ත්රස්ත ප්රහාරයේ 8 වැනි සංවත්සරයට පෙර සියලු කුමන්ත්රණකරුවන් නීතිය ඉදිරියට ගෙනඒමට විමර්ශන කටයුතු ක්රියාත්මක වන බව අතිරේක සොලිසිටර් ජනරාල් දිලීප පීරිස් මහතා කොළඹ කොටුව මහේස්ත්රාත් අධිකරණයට අද (22) දැනුම් දුන්නේය.
මෙම කරුණු අනාවරණය වූයේ පාස්කු ප්රහාරය සම්බන්ධ විමර්ශන නඩුව කොටුව මහේස්ත්රාත් ඉසුරු නෙත්තිකුමාර මහතා ඉදිරියේ කැඳවූ අවස්ථාවේදීය.
මෙහිදී රැඳවුම් භාරයේ සිටින රාජ්ය බුද්ධි සේවයේ හිටපු අධ්යක්ෂවරයෙකු වන විශ්රාමික මේජර් ජෙනරාල් සුරේෂ් සලේ මහතාද අධිකරණ නියෝග මත ඉදිරිපත් කරනු ලැබීය.
2018 නොවැම්බර් 29 වනදා වව්නතිව්හි පොලිස් නිලධාරින් දෙදෙනෙකු ඝාතනය කිරීම සහ 2019 අප්රේල් 26 වනදා සයින්දමරුදුහි සිදුවූ පිපිරීම සම්බන්ධ විමර්ශන නොමඟ යැවීමේ චෝදනා මත මෙම නඩුව විභාගයට ගෙන ඇත.
එම අවස්ථාවේදී අතිරේක සොලිසිටර් ජනරාල්වරයා විසින් විමර්ශන කටයුතු පිළිබඳ වැඩිදුර වාර්තාවක්ද අධිකරණයට ඉදිරිපත් කර ඇත.
"ස්වාමිනි, පාස්කු ඉරුදින ත්රස්ත ප්රහාරය කියන්නේ ඉතාම සංවිධානාත්මක මෙහෙයුමක්. 2015 වසරටත් පෙර සිටයි මේ සිද්ධි මාලාව සංවිධාන වෙන්නේ. මඩකලපුවේ ඉන්න මුස්ලිම් පිරිසකට තියා, ISIS,අල්ඛයිඩා වැනි පිරිසකටවත් මෙවැනි සංවිධානාත්මක ප්රහාරයක් කරන්න බැහැ අභ්යන්තර සහයක් නැතුව. ඒ ශක්තිය තමයි මේ තුන්වැනි සැකකරු දීලා තියෙන්නේ.
වව්නතිව් සිද්ධිය කියන්නේ ඒ සංවිධානාත්මක මෙහෙයුමේ එක් අවස්ථාවක් විතරයි. නමුත් ඒ සිදුවීමට අදාළව විමර්ශනය සහරාන් හෂීම් කරා යාමට තිබූ ආවස්ථාව කුමන්ත්රණකාරීව යටගහලා තියෙනවා. වව්නතිව්හි ඝාතනය වූ පොලිස් නිලධාරීන් දෙදෙනාගේ ආයුධ සොයාගත්තේ සහරාන් හෂිම්ගේ ඥාතී ගෆූර් මාමාගේ නිවසේ තිබියදී. නමුත් අජන්තන් නැමැති හිටපු එල්.ටී.ටී.ඊ. සාමාජිකයෙකුගේ ජැකට් එකක් දාලා මේ විමර්ශනය ගෆූර් මාමා දෙසට යාම වළක්වා තිබෙනවා.
මේ දෙවැනි සැකකරු ඔය කියන ගෆූර් මාමාව පොලිස් ස්ථානයට කැඳවලා ප්රකාශයක්වත් ගන්නේ නැතුව යළි යන්න ඉඩහැරලා තියෙනවා. කාගේ අනුදැනුම මතද ඒක වුණේ? සහරාන් ඇතුළු පිරිස අනාවරණය වෙන්න තිබ්බ අවස්ථාවක් තමයි දැනුවත්ව යටගහලා තියෙන්නේ" යැයි පැවසීය.
