වාහන සිහිනය බොඳ වෙයි - නරක ආරංචියක් වාහන ආනයනකරුවන්ගේ සංගමයෙන්

ශ්‍රී ලංකා වාහන ආනයනකරුවන්ගේ සංගමය පවසා ඇත්තේ සමාජ ආරක්ෂණ දායකත්ව බද්ද (SSCL) අයකරන ක්‍රමවේදයේ සංශෝධනයක් මඟින් වාහන ආනයන බදු විශාල ලෙස ඉහළ යා හැකි බවයි.

ඔවුන් වැඩිදුරටත් ප්‍රකාශ කර ඇත්තේ රජය විසින් නව බදු හඳුන්වා නොදෙන බව ප්‍රකාශ කළද, මෙම තාක්ෂණික වෙනස හරහා පාරිභෝගිකයා මත පැටවෙන බදු බර රහසිගතව ඉහළ යන බවයි. වාහන ආනයනකරුවන්ගේ සංගමය මෙම කරුණු පැවසුවේ පසුගිය දිනක නියෝජ්‍ය අමාත්‍ය ආචාර්ය අනිල් ජයන්ත මහතා විසින් කල ප්‍රකාශයට ප්‍රතිචාර ලෙසයි.

වාහන මිල වැඩි වෙන්නේ නැහැ රැවටෙන්න එපා - වාහනේ විකුණගන්න බය කරනවා - වාහන මිල අඩු වෙන බව ඇමති කියයි

වත්මන් ක්‍රමය යටතේ 2.5%ක් වන සමාජ ආරක්ෂණ දායකත්ව බද්ද අදාළ වන්නේ පිරිවැටුමෙන් 50%ක් සඳහා පමණක් වන අතර එය ප්‍රායෝගිකව අයවන්නේ 1.25%ක බද්දකි.

එහෙත් නව යෝජනාව අනුව බද්ද අයකරන අවස්ථාව විකුණුම් මට්ටමේ සිට රේගු මට්ටම දක්වා වෙනස් වන අතර පිරිවැටුමෙන් 100%ක් සඳහාම 2.5%ක පූර්ණ බද්ද අය කෙරෙන බව වාර්තා වේ.

එමෙන්ම වඩාත් තීරණාත්මක කරුණ වන්නේ, මෙම 2.5% බද්ද එකතු කළ අගය මත පදනම්ව 18%ක එකතු කළ අගය මත බද්ද (VAT) ගණනය කිරීම බවත් මෙම සංශෝධනය මහජනයාට වටහාගත නොහැකි ආකාරයේ සංකීර්ණ බදු වැඩිකිරීමක් බව ආනයනකරුවන්ගේ සංගමය පවසයි.

ශ්‍රී ලංකාවේ වාහන මිල ඉහළට - ජපානයේ වැඩ වලින් ලංකාවට වාහන හීනය අහිමිවෙයිද?

ඔවුන් වැඩිදුරටත් පවසා සිටින්නේ පෞද්ගලිකව වාහන ආනයනය කරන්නන් බදු පැහැර හැරීම වැළැක්වීම සඳහා මෙම බද්ද රේගුවේදී අයකරන ලෙස තමන් මීට පෙර යෝජනා කළද, එහිදී බදු ප්‍රතිශතයන් නොවෙනස්ව තැබීම අපේක්ෂා කළ බවයි. නියෝජ්‍ය අමාත්‍ය ආචාර්ය අනිල් ජයන්ත මහතා මෑතකදී මාධ්‍ය වෙත ප්‍රකාශ කළේ රජය සිදුකරන්නේ බදු අයකරන ස්ථානය (Point of collection) වෙනස් කිරීම පමණක් බවයි.

නව බදු පැනවීමක් පිළිබඳ කෙරෙන ප්‍රකාශ පාරිභෝගිකයන් බිය ගැන්වීම සඳහා අලෙවිකරුවන් විසින් ගෙන යන "මුළා කරන සුළු උපක්‍රමයක්" බවද ඔහු පැවසීය. කෙසේ වෙතත්, 2026 අප්‍රේල් 1 වන දින සිට ක්‍රියාත්මක වීමට නියමිත මෙම නව බදු එකතු කිරීමේ ක්‍රමය හේතුවෙන් වාහන සඳහා ගෙවිය යුතු සමස්ත රේගු ගාස්තුව අපේක්ෂිත මට්ටමට වඩා බෙහෙවින් ඉහළ යනු ඇතැයි කර්මාන්ත ක්ෂේත්‍රයේ නියෝජිතයෝ අනතුරු අඟවති. මෙය අවසානයේදී වාහන මිල ඉහළ යාමට සෘජුවම බලපානු ඇත.