කේරල ගංජා සඟවා පොලිස් අණ නොතැකූ මෝටර් රථයට වෙඩි

මාලඹේ පොලිස් වසමේ, හෝකන්දර, විස්කම් මාවත ප්‍රදේශයේ දී පොලිස් අණ නොතකා ධාවනය වූ මෝටර් රථයකට පොලිසියෙන් වෙඩි ප්‍රහාරයක් එල්ල කර තිබේ.

ඊයේ (23) රාත්‍රියේ මාලඹේ පොලිස් ස්ථානයේ නිලධාරීන් කණ්ඩායමක් විසින් ලද තොරතුරක් මත වැටලීමක් සිදුකරන අතරතුර මෝටර් රථයක් නැවැත්වීමට සංඥා කර ඇත.

එහිදී අදාළ මෝටර් රථය එක්වරම පිටුපසට ධාවනය කර ඇති බවත්, එම අවස්ථාවේ පොලිස් නිලධාරියෙකු විසින් මෝටර් රථයේ රෝදයකට වෙඩි තබා ඇති බවත් පොලිසිය සඳහන් කරයි.

එහිදී මෝටර් රථය අසල විදුලි කණුවක ගැටී නතර වී ඇති අතර, අනතුරව පොලිස් නිලධාරීන් විසින් සිදුකළ පරීක්ෂාවේ දී රියදුරු අසුන යට සඟවා තිබූ කේරළ ගංජා කිලෝ 01 ග්‍රෑම් 800ක් සොයා ගැනීමට පොලිසිය සමත් වී තිබේ.

එම මත්ද්‍රව්‍ය ප්‍රවාහනය කළ අවුරුදු 30ක් වූ සැකකරු හා 33 හැවිරිදි සැකකාරිය පසුව අත්අඩංගුවට ගෙන තිබෙන අතර ඔවුන් දෙල්ගොඩ ප්‍රදේශයේ පදිංචි අඹුසැමි යුවළක් බව පොලිසිය සඳහන් කරයි.

සිදුකළ වැඩිදුර විමර්ශනයේදී සැකකරුවන් පදිංචිව සිටින නිවසේ තිබී තවත් කේරළ ගංජා කිලෝ 01ක් පමණ ප්‍රමාණයක් හා ජාවාරම සඳහා යොදා ගත් තරාදියක් සොයාගෙන ඇති අතර මාලඹේ පොලිසිය වැඩිදුර විමර්ශන සිදුකරනු ලබයි. 

දේශබන්දුට තවත් නඩුවක්!!!

වව්නියාවේදී යතුරු පැදියක් හා මෝටර් රථයක් මුහුණට මුහුණ ගැටේ