මෙහිදී අතිරේක සොලිසිටර් ජනරාල් දිලීප පීරිස් මහතා පාස්කු ප්රහාරයට පෙර සමයේ මෙරට තුළ සිදුවූ සිදුවීම් මාලාවක සම්බන්ධතාවයක් ඇති බවට අධිකරණය හමුවේ දැනුම් දුන්නේය.
"ස්වාමිනි, වසර 10ක රාජපක්ෂ පාලනය නිමා වෙලා 2015 වසරේ මෛත්රීපාල සිරිසේන ජනාධිපතිවරයා බලයට එනවා. පස්සේ ලසන්ත වික්රමතුංග ඝාතනය, ප්රදීප් එක්නැලිගොඩ අතුරුදහන් කිරීම, කීත් නොයාර්ට පහරදීම වගේ සිදුවීම් සම්බන්ධයෙන් පරීක්ෂණ පටන්ගන්නවා.
එහිදී අත්අඩංගුවට ගැනෙන්නේ මේ සැකකාර සුරේෂ් සලේ යටතේ සිටි යුද්ධ හමුදා බුද්ධි අංශ සාමාජිකයන්. මේකත් හරියට අර මාතර දේශබන්දු තෙන්නකෝන් නඩුව වගේ. මොහුත් දේශපාලන කණ්ඩායම් රකින්න ප්රහාරක කණ්ඩායම් මෙහෙයවලා.
පස්සේ 2018 වසරේ දින 52 ආණ්ඩුවට එරෙහිව දෙසැම්බර් 13 ශ්රේෂ්ඨාධිකරණ තීන්දුව එනවා. ඊට පස්සෙයි මාවනැල්ලේ බුදු පිළිම කැඩෙන්නේ. එය මුස්ලිම් අන්තවාදී ක්රියාවක් කියලා යුධ හමුදා නිලධාරීන් පැමිණිලි කරනවා. අන්තවාදී බෞද්ධ භික්ෂුවක් වන ඥානසාර හිමි සහ සහරාන් හෂීම්ව යුද්ධ හමුදා බුද්ධි අංශය නඩත්තු කළා.
පාස්කු ප්රහාරයට සති කිහිපයකට පෙර ගෝඨාභය රාජපක්ෂ කියන පුද්ගලයා Indian Express පුවත්පතට කියනවා මම තමයි රටේ අනාගත ජනාධිපති කියලා. මොහු ඇමරිකානු පුරවැසියෙක් වෙලා ඉද්දියි පාස්කු ප්රහාරය වෙන්නේ. පසුව ලංකාවට ඇවිල්ලා ජනාධිපතිවෙලා රාජ්ය බුද්ධි සේවයේ අධ්යක්ෂ තනතුරට පොලිසියෙන් පරිබාහිරව සුරේෂ් සලේ කියන මේ සැකකරුව ගේනවා.
ඔවුන්ම පාස්කු ප්රහාරය ගැන විමර්ශන පටන් අරගෙන ශානි අබේසේකර ඇතුළු නිලධාරීන් 70 දෙනෙකුව ස්ථාන මාරු කරනවා. ඒ මේ කුමන්ත්රණය ආරක්ෂා කරන්න. නමුත් අපි පාස්කු ප්රහාරයේ 08 වැනි සංවත්සරයක් එන්න ඉඩ තියන්නේ නැහැ. වසරක් ඇතුළට සියලුම කුමන්ත්රණකරුවන්ව අධිකරණය ඉදිරියට ගේනවා".
මෙහිදී කොටුව මහේස්ත්රාත් ඉසුරු නෙත්තිකුමාර මහතා විවෘත අධිකරණය හමුවේ මෙලෙස පැවසීය.
