අතිවිශාලම බහලුම් නෞකාවක් කොළඹ වරායට

ශ්‍රී ලාංකේය සමුද්‍රිය ඉතිහාසයේ සන්ධිස්ථානයකට එළඹෙමින් ලොව විශාලතම බහලුම් නෞකාවක් වන MSC MARIELLA නෞකාව කොළඹ වරායේ නැගෙනහිර ජාත්‍යන්තර බහලු පර්යන්තය වෙත මෙහෙයුම් කටයුතු සඳහා ලඟා වී තිබේ.

ඒ අනුව ශ්‍රී ලංකාවේ බහලු පර්යන්තයකට පැමිණි විශාලතම බහලුම් නෞකාව ලෙසින් මෙම නෞකාව හැඳින්විය හැකි බව ශ්‍රී ලංකා වරාය අධිකාරිය පවසයි.

කොළඹ වරාය සමුද්‍රීය කලාපයේ ප්‍රධාන කේන්ද්‍රීය වරාය බවට පත්වෙමින් ලෝකයේ විශාලතම බහලුම් නෞකා මෙහෙයවීමේ හැකියාව මෙම MSC MARIELLA නෞකාව පැමිණීමෙන් තහවුරු වන බව ශ්‍රී ලංකා වරාය අධිකාරිය දැනුම් දෙයි.

2023 වර්ෂයේ දී ඉදිකරන ලද MSC MARIELLA බහලුම් නෞකාව දිගින් මීටර් 399.90 කින් යුතුය.

නෞකාවේ පළල මීටර් 61.30කි. ටොන් 240739.0 ක ධාරිතාවයකින් සමන්විත ය.

නෞකාවේ රැගෙන යා හැකි බහලුම් ධාරිතාව 24,24කි. මෙම නෞකාව ශ්‍රී ලංකා වරාය අධිකාරියට අයත් නැගෙනහිර ජාත්‍යන්තර බහලුම් පර්යන්තය වෙත පැමිණීම තුළ නැගෙනහිර පර්යන්තය සතු අතිවිශාල බහලුම් නෞකා මෙහෙයවීමේ ශක්‍යතාවය තහවුරු වේ.

මේ වන විට නැගෙනහිර බහලුම් පර්යන්තය සතුව ඉතා දියුණු තාක්ෂණික ක්‍රමෝපායන්ගෙන් සමන්විත (STS) ග්‍රැන්ටි දොඹකර සමූහය තුළින් කාර්යක්‍ෂමව සහ ආරක්ෂිතව බහලුම් මෙහෙයුම් සිදුකිරීමට අවකාශය සලසා තිබේ.

එය දියුණු යටිතල පහසුකම් සංවර්ධනය සඳහා ශ්‍රී ලංකා වරාය අධිකාරිය සතු ශක්‍යතාව හා කැපවීම යළිත් තහවුරු කිරීමකි.   

අවන්හලක ඇති වූ ගින්නකින් - 22ක ජීවිතක්ෂයට

චීන පටස් හැපූ වෛද්‍යවරියගේ අලුත්ම තත්ත්වය