රටම කතා කළ අනෝජන්ගේ ජීවිතය මානුෂීය හේතූන් මත බේරාගන්න - ශ්‍රී ලංකා රජයෙන් සහ සෞදි නායකත්වයෙන් මාධ්‍ය බලවේග හදිසි ආයාචනයක

ශ්‍රී ලාංකික මාධ්‍ය සංවිධාන පහක් එක්ව සෞදි අරාබියේ නායකත්වයෙන් ඉල්ලා ඇත්තේ ශ්‍රී ලාංකික ජාතික සිවරාසා අනෝජන්ට සමාව ලබාදී, මානුෂීය හේතූන් මත ඔහුගේ ජීවිතය ආරක්ෂා කරන ලෙසයි.

සැප්තැම්බර් 22 දින නිකුත් කළ ඒකාබද්ධ ප්‍රකාශයක් මගින්, අනෝජන්ගේ නඩුව සෞදි අරාබියේ පවතින අධිකරණ ක්‍රියාවලිය හරහා ඉදිරියට යන අවස්ථාවේදී දයාව සහ අනුකම්පාව දක්වන ලෙස ශුද්ධ මුස්ලිම් පල්ලි දෙකේ භාරකරු ඇතුළු සෞදි නායකත්වයෙන් එම සංවිධාන ඉල්ලා තිබේ.

සෞදි අරාබියේ අධිකරණ ක්‍රියාවලියට තමන් සම්පූර්ණයෙන් ගරු කරන බව සඳහන් කරන එම සංවිධාන, මෙම නඩුවට ගැඹුරු මානුෂීය පැතිකඩක් ද ඇති බව පෙන්වා දෙයි. සිංහල, දෙමළ සහ මුස්ලිම් ප්‍රජාවන් නියෝජනය කරන මාධ්‍ය සංවිධාන ලෙස, සියලු ආගම්වලට ගරු කිරීම, ආගමික සහජීවනය, වගකිවයුතු ප්‍රකාශනය සහ සාමකාමී සහජීවනය වෙනුවෙන් තමන්ගේ පොදු කැපවීම ද එම ප්‍රකාශයෙන් යළි අවධාරණය කර තිබේ.

ඉස්ලාමයේ දයාව, සමාව, පසුතැවීම සහ අනුකම්පාවට ලබාදෙන වැදගත්කම ද ඔවුන් සිහිපත් කර ඇත. මේ අතර, අනෝජන්ගේ නඩුව සම්බන්ධයෙන් ඉහළම මට්ටමින් රාජ්‍ය තාන්ත්‍රික මැදිහත්වීම් අඛණ්ඩව සිදුකරන ලෙසත්, දයානුකම්පිත විසඳුමක් සඳහා පවතින සියලු නීතිමය හා මානුෂීය මාර්ග භාවිත කරන ලෙසත් ශ්‍රී ලංකා රජයෙන් එම සංවිධාන ඉල්ලා ඇත.

අනෝජන්ගේ නඩුව සමීපව නිරීක්ෂණය කරමින් සිටින බවත්, රාජ්‍ය තාන්ත්‍රික මාර්ග ඔස්සේ සෞදි බලධාරීන් සමඟ සම්බන්ධ වී සිටින බවත් ශ්‍රී ලංකා විදේශ කටයුතු අමාත්‍යාංශය තහවුරු කර ඇති බවද ප්‍රකාශයේ සඳහන් වේ.

අනෝජන්ට සමාව ලබාදීම ශ්‍රී ලංකා ජනතාව විසින් මහත් අගය කිරීමකට ලක්වනු ඇති බවත්, එය දෙරට අතර පවතින දිගුකාලීන මිත්‍රත්වය තවදුරටත් ශක්තිමත් කරනු ඇති බවත් එම සංවිධාන පවසයි.

“ශ්‍රී ලාංකික පුරවැසියෙකුගේ ජීවිතය අවදානමට ලක්ව ඇති අවස්ථාවක, ඔහුගේ ජීවිතය ආරක්ෂා කර ගැනීමටත්, ඔහුගේ පවුල වෙත ආරක්ෂිතව නැවත පැමිණීමට අවස්ථාව සලසා දීමටත් හැකි සෑම උත්සාහයක්ම ගත යුතු බව” ඔවුන් අවධාරණය කර ඇත.

මෙම ඒකාබද්ධ ආයාචනයට නිදහස් මාධ්‍ය ව්‍යාපාරය, දකුණු ආසියානු මාධ්‍ය කාන්තා, ශ්‍රී ලංකා වැඩ කරන මාධ්‍යවේදීන්ගේ සංගමය, දෙමළ මාධ්‍ය සන්ධානය සහ ශ්‍රී ලංකා මුස්ලිම් මාධ්‍ය සංසදය එක්ව තිබේ.

මුළු රටම වෙහෙසන අනෝජන්ව බේර ගන්න ජනපතිත් පෙරට - විශේෂ සාකච්ඡාවක්

ඉදිරි පැය 36 තුළ නිරිතදිග ප්‍රදේශවලට තද වැසි සහ සුළං - කාලගුණ විද්‍යා දෙපාර්තමේන්තුවෙන් හදිසි අනාවැකියක්