සිරියාවෙන් ඇසෙන ලාංකිකයකුගේ කඳුළු කතාව..
Piyumika
ක්‍රෑර වධ හිංසනයට ලක් ව සිරියාවේ ගෘහ සේවයේ නිරත කාන්තාවක් පිළිබඳ ව තොරතුරු වාර්තා වී තිබේ .
මෙම කාන්තාව සිරියාවේ සේවය කරන නිවසෙහි හාම්පුතුන් ඇයට ලිංගික අඩත්තේට්ටම් මෙන් ම, අමානුෂික ලෙස පහරදීම් සිදු කරන බවටයි ඇය පවසා සිටිනුයේ.
අදාළ සිද්ධියට මුහුණ පා ඇත්තේ කුරුණෑගල දඹදෙණියේ පදිංචි තුෂාරිකා කල්දේරා නමැති 34 හැවිරිදි අවිවාහක කාන්තාවකි.
ඇය මීට වසරකුත් මාස 09කට ඉහත දී ගෘහ සේවයේ රැකියාවක් සඳහා ඩුබායි රාජ්‍යය වෙත පිටත් ව ගොස් තිබෙනවා.
ඩුබායි රාජ්‍යයේ නිවසක ඇය වසරකුත් මාස 09ක කාලයක් ඉතාමත් ම හොඳින් ආරක්ෂිත ජීවිතයක් ගත කර ඇති බවයි පැවසෙන්නේ.ඇයට එම ඩුබායි නිවසෙහි හාම් පුතුන් විසින් ඉතාමත් කාරුණික අයුරින් සලකා තිබෙනවා.
එහෙත් හදිසියේ ම එම හාම් පුතුන් වෙනත් රටකට පදිංචියට යාම හේතුවෙන් ඇයට යළිත් ශ්‍රී ලංකාවට පැමිණීමට අවශ්‍ය ගුවන් ටිකට් පතත් ඩුබායි නිවැසියන් විසින් ලබා දී ඇති අතර ඔවුන් රටින් යාමට පෙර තුෂාරිකාව ඇයගේ රැකියා ඒජන්සියට භාර දී ඇති බවයි පැවසෙනුයේ.
ගුවන් මගී ටිකට් පතකුත් මෙම කාන්තාවට හිමි ව තිබියදීත්, එම රැකියා ඒජන්සිය විසින් ඇයව සිරියාවේ නිවසක ගෘහ සේවයට විකුණා තිබේ .
මේ වනවිට ඇය සිරියාවේ නිවසක ගෘහ සේවයේ කටයුතු සිදු කරන අතර, මාස ගණනාවක වැටුප් රහිතව ඇය දැඩි හිංසනයන් මැද ජීවත් වන බවයි වාර්තා වනුයේ.
ඇතැම් අවස්ථාවල දී හාම් පුතුන් විසින් ඇයට රබර් බටවලින් පහර දෙන බවත් එම පහරදීම් නිසා තැලුම් පහර සිරුරෙහි සෑම තැනකම පාහේ ඇති බව ද පහරකෑම්වලට නතු වූ තුෂාරිකා පවසා සිටියාය.
තමන් වැටුප් සම්බන්ධයෙන් විමසීම් සිදු කරන විට නිවසෙහි ගෙහිමියන් තමන්ගේ හිසට දරුණු ලෙසට පහර දෙන බවයි ඇය සඳහන් කර සිටිනුයේ.
මේ හේතුවෙන් තුෂාරිකා ශ්‍රී ලංකා රජයෙන් ඉල්ලා සිටින්නේ තමන්ව කෙසේ හෝ යළි මව්බිමට ගෙන්වා ගැනීමට කටයුතු කරන ලෙසටයි.
