තායිලන්තයත් හොල්ලමින් ඉන්දියානුවන්ගේ අංක එකේ ‘වෙඩින්’ සිහිනය ලංකාව වෙයි -වැඩිම ඉල්ලුමක් තියෙන හෝටල් 4 මෙන්න

2025 වසරේදී ඉන්දියානු ගමනාන්ත විවාහ සඳහා වේගයෙන්ම ජනප්‍රියත්වය වර්ධනය වූ විදේශීය ගමනාන්තය ලෙස ශ්‍රී ලංකාව ඉදිරියට පැමිණ ඇති අතර, එහි ඉල්ලුම සියයට 25කින් ඉහළ ගොස් ඇති බව WedMeGood ආයතනයේ Destination Wedding Report 2026 වාර්තාව අනාවරණය කරයි.

වාර්තාවට අනුව, ඉන්දියාවට සමීප භූගෝලීය පිහිටීම, පහසු ප්‍රවේශය, සුඛෝපභෝගී ආගන්තුක සත්කාර පහසුකම් සහ අත්දැකීම් පදනම් කරගත් විවාහ සැමරුම් ශ්‍රී ලංකාව ඉන්දියානු ජෝඩු අතර ආකර්ෂණීය ගමනාන්තයක් බවට පත් කර තිබේ.

ඉදිරි වසර කිහිපය තුළ ශ්‍රී ලංකාව සඳහා ඉන්දියානු ගමනාන්ත විවාහ වෙන්කරවා ගැනීම් වාර්ෂිකව සියයට 20 සිට 25 දක්වා වර්ධනය වනු ඇතැයි ද එම වාර්තාව පුරෝකථනය කරයි.

2025 වසරේ ඉන්දියානු ජෝඩු අතර වැඩිම ඉල්ලුමක් පැවති ශ්‍රී ලංකාවේ විවාහ ස්ථාන ලෙස ෂැන්ග්‍රි-ලා හම්බන්තොට, ෂැන්ග්‍රි-ලා කොළඹ, අමායා හිල්ස් මහනුවර සහ ජෙට්වින් ලැගූන් මීගමුව නම් කර තිබේ.

කෙසේ වෙතත්, සමස්තයක් ලෙස ඉන්දියානු ජෝඩු අතර වඩාත් ජනප්‍රිය ජාත්‍යන්තර විවාහ ගමනාන්තය ලෙස තායිලන්තය පළමු ස්ථානය රැකගෙන ඇති අතර, 2025දී එරටට ඉන්දියානු සංචාරකයින් ලක්ෂ 25කට ආසන්න සංඛ්‍යාවක් පැමිණ ඇති බවත්, එය පෙර වසරට සාපේක්ෂව සියයට 16ක වර්ධනයක් බවත් වාර්තාව පෙන්වා දෙයි.

වාර්තාවට අනුව, 2025 වසරේදී සිදු වූ සෑම විවාහ හතරකින් එකක්ම ගමනාන්ත විවාහයක් වූ අතර, එම ප්‍රතිශතය 2028 වන විට සියයට 30-32 දක්වා ඉහළ යනු ඇතැයි අපේක්ෂා කෙරේ.

මෙම අධ්‍යයනය WedMeGood ආයතනය විසින් පාරිභෝගිකයන් ලක්ෂ 2.5කට අධික පිරිසක් සහ විවාහ කර්මාන්තයට අදාළ වෘත්තිකයන් හා වෙළෙන්දන් 24,000කට ආසන්න පිරිසක් සම්බන්ධ කරගෙන සිදුකර ඇත.

විවාහ වියදම්ද 2025 වසරේදී සැලකිය යුතු ලෙස ඉහළ ගොස් ඇති අතර, දේශීය ගමනාන්ත විවාහයක සාමාන්‍ය අයවැය ඉන්දීය රුපියල් ලක්ෂ 58ක් දක්වාත්, ජාත්‍යන්තර ගමනාන්ත විවාහයක සාමාන්‍ය අයවැය ඉන්දීය රුපියල් කෝටි 1.5ක් දක්වාත් ඉහළ ගොස් තිබේ.

