මැදපෙරදිග යළිත් උණුසුම් කරමින් - ඇමරිකාව ඉරානයට ප්‍රබල ප්‍රහාර මාලාවක් අරඹයි

මැදපෙරදිග කලාපයේ ඇමරිකානු හමුදා ඉලක්ක කර ගනිමින් සිදු කළ බව පැවසෙන ප්‍රහාරයකට ප්‍රතිචාර ලෙස ඉරානයට එරෙහිව ප්‍රබල ප්‍රහාර ආරම්භ කළ බව එක්සත් ජනපද හමුදාව ප්‍රකාශ කර තිබේ.

එක්සත් ජනපද මධ්‍යම විධානය (CENTCOM) නිවේදනය කළේ, අඟහරුවාදා ජෝර්දානයේ පිහිටි ඇමරිකානු හමුදා කඳවුරු සහ හෝර්මුස් සමුද්‍ර සන්ධියේ නාවික යාත්‍රා ඉලක්ක කරමින් ඉරානය එල්ල කළ ප්‍රහාරවලට ප්‍රතිචාරයක් ලෙස මෙම මෙහෙයුම් ක්‍රියාත්මක කරන බවයි.

එම ප්‍රහාර "ප්‍රබල ප්‍රතිචාරයක්" ලෙසද CENTCOM සඳහන් කළේය. මෙම නව ප්‍රහාර මාලාව සිදුවන්නේ, ඉරාකයේ ඉරානයට අනුබද්ධ සන්නද්ධ කණ්ඩායම් ඉලක්ක කර ගනිමින් එක්සත් ජනපදය සහ සෞදි අරාබිය එක්ව සිදු කළ බව ප්‍රකාශයට පත් කළ පළමු ඒකාබද්ධ ප්‍රහාරයෙන් දිනක් ගතවීමත් සමඟය.

අමෙරිකා - සවුදි පළි ගැනීමේ ගින්නෙන් ඉරාකය ලේ විලක් වෙයි - ප්‍රහාරවලින් හමුදාවේ 20 දෙනෙක් ජීවිතක්ෂයට

පසුගිය පෙබරවාරි මාසයේදී එක්සත් ජනපදය සහ ඊශ්‍රායලය ඉරානයට එරෙහිව හමුදා මෙහෙයුම් ආරම්භ කළ අවස්ථාවේදී, ඇමරිකානු ජනාධිපති ඩොනල්ඩ් ට්‍රම්ප් මෙම ගැටුම සති කිහිපයකින් අවසන් වනු ඇතැයි ප්‍රකාශ කළද, මේ වන විට එය මාස පහක් පුරා අඛණ්ඩව පැවතෙමින් තිබේ.

Axios පුවත් සේවය නම් හෙළි නොකළ ඇමරිකානු නිලධාරියෙකු උපුටා දක්වමින් වාර්තා කළේ, ට්‍රම්ප් සෞදි ආරක්ෂක අමාත්‍ය කුමරු කලීඩ් බින් සල්මාන් හමුවී ඇති අතර, කලාපීය ආතතිය අවම කිරීමට සෞදි අරාබිය කැමැත්ත පළ කර ඇති බව එහිදී දැනුම් දී ඇති බවයි

මේ සම්බන්ධයෙන් BBC මාධ්‍යවේදීන් ධවල මන්දිරයෙන්ද අදහස් විමසා ඇත. දින කිහිපයක සාපේක්ෂ සන්සුන් තත්ත්වයකින් පසුව මෙම ගැටුම නැවතත් උත්සන්න වී තිබේ.

රාජ්‍යතාන්ත්‍රික විසඳුමක් සොයා ගැනීමේ අරමුණින් සාකච්ඡා යළි ආරම්භ වී ඇති බවට වාර්තා වීමත් සමඟ දෙපාර්ශ්වයම තාවකාලිකව ප්‍රහාර නතර කර තිබුණි. ට්‍රම්ප් එම සාකච්ඡා "ඉතා මිත්‍රශීලී" ලෙස හැඳින්වූ අතර, ටෙහෙරානය එවැනි සාකච්ඡා පැවැත්වෙන බව ප්‍රතික්ෂේප කළේය.

බදාදා ප්‍රහාර ආරම්භ කිරීමට පැය කිහිපයකට පෙර, ඇමරිකානු හමුදා ඉලක්ක කර ගනිමින් සිදු කළ බව පැවසෙන ප්‍රහාරයට ඉරානයට දැඩි ප්‍රතිචාරයක් දක්වන බව ට්‍රම්ප් ප්‍රකාශ කර තිබුණි.

ඉරාන ඉස්ලාමීය විප්ලවීය ආරක්ෂක බලකාය (IRGC) නිවේදනය කළේ, ඇමරිකානු "ආක්‍රමණශීලී ක්‍රියාකාරකම්වලට" ප්‍රතිචාර ලෙස ජෝර්දානයේ පිහිටි ඇමරිකානු ගුවන් හමුදා කඳවුරක් සහ විධාන මධ්‍යස්ථානයක් ඉලක්ක කළ බවයි.

එමෙන්ම, අනතුරු ඇඟවීම් නොතකා හෝර්මුස් සමුද්‍ර සන්ධිය හරහා ගමන් කළ බව පවසමින් තෙල් නෞකා තුනකට නාවික ප්‍රහාර එල්ල කළ බවද IRGC ප්‍රකාශ කළේය.

පසුගිය සිකුරාදා, අඛණ්ඩව දින 13ක් පැවති දැඩි බෝම්බ ප්‍රහාර මෙහෙයුම ට්‍රම්ප් අත්හිටුවා තිබුණි. එම මෙහෙයුම්වලදී ඉරාන ආයුධ ගබඩා සහ හමුදා ඉලක්ක වෙත ප්‍රහාර එල්ල කළ බව එක්සත් ජනපදය සඳහන් කළ අතර, එම ප්‍රහාරවලින් විශාල පිරිසක් මියගිය බවද වාර්තා විය.

CENTCOM පවසන පරිදි, පසුගිය පැය 72 තුළ IRGC මඟින් මෙහෙයවූ ඩ්‍රෝන ප්‍රහාර 30කට වැඩි සංඛ්‍යාවකට ප්‍රතිචාර ලෙස, නැගෙනහිර ඉරාකයේ පිහිටි අවි ගබඩා සහ සැපයුම් මධ්‍යස්ථාන රැසකට එක්සත් ජනපදය සහ සෞදි අරාබිය ඒකාබද්ධව ප්‍රහාර එල්ල කර තිබේ.

ඉරානයට සහාය දක්වන ෂියා සන්නද්ධ කණ්ඩායම් ප්‍රමුඛ ඉරාකයේ ජනතා සංවිධාන හමුදා (PMF) ප්‍රකාශ කළේ, එම ප්‍රහාරවලින් තම සාමාජිකයන් අවම වශයෙන් 20 දෙනෙකු ජීවිතක්ෂයට පත්ව ඇති බවයි.

මේ අතර, PMF කඳවුරු ඉලක්ක කර ගනිමින් සිදු කළ ප්‍රහාර ඉරාකයේ ස්වෛරීභාවය බරපතළ ලෙස උල්ලංඝනය කරන පිළිගත නොහැකි ක්‍රියාවක් බව ඉරාක ජනාධිපති කාර්යාලය නිවේදනය කර තිබේ.

ඉරානය සමඟ මේ වන විට ඉතා මිත්‍රශීලී මට්ටමේ සාකච්ඡා සිදු වෙනවා - ඩොනල්ඩ් ට්‍රම්ප්