"මේක ක්රීඩාවක් නොවෙයි. සංවේදී ප්රශ්නයක්. අධිකරණය හමුවේ කියන සෑම වචනයක්ම ඒ ප්රශ්නයට පිළිතුරු සෙවීමට යොමුවීමක් වියයුතුයි. යුක්තිය ඔප්පු වෙනවානම් සාධාරණ සැකයෙන් ඔබ්බට ඔප්පු වෙන්න ඕනේ. එතැනින් පහළ සියලු දේවල් හුදෙක් මතවාද.
සත්යය අසත්ය මොකක් වුණත්, ඔප්පු කරගන්න බැරිනම් වැඩක් නැහැ. විමර්ශන නිලධාරීන් සාධාරණ සැකයෙන් ඔබ්බට කියන භාරය හිතේ තියාගෙන අධිකරණයට කරුණු ඉදිරිපත් කරන්න."
ඊට අතිරේක සොලිසිටර් ජනරාල්වරයා මෙලෙස ප්රතිචාර දැක්වීය.
"ස්වාමිනි, විමර්ශන අවස්ථාවේ අපි බලන්නේ සාධාරණ සැකය. එය ඔප්පුවනවාද, නැද්ද යන්න තිබෙන්නේ අධිකරණය ඉදිරියේ. නමුත් මේ වෙද්දි මේ විමර්ශනය කරගන්න බැරි තරමින් බාධා එල්ලවෙමින් තිබෙනවා. මහේස්ත්රාත්වරයා ඉදිරියේ ප්රකාශ ලබාදුන් සාක්ෂිකරුවන්ට දිගින් දිගටම යුද්ධ හමුදා බුද්ධි අංශයෙන් ප්රකාශ ඉවත්කරගන්න කියලා බලපෑම් එල්ලවෙමින් තිබෙනවා. දැනට ඔබ ඉදිරියේ ප්රකාශ දී තිබෙන කලීල් කියන සාක්ෂිකරුගේ නිවසට පසුගිය නඩුවාරයෙන් පස්සේ යුද්ධ හමුදා බුද්ධි නිලධාරීන් ගිහින් තර්ජනය කරලා තියෙනවා. පස්සේ එම පුද්ගලයාගේ නිවසට අත්බෝම්බ 05ක් සහ පිස්තෝලයක් දාලා දැනට නැගෙනහිර පළාත් ජ්යෙෂ්ඨ නියෝජ්ය පොලිස්පති වරුණ ජයසුන්දර මාර්ගයෙන් STF හරහා එම පුද්ගලයා අත්අඩංගුවට ගැනීමට සැලසුම් කරලා තියෙනවා. මොකද ඔහු තමයි රාජපක්ෂ යුගයේ STF අණදෙන නිලධාරියා".
මෙහිදී මහේස්ත්රාත්වරයා දැඩි ස්වරයෙන් මෙසේ ප්රශ්න කළා.
"ඔබ කියන්නේ දැනටත් පොලිස් සේවයේ සිටින ඉහළම නිලධාරියෙක් මේ විමර්ශනවලට බලපෑම් කිරීමට සම්බන්ධයි කියලාද? "
ඊට පිළිතුරු දුන් දිලීප පීරිස් මහතා,
"ඔව් ස්වාමිනි, මම වගකීමෙන් කියන්නේ. ඔහු සම්පූර්ණයෙන්ම මේ කුමන්ත්රණයේ කොටස්කරුවෙක්. ඔහු TID අධ්යක්ෂවෙලා ඉද්දි පාස්කු ප්රහාරයට දවස් 7කට කලින් ජමීල් කියන්නේ අහිංසකයෙක් කියලා Report එකක් එවලා. එහෙම ජමීල් තමයි පස්සේ බෝම්බ පුපුරුවාගත්තේ."
මෙහිදී නැවතත් ප්රශ්න කළ මහේස්ත්රාත්වරයා,
"ඔය කියන නිලධාරියාට එරෙහිව සෘජු සාක්ෂි තිබෙනවාදැයි ප්රශ්න කළා.
