ලෝකයක් ආදරය කළ ශ්‍රීදේවි වෙනුවෙන් හදපු මාලිගාව – ජන්වී කපූර්ගේ කෝටි 65ක නිවසේ සංවේදී කතාව

සශ්‍රීක හරිත උද්‍යානයක්, ශ්‍රීදේවි විසින් සිතුවම් කරන ලද කලා නිර්මාණ සහ හිරු එළියෙන් ආලෝකමත් වන අභ්‍යන්තරය නිසා ජන්වී කපූර්ගේ නිවස සුඛෝපභෝගී මෙන්ම පෞද්ගලික හැඟීමක් ද ඇති කරයි. ජන්වී කපූර්ගේ ඉන්ස්ටග්‍රෑම් ගිණුම ඇගේ සුන්දර නිවසේ ඡායාරූපවලින් නිරන්තරයෙන් පිරී පවතී.

සුදු පැහැති අභ්‍යන්තර සැලසුම්, සුඛෝපභෝගී නිමාවන් සහ අලංකාර ගෘහ භාණ්ඩවලින් සමන්විත එම නිවස කාගේත් අවධානයට ලක්ව තිබේ. ‘බවාල්’ චිත්‍රපටයේ රංගනයෙන් දායක වූ ජන්වී, වර්ග අඩි 8,669කින් යුත් මෙම ද්විත්ව මහල් නිවස මුම්බායිහි බන්ද්‍රා ප්‍රදේශයෙන් 2022 නොවැම්බර් මාසයේදී මිලදී ගත් බව වාර්තා වේ.

පෞද්ගලික උද්‍යානයක් සහ වාහන නැවැත්වීමේ ස්ථාන පහක් ද සහිත මෙම නිවස සඳහා ඇය ඉන්දීය රුපියල් කෝටි 65ක පමණ මුදලක් වැය කර ඇතැයි සඳහන් වේ. 2023 දෙසැම්බර් මාසයේදී Asian Paints සමඟ එක්ව නිවසේ සංචාරයක් සිදු කළ ජන්වී, නිවසේ සැලසුම සඳහා ඇයට ලැබුණු ආභාසය, ඇගේ ප්‍රියතම ස්ථාන සහ මෙම නිවස ඇයට ඇති වැදගත්කම පිළිබඳව අදහස් පළ කළාය.

ජන්වී කපූර්ගේ නිවස ඇතුළත විසිත්ත කාමරය විවෘත සැලසුමකට අනුව සකස් කර ඇති අතර, එහි කිරිගරුඬ බිම් අතුරා තිබේ. ජන්වී පවසන්නේ එම විවෘත අවකාශය විවිධ අංග එකතු කරමින් තමන්ට අවශ්‍ය ආකාරයට නිවස සැලසුම් කිරීමට අවස්ථාව ලබා දුන් බවයි.

එය නව-සම්භාව්‍ය ගෘහ නිර්මාණ ශෛලියේ ප්‍රධාන ලක්ෂණයකි. “අම්මා නැති වුණාට පස්සේ සෑහෙන කාලයක් අපි පවුලක් විදිහට එකට වාඩි වෙන්නේ නැහැ. මොකද එහෙම කළාම අපිට දැනුණු ඒ විශාල හිස්කම මතක් වෙනවා කියලා මම හිතනවා,” යනුවෙන් ඇය සඳහන් කළාය.

"එකම එක ශ්‍රීදේවි විතරයි!": අභාවප්‍රාප්ත සුපිරි නිළියගේ ජන්ම සංවත්සරයේදී ප්‍රියංකා චොප්රා තැබූ සංවේදී සටහන

කෙසේ වෙතත්, ජන්වී තම පවුල සමඟ මෙම නව නිවසට පදිංචියට පැමිණීමෙන් පසු පවුලේ සාමාජිකයන් වඩාත් සමීප වූ බව ඇය පැවසුවාය. “අම්මා කවදාවත් මේ ගෙදරට ඇවිල්ලා නැහැ. ඒත් ඇගේ ශක්තිය හැම තැනකම තියෙනවා වගේ දැනෙනවා.