එසේම, 2020ට පෙර සාමාන්‍යයෙන් දින 1.8ක් පැවති ගමනාන්ත විවාහ උත්සව මේ වන විට දින 3.2ක සාමාන්‍ය කාලයක් දක්වා දීර්ඝ වී ඇති බවත්, විදේශීය ගමනාන්තවල පවා ඉන්දියානු ආහාර සඳහා වැඩි ඉල්ලුමක් පවතින බවත් වාර්තාව සඳහන් කරයි.

වාහන මිල යලිත් වෙනස් වෙයිද? 50% බද්දට වෙන්න යන දේ මෙන්න

ෂැන්ග්‍රි-ලා කොළඹ සහ හම්බන්තොට හෝටල්වල සන්නිවේදන කලාප අධ්‍යක්ෂ චෙරන්කා මෙන්ඩිස් පැවසුවේ, කෙටි දුර සුඛෝපභෝගී විවාහ ගමනාන්තයක් ලෙස ශ්‍රී ලංකාව ඉන්දියානු ජෝඩු අතර වේගයෙන් ජනප්‍රිය වෙමින් පවතින බවයි.

ඇය වැඩිදුරටත් සඳහන් කළේ, ශ්‍රී ලංකා සංචාරක සංවර්ධන අධිකාරියේ දත්ත අනුව ඉන්දියාව ශ්‍රී ලංකාවේ විශාලතම සංචාරක මූලාශ්‍ර වෙළඳපොළ ලෙස අඛණ්ඩව පවතින අතර, ඉන්දියානු සංචාරක පැමිණීම් 2023දී 302,844 සිට 2024දී 416,974 දක්වාත්, 2025දී 530,000 ඉක්මවාත් වර්ධනය වී ඇති බවයි.

ශ්‍රී ලංකාව හා තායිලන්තයට අමතරව, බාලි, වියට්නාමය සහ මැලේසියාවද ඉන්දියානු ජෝඩු අතර ජනප්‍රිය ජාත්‍යන්තර විවාහ ගමනාන්ත ලෙස වාර්තාවේ සඳහන් වේ.

යුරෝපීය ගමනාන්ත අතර ඉතාලිය, ප්‍රංශය, ග්‍රීසිය, ස්පාඤ්ඤය සහ පෘතුගාලය වැඩි කැමැත්තක් දිනාගෙන ඇත. මේ අතර, බටහිර ආසියාවේ ආරක්ෂක අර්බුද සහ ගුවන් ගමන් වියදම් ඉහළ යාම හේතුවෙන් ජාත්‍යන්තර සංචාරක කර්මාන්තයට යම් බලපෑම් එල්ල වී තිබුණද, ඉන්දියානු ජෝඩු විදේශීය ගමනාන්ත විවාහ සඳහා දක්වන උනන්දුව අඩුවී නොමැති බව කර්මාන්ත විශේෂඥයෝ පවසති.

ලංකාවට තවත් ජාත්‍යන්තර ඇගයීමක් - ලෝකේ විශිෂ්ටතම ආහාර ගමනාන්ත අතර ශ්‍රී ලංකාවත්

TailorMade Experiences සමාගමේ ප්‍රධාන විධායක ශෂාන්ක් ගුප්තා සඳහන් කළේ බටහිර ආසියාවේ පවතින අවිනිශ්චිත තත්ත්වය හේතුවෙන් ඉන්දියානු පවුල් වැඩි ස්ථාවරත්වයක් සහ පහසු සැලසුම්කරණයක් ලබාදෙන ගමනාන්ත සොයා බලමින් සිටින බවයි.

ඒ අනුව, ශ්‍රී ලංකාව පිළිබඳ විමසීම් සහ ස්ථාන නිරීක්ෂණ සැලකිය යුතු ලෙස ඉහළ ගොස් ඇති බවද ඔහු ප්‍රකාශ කළේය.