"නැහැ. ස්වාමිනි දැනට සෘජු සාක්ෂි නැහැ. නමුත් අපි විමර්ශන කරමින් යනවා"
යැයි අතිරේක සොලිසිටර් ජනරාල්වරයා පිළිතුරු දුන්නේය.
මෙහිදී අතිරේක සොලිසිටර් ජනරාල්වරයා විශේෂ ඉල්ලීමක් කරමින් අධිකරණයෙන් ඉල්ලා සිටියේ, මෙම විමර්ශනයට සහය ලබාදෙන ලෙස යුද්ධ හමුදාපතිවරයාට සහ යුද්ධ හමුදා බුද්ධි අධ්යක්ෂවරයාට නියෝගයක් නිකුත් කරන ලෙසය. එම ඉල්ලීම ප්රතික්ෂේප කළ මහෙස්ත්රාත්වරයා කියා සිටියේ, රටේ සෑම රාජ්ය නිලධාරියෙක්ම නීතිපතිවරාගේ බලයට යටත්වන බැවින් එය අභිබවායාමට කවරෙකු හෝ කටයුතු කරන්නේ නම් ඊට එරෙහිව නීතිපතිවරයාටම පියවරගත හැකි බවය. මෙහිදී වැඩිදුරටත් කරුණු දැක්වූ අතිරේක සොලිසිටර් ජනරාල්වරයා පිල්ලෙයාන් සම්බන්ධයෙන් සිදු කෙරෙමින් පවතින විමර්ශන පිළිබඳවද අදහස් දැක්වීය.
"ස්වාමිනි, 2018 - 2019 සමයේ සිවනේසතුරෙයි චන්ද්රකාන්තන් නොහොත් පිල්ලෙයාන් මඩකලපුව බන්ධනාගාරයේ සිටින සමයේ සහරාන් හෂිම්ගේ මල්ලිවන ශෙයිනිව බන්ධනාගාරය තුළදී හමුවූ බවට අසාද් මවුලානා ප්රකාශයක් කර තිබෙනවා. ඒ හමුවීම සඳහා හඳුන්වාදීම කර ඇත්තේ මේ සැකකාර සුරේෂ් සලේ"
එහිදී මහෙස්ත්රාත්වරයා අසාද් මවුලානා සම්බන්ධ ඉදිරි විමර්ශන පිළිබඳ විමසා සිටියේය. ඊට පිළිතුරු දුන් අතිරේක සොලිසිටර් ජනරාල්වරයා,
"ඔහු ඉන්න තැන අපි සොයාගෙන ඉන්නේ. ඔහු රැඳී සිටින්නේ ප්රංශයේ. ඔහු සමග අපිට සම්බන්ධකම් තියෙනවා. අපි ඔහුව ප්රංශ තානාපති කාර්යාලයට ගෙන්වා ප්රකාශයක් ලබාගැනීමට කටයුතු කරමින් ඉන්නවා"
අනතුරුව සැකකාර රාජ්ය බුද්ධි සේවයේ හිටපු අධ්යක්ෂ සුරේෂ් සලේ වෙනුවෙන් නීතිඥ අසිත් සිරිවර්ධන කරුණු දැක්වීය.
"ස්වාමිනි, පැමිණිල්ල කිව්වා ඝාතන කිහිපයක නම් කියලා මගේ සේවාදායකයා ප්රහාරක කණ්ඩායම් යැව්වා කියලා. ඔය සිද්ධි බොහෝමයක් වෙද්දි ඔහු රාජ්ය බුද්ධි සේවයේ අධ්යක්ෂ නොවෙයි. ඒ වගේම ඇතැම් සිද්ධි වෙද්දි ඔහු රටේත් නැහැ. ඒ වගේම මගේ සේවාදායකයාට එරෙහිව චෝදනා එල්ල කරන අසාද් මවුලානා කියන පුද්ගලයා එක්සත් ජාතින්ගේ මානව හිමිකම් සැසිවාරයට ලබාදී තිබෙන පිටු 18ක ප්රකාශය මම කියෙව්වා.