මොකද ඇය අපි වෙනුවෙන් මේ වගේ දෙයක් කොච්චර ඕනෑ කළාද කියලා මම දන්නවා,” යනුවෙන් ශ්‍රීදේවි සිහිපත් කරමින් ජන්වී පැවසුවාය. නිවසේ විවිධ ස්ථාන කැමරාවෙන් පෙන්වන අවස්ථාවේදී පැරණි පවුලේ ඡායාරූප මෙන්ම ශ්‍රීදේවි සිය චිත්‍රපටවල රඟපෑ අවස්ථාවල ගත් සුන්දර ඡායාරූප ද දැකගත හැකි විය.

නිවසේ ගෘහ ප්‍රවේශ උත්සවයෙන් පසු දින උදෑසන සිදුවීමක් ද ජන්වී සිහිපත් කළාය. එදින ඇගේ පියා වන බෝනි කපූර් ගසින් පිරුණු සුන්දර දසුනක් සහ ජල උල්පතක් දෙස බලා සිටිමින් නිවසේ පිටත බිත්තර සැන්ඩ්විචයක් රස විඳිමින් සිටි ආකාරය ඇය සිහිපත් කළාය. “මගේ මුළු ජීවිතයේම දැකපු සතුටුදායකම දර්ශනවලින් එකක් ඒක කියලා මම හිතනවා... මට මගේ තාත්තාව මේ විදිහට දකින්නයි ඕනේ. ඔහුට ලැබිය යුත්තේ මේකයි. යම් ආකාරයකින් ඔහුට මෙය ලබා දීමට මට හැකි වීම ගැන මම සතුටු වෙනවා,” යනුවෙන් ඇය පැවසුවාය.

භෝජනාගාරය පිළිබඳව අදහස් දක්වමින් ජන්වී පැවසුවේ කාමරයේ මැද පුද්ගලයන් 10 දෙනෙකුට එකවර ආහාර ගැනීමට හැකි මේසයක් තබා ඇති බවයි.

එහි ඇති අලංකාර වීදුරු පහන් අලංකරණය එම අවකාශයට තවත් සුන්දරත්වයක් එක් කරයි. “අපි වැඩිපුරම කෑම කන්නේ මෙතැන. අපි ලොකු පවුලක්, ඒ වගේම කෑමටත් ලොකු කැමැත්තක් තියෙන පවුලක්,” යනුවෙන් ජන්වී පැවසුවායවිවෘත අවකාශය හේතුවෙන් ස්වභාවික ආලෝකය විශාල වශයෙන් නිවසට ලැබෙන අතර, පිටත ඇති සශ්‍රීක හරිත පරිසරය ද බාධාවකින් තොරව දැකගත හැකිය.

මෙම ප්‍රදේශයේ ඇති විශාල ජනේලය බාර් කවුන්ටරය දක්වා විහිදී තිබේ. බිත්ති සඳහා සාපේක්ෂව සිසිල් වර්ණ භාවිත කර ඇති අතර, කලා නිර්මාණ මඟින් එම අවකාශයට උණුසුම් හැඟීමක් එක් කර තිබේ. “තරමක් මධ්‍යස්ථ වර්ණවලින් යුත් මේ අවකාශය නිවසක් වගේ දැනෙන්න හේතුව ඒකයි,” යනුවෙන් ජන්වී පැවසුවාය.

විසිත්ත කාමරයේ කෝපි මේසය වටා සෝෆා සහ පුටු කිහිපයක් සකස් කර ඇති අතර, එමඟින් මිතුරන් සහ පවුලේ සාමාජිකයන් විශාල පිරිසකට සත්කාර කිරීමට ඇයට හැකියාව ලැබේ.

එහි ඇති දැවැන්ත ජනේලය නිසා නිවස සැබෑ ප්‍රමාණයටත් වඩා විශාලව පෙනෙන බව ජන්වී පැවසුවාය. “එය වඩාත් විවෘතයි. වඩාත් ප්‍රාණවත්,” යනුවෙන් ඇය සඳහන් කළාය.

විසිත්ත කාමරයේ එක් බිත්තියක ශ්‍රීදේවි විසින්ම සිතුවම් කරන ලද කලා නිර්මාණයක් දැකගත හැකිය. “ඇය විසින් නිර්මාණය කළ පළමු විශාල සිතුවම් කිහිපයෙන් එකක් මේක,” යනුවෙන් ජන්වී පැවසුවාය. ජන්වී සමඟ නිවසේ සංචාරයට එක් වූ බෝනි කපූර් මෙසේ පැවසීය. “පවුල සතුටින් සිටින තැන තමයි නිවස. මේ වෙලාවේ මට දැනෙන්නේ මගේ දරුවන් සතුටින් ඉන්නවා කියලා.

