භාවනානුයෝගී හිමිනමකට පොලු මුගුරුවලින් පහර දෙයි
Mithu
ඓතිහාසික දිඹුලාගල ආරණ්‍ය සේනාසනයට අනුබද්ධිත කොස්ගහල්පත පිරිනිවන් මංචකය අසල භාවනානුයෝගීව සිටි භික්ෂුන් වහන්සේ නමකට පොලු මුගුරු සහ අතින් පයින් පහරදුන් බව කියන සැකකරුවන් සිවුදෙෙකු 03 වැනිදා සවස අත්අඩංගුවට ගත් බව මනම්පිටිය පොලිසිය කියයි. පහර කෑමට ලක්ව ඇත්තේ භාවනානුයෝගීව වැඩ වාසය කළ ත්‍රිකුණාමලයේ සිරි ධම්මාලංකාර නාහිමියන් බව පරීක්ෂණ සිදු කරන මනම්පිටිය පොලිසිය කියයි.
තුවාලලත් භික්ෂුන් වහන්සේ මේ වනවිට පොළොන්නරුව මහ රෝහලේ දෙවන වාට්ටුවේ ප්‍රතිකාර ලබමින් සිටින බවද ඒ සම්බන්ධ පරීක්ෂණ පවත්වන මනම්පිටිය පොලිසිය සඳහන් කරයි. කොස්ගහඋල්පත ආසන්නයේ භාවනා කරන ස්ථානයට කිලෝමීටර් කිහිපයක් නුදුරින් ගල් වළක් පවත්වාගෙන යන පුද්ගලයකුට අවස්ථා කිහිපයකදී, ගල්බෝර දැමීම තම භාවනාවට බාධාවක් බවට පවසා හිමියන් විරෝධය පෑම මෙම පහරදීමට හේතු වී ඇති බවට සැකකරන බවද පොලිසිය පවසයි.
පොළොන්නරුව ජ්‍යෙෂ්ඨ පොලිස් අධිකාරි නිශාන් ද සිල්වා මහතාගේ උපදෙස් මත, වැලිකන්ද ප්‍රදේශය භාර සහකාර පොලිස් අධිකාරි එම්.එස්.එම්. ජරූල් මහතාගේ මෙහෙයවීමෙන් මනම්පිටිය පොලිස් ස්ථානාධිපති පොලිස් පරීක්ෂක අසේල සරත් කුමාර මහතා ඇතුළු පොලිස් නිලධාරි කණ්ඩායමක් මේ පිළිබඳ වැඩිදුර පරීක්ෂණ සිදුකරයි. අත්අඩංගුවටගත් සැකකරුවන් 04 වැනිදා පොළොන්නරුව මහෙස්ත්‍රාත් අධිකරණයට ඉදිරිපත් කිරීමට නියමිත බව මනම්පිටිය පොලිසිය සඳහන් කරයි.
