මඩකලපුවේ හෝටල් කාමරයක ගින්නක් - දරුවන් දෙදෙනෙකු මිය යයි

මඩකලපුව නගරයේ පිහිටි ලැගුම්හල් කාමරයක් තුළ අද (27) හදිසියේ හටගත් ගින්නකින් පිටවූ අධික විෂ දුමාරය ආග්‍රහණය වීම හේතුවෙන්, එකම පවුලේ කුඩා බෝලතැටි දරුවන් දෙදෙනෙකු අවාසනාවන්ත ලෙස මෙලොව හැරගොස් තිබේ.

මෙම සිදුවීමෙන් අකාලයේ ජීවිතක්ෂයට පත්ව ඇත්තේ 3 හැවිරිදි පිරිමි දරුවෙකු සහ 5 හැවිරිදි ගැහැණු දරුවෙකි.

මියගිය දරුවන් දෙදෙනා සහ ඔවුන්ගේ පියා බදුල්ල ප්‍රදේශයේ පදිංචිකරුවන් වන අතර, ඔවුන් මඩකලපුවට පැමිණ ඇත්තේ එහි ශික්ෂණ රෝහලේ නේවාසිකව පිළිකා රෝගයට ප්‍රතිකාර ලබමින් සිටින තම ආදරණීය මව බැලීම සඳහාය.

නැවතත් ඉන්ධන මිල සංශෝධනයක් - දිනය මෙන්න - සිපෙට්කෝ වෙතින් දැනුම්දීමක්

රෝහලට ආසන්න මෙම හෝටල් කාමරයේ තාවකාලිකව නැවතී සිටි අවස්ථාවේදී, පියා විසින් දරුවන් දෙදෙනා පමණක් කාමරය තුළ රඳවා එහි දොර පිටතින් අගුළු දමා කෙටි වේලාවකට පිටතට ගොස් ඇත.

පොලිස් පරීක්ෂණවලට අනුව, පියා නොමැති අතරතුර දරුවන් දෙදෙනා ලයිටරයක් උපයෝගී කරගනිමින් සෙල්ලම් කර ඇති අතර, එහිදී කාමරයේ තිබූ ඇඳක් මතට හදිසියේම ගිනි ඇවිලී තිබේ.

ගින්න ශීඝ්‍රයෙන් පැතිර යද්දී දැඩි ලෙස බියට පත් වූ අසරණ කුඩා දරුවන් දෙදෙනා, බේරීම සඳහා ගිනි නොගත් අනෙක් ඇඳ යටට රිංගා සැඟවී ඇත.

කාමරයෙන් අධික ලෙස කළු දුමක් පිටවන අයුරු දැක වහාම ක්‍රියාත්මක වූ හෝටල් සේවකයන් සහ අවට සිටි පිරිස් බලහත්කාරයෙන් දොර කඩා ඇතුළට වැදී තිබේ.

ඒ වන විටත් කාමරය පුරා පිරී තිබූ ප්‍රබල දුමාරය හේතුවෙන් දරුවන් දෙදෙනා ඇඳ යට සිහිසුන්ව වැතිර සිට ඇත.

TIN අංක වංචාවක් - ව්‍යාපාරිකයෙකුට දඩ

ඔවුන්ව කඩිනමින් මඩකලපුව රෝහලට රැගෙන යාමට පියවර ගත්ත ද, රෝහලට ඇතුළත් කරන විටත් දරුවන් දෙදෙනාම අවසන් හුස්ම හෙළා තිබුණි.

මෙම හද කම්පා කරවන ඛේදවාචකය සම්බන්ධයෙන් මඩකලපුව පොලිසිය පුළුල් විමර්ශනයක් අරඹා ඇත.