ඒ වගේම කොහේ හරි ශ්‍රී තවමත් මෙතැන ඉන්නවා කියලා මට දැනෙනවා. මම මේ ගෙදරට ගෘහ භාණ්ඩ සහ අනෙකුත් දේවල් තෝරනකොට ඇයව මගේ මනසේ තියාගෙන තමයි තෝරගත්තේ. ඇය මෙතැන ඉන්නවා.” නිවසේ පිටත ප්‍රදේශය ජන්වීගේ පවුලේ සාමාජිකයන් යෝගා සහ භාවනා කටයුතු සඳහා භාවිත කරයි. “මේක හරිම සුන්දරයි. මොකද මම වතුරේ ශබ්දයට සවන් දෙමින් භාවනා කරන්න කැමතියි,” යනුවෙන් ජන්වී පැවසුවාය.

ඇයට අනුව, ගොඩනැගිල්ලේ කහ පැහැති බාහිර වර්ණය එම පිටත අවකාශයේ උණුසුම් ස්වභාවයට මනාව ගැළපේ. ටෙරාකොටා පැහැති බිත්ති සහ ටයිල් මෙන්ම සශ්‍රීක හරිත වර්ණය ද එම ප්‍රදේශයට ස්වාභාවික පෙනුමක් එක් කරයි. පවුලේ සාමාජිකයන් එකට එක්වන අවස්ථා සඳහා භාවිත කිරීමට එළිමහන් මුළුතැන්ගෙයි කොටසක් ද සකස් කර තිබේ. එය බාර් සහ බාබකියු ස්ථානයක් ලෙස ද භාවිත කළ හැකිය. ‘

Mr & Mrs Mahi’ චිත්‍රපටයේ රංගනයෙන් දායක වූ ජන්වී හෙළි කළේ තමන් එම ප්‍රදේශයේ ක්‍රිකට් පුහුණුවීම් පවා සිදු කළ බවයි. “මම මෙතැන ක්‍රිකට් පුහුණුවීම් කළා. ඒක තාත්තාව ගොඩක් කලබල කළා. මොකද මම ජනේලයක් කඩයි හෝ බිත්තිවලට හානි කරයි කියලා ඔහු බය වුණා.

ඇත්තටම මම ඒ දෙකෙන් එකක් කළා,” යනුවෙන් ඇය සිනාසෙමින් පැවසුවාය. ජන්වී කපූර්ගේ නිදන කාමරය පවුලේ ඡායාරූපවලින් අලංකාර කර ඇති කොරිඩෝවක් හරහා සම්බන්ධ වී තිබේ.

කිසිදු සිතුවමකට ඡායාරූප මඟින් ඇති කරන හැඟීම්බර වටිනාකම ප්‍රතිනිර්මාණය කළ නොහැකි බව ද ජන්වී පැවසුවාය. දෙවැනි මහලේ පිහිටි විසිත්ත කාමරය ශ්‍රීදේවිගේ පැරණි නිවසේ තිබූ විසිත්ත කාමරයට සමාන ආකාරයට සකස් කර තිබේ. “මේ කුෂන් සහ සෝෆාවලින් අපේ පැරණි නිවසේ තිබුණු උණුසුම් හැඟීම මේ අවකාශයට ගෙන එන එකට මම කැමතියි. මේක හැම දෙයකින්ම ටිකක් තියෙන තැනක්,” යනුවෙන් ඇය පැවසුවාය.

ජන්වීගේ නිදන කාමරය බිත්තර කටුවක පැහැයට සමාන මෘදු වර්ණයකින් වර්ණ ගන්වා ඇති අතර, එමඟින් කාමරයට වඩාත් ආරාධනාශීලී හැඟීමක් ලැබෙන බව ඇය සඳහන් කළාය. එහි එක් බිත්තියක් බෝනි කපූර්, ශ්‍රීදේවි, කුෂී, අන්ෂුලා සහ අර්ජුන් ඇතුළු පවුලේ සාමාජිකයන්ගේ ඡායාරූපවලින් සරසා තිබේ.

ලෝකයක් ආදරයෙන් උමතු කළ ශකිරා - උගන්ඩාවේ දරුවන්ට ආදරය දුන් හැටි