ප්‍රේක්ෂකාගාරය හොල්මන් කළ "සූරිය සුළඟ"දේශපාලනයයි ආදරයයි පටලැවුණු තවත් දැවැන්ත සිනමා අත්දැකීමක්

"දේදුනු ආකාසේ" සහ "ආදරණීය කතාවක්" වැනි ජනප්‍රිය වාණිජ සිනමාපට රැසක් අධ්‍යක්ෂණය කළ ප්‍රියන්ත කොළඹගේගේ නවතම සිනමා නිර්මාණය වන "සූරිය සුළඟ" (Suriya Sulanga) මේ දිනවල දිවයින පුරා සිනමාහල්වල තිරගත වෙමින් ප්‍රේක්ෂක ආකර්ෂණය දිනාගනිමින් සිටී.

මෙම සිනමාපටයේ නිෂ්පාදන කටයුතු මනීෂා ද සිල්වා, චම්මික ද සිල්වා සහ එම්. ආර්. එච්. පෙරේරා විසින් සිදුකර ඇත

එය ආදරය, පවුල් බැඳීම්, දේශපාලනය සහ ජීවිතයේ අනපේක්ෂිත හැරවුම් එකට මුසු කළ සංවේදී කතාන්දරයක් ලෙස නිර්මාණය වී ඇත.

සිනමාපටයේ ප්‍රධාන චරිත සඳහා මේඝ සූරියආරච්චි සහ නිහාරි පෙරේරා පණ පොවන අතර, සජිනි රෝයි, අශාන් ඩයස්, සනත් ගුණතිලක, සේමිණී ඉද්දමල්ගොඩ, බිමල් ජයකොඩි, අතුල ජයසිංහ, ඉසුරු ලොකුහෙට්ටිආරච්චි, මුතු තරංගා, යශෝධා රාජක්‍රිෂ්ණා, ප්‍රියංකර රත්නායක සහ මෞලි ෆර්නෑන්ඩු ඇතුළු ප්‍රවීණ හා නව පරපුරේ දක්ෂ රංගන ශිල්පීන් රැසක් ද එක්ව සිටිති.

අසම්මතයේ ම්ලේච්ඡතම කළු පැල්ලම- වේල්ලවීදියේ අභිරහස ගැන ඔබ නොදන්නා පැත්ත ‘Room No 106’ වෙතින්

මෙවැනි ප්‍රබල රංගන ශිල්පීන්ගේ එකතුව පමණක්ම මෙම සිනමාපටය නැරඹීමට ප්‍රේක්ෂකයන්ට හොඳ හේතුවක් වන අතර, ඔවුන්ගේ අතිදක්ෂ රංගන කුසලතාව තවත් වරක් විශාල තිරය මත අත්විඳීමට මෙය කදිම අවස්ථාවකි.

"සූරිය සුළඟ" හි කතා පුවත ගලායන්නේ බලගතු දේශපාලන පවුලක දියණියක වන තරුෂි සහ සාමාන්‍ය පවුලක තරුණයෙකු වන සිදත් අතර ගොඩනැගෙන ආදර සබඳතාවක් වටාය.

විවාහ ගිවිසගෙන සිටින ඔවුන්ගේ සුන්දර අනාගත සිහින, එක් රාත්‍රියක සිදත් ත්‍රස්තවාදියෙකු ලෙස ලේබල් වීමත් සමඟ සම්පූර්ණයෙන්ම වෙනස් මඟකට හැරේ. එතැන් සිට දිග හැරෙන සිදුවීම් මාලාව ආදරය, ත්‍රාසය, කුතුහලය සහ සංවේදී හැඟීම් සමඟින් ප්‍රේක්ෂකයා ආසනයට බැඳ තබයි.

ආදර කතාවකට පමණක් සීමා නොවන මෙම සිනමාපටය තුළ පියෙකු සහ පුතෙකු අතර පවතින අසීමිත සෙනෙහස ද ඉතා සංවේදී ලෙස නිරූපණය කර ඇති අතර, පවුලේ බැඳීම්වල වටිනාකම