එකේ ඔහු සහරාන්ව හඳුන්වා තිබෙන්නේ Hero ලෙස. ඒ වගේම දේශපාලන සරණාගතභාවය වෙනුවෙන් ඔහු අපේ රට බොහෝ පහළට දාලා තිබෙනවා. ඔහු මෙරට ශ්රේෂ්ඨාධිකරණයේ විනිසුරුවන් කිහිපදෙනෙක් සහ අධිකරණ පද්ධතියත් විවේචනය කරලා තියෙනවා.
ඉතිං මම නිශ්චිතව කියන්නේ ඔහු කවදාවත් මේ නඩුවට අදාළව ප්රකාශයක් ලබාදෙන්න ලංකාවට එන්නේ නැහැ. ආවොත් ඔහුගේ ප්රකාශයේ තියෙන අනිත් කරුණුවලට එරෙහිව නීතිය ක්රියාත්මක වෙනවා. මගේ සේවාදායකයා රඳවා තිබෙන කුටිය අසල කුටියක පුද්ගලයෙක්ට මේ වෙද්දි මීයෙක් කාලා මහාමාරිය හැදිලා තියෙනවා.
ඒ වගේම ඔහු මානසිකව පසුබැහැලා ඉන්නේ. ඔහු වෙනුවෙන් මම ඉල්ලීම් කිහිපයක් ලිඛිතව ඉදිරිපත් කරලා තියෙනවා. ඒ වගේම ඔහු අපරාධ නඩු විධාන සංග්රහයේ 127 වගන්තිය යටතේ මහේස්ත්රාත්වරයා ඉදිරියේ ප්රකාශයක් ලබාදීමට ඉල්ලීමක් කරනවා. ඒ පිළිබඳවත් සලකා බලන්න".
ඉදිරිපත් වූ කරුණු සලකා බැලූ කොටුව මහේස්ත්රාත් ඉසුරු නෙත්තිකුමාර මහතා සිය නියෝග ප්රකාශයට පත්කළේය.
"අධිකරණය විමර්ශනය පිළිබඳ සෑහීමකට පත්වෙනවා. තුන්වැනි සැකකරුට එරෙහිව ඉදිරිපත් වී තිබෙන ත්රස්තවාදීන්ට පල්ලි පෙන්වීමේ චෝදනාව ඉදිරියට පවත්වාගෙන යාමට ප්රමාණවත් සාක්ෂි පවතිනවා. නමුත් අනිත් කරුණු සම්බන්ධයෙන් තවදුරත් විමර්ශන සිදුකර කරුණු තහවුරු කළ යුතුයි. ඔප්පු කළ නොහැකි කරුණු ඉදිරිපත් කර වැඩක් නැහැ.තුන්වැනි සැකකරු අපරාධ නඩු විධාන සංග්රහයේ 127 වගන්තිය ප්රකාරව ප්රකාශයක් කිරීමට බලාපොරොත්තුවෙනවා නම් ඒ පිළිබඳ යළි සිතා බලා එම ඉල්ලීම ඉදිරිපත් කරන්න"
ඒ අනුව සැකකාර රාජ්ය බුද්ධි සේවයේ හිටපු අධ්යක්ෂ ජනරාල්වරයා සම්බන්ධයෙන් වූ රැදවුම් නියෝගය තවදුරටත් ක්රියාත්මක බැවින් ඔහු රැඳවුම් භාරයේ තබාගෙන ඉදිරි නඩු දිනයේ යළි අධිකරණයට ඉදිරිපත් කරන්නැයි මහේස්ත්රාත්වරයා අපරාධ පරීක්ෂණ දෙපාර්තමේන්තුවට නියෝග කළේය.
වැඩිදුර විමර්ශන වාර්තා සඳහා නඩුව මැයි 20 වනදා යළි කැඳවීමට නියමිතය.
![පානදුර කළඹමින් හදිසියේ වෙළෙඳසලක ගින්නක් - ගින්න නිවන්න දැඩි උත්සාහයක්[VIDEO]](https://cdn.ibcstack.com/article/c287c3ab-ab26-410f-bf86-0dec0d7dcc1a/26-69e78fc6c8eb6-sm.webp)
![විගණකාධිපති වාර්තාව වැරදියිද? - ඇමති වසන්ත කියපු කතාව මෙන්න [VIDEO]](https://cdn.ibcstack.com/article/d0cbb2bd-841a-460a-9732-1766517790de/26-69e6e15562e9b-sm.webp)
![ගම්මන්පිලගෙන් තවත් ආන්දෝලනයක් - ජනපති සහ බිමල් අතර දරුණු මත ගැටුමක් - බහුතර බලය බිමල්ට[VIDEO]](https://cdn.ibcstack.com/article/fbcf8580-6783-467c-b42f-b2641f8266ee/26-69e6093d7d3a7-sm.webp)
![ජපානය කැළඹෙයි - පළමු සුනාමි රළ පහර ළඟා වෙයි[UPDATE]](https://cdn.ibcstack.com/article/24abaaec-e38a-4dba-a000-676c659fa2c9/26-69e5f1bb8cf98-sm.webp)
![රාගම කළඹපු වයරල් වීඩියෝව නිසා කාන්තාවගේ කොණ්ඩේ බලෙන් කපලා පහර දුන් සැකකරුවන් 5ක් අත්අඩංගුවට[VIDEO]](https://cdn.ibcstack.com/article/9abd3e8e-4364-427f-975e-c8c041dd19f1/26-69e2f3785a20e-sm.webp)
![අ. ඩොලර් 286ක මිලකට බොරතෙල් මිලට ගත්තද? ලංකාවම කළඹපු තෙල් ප්රශ්නෙට සිපෙට්කෝ සභාපති උත්තර දෙයි[VIDEO]](https://cdn.ibcstack.com/article/10ea22ed-9c7f-4f78-821c-47a4ea6809f1/26-69e1e889a8f2f-sm.webp)
![මිනිස්සු හිනස්සපු බන්දු සමරසිංහයි බිංදුයි අලුත් අවුරුද්දේ ප්රේක්ෂකයන් අඬවයි - වීඩියෝව දැකලා බුකියෙම සතුටු කඳුළු නෑවෙයි[VIDEO]](https://cdn.ibcstack.com/article/a4f84293-5dbb-443f-8516-9b3bf3c47794/26-69e1c13b028a9-sm.webp)
![හංගපු ටික එළියට.. ලාල් කාන්තට රු.කෝටි 6.7ක නිෂ්චල දේපොළ වත්කම් ප්රකාශය මෙන්න [VIDEO]](https://cdn.ibcstack.com/article/098641e1-5d14-422a-920e-433811367a1c/26-69e117948ec5a-sm.webp)
![දැන් රටේ ලෝකේ මිනිස්ස්සුන්ට ආගම දහම අමතක වෙලා - මිහින්තලේ හිමිගෙන් ට්රම්ප්ටත් බැනුම් [VIDEO]](https://cdn.ibcstack.com/article/04157636-5d6f-474b-b0b9-0556d5a69155/26-69df81b305008-sm.webp)
![සරසවි සිසුවා රෝහලට යැවූ දරුණු අනතුර [video]](https://cdn.ibcstack.com/article/e8bc9884-9d54-44e6-b7df-55eac907f984/26-69e9b8ce26470-sm.webp)
![ලොවම කතා කළ "ආටෙමිස් II" මෙහෙයුම නිසා ශ්රී ලංකාව ගැන කතාවෙයි කියලා කවුද හිතුවේ - ශ්රී ලාංකිකයෙකුත් මෙහෙයුමට එක් වෙලා[PHOTOS]](https://cdn.ibcstack.com/article/93032634-3e06-4338-8e59-6a526e220c56/26-69e9ad02a2ec7-sm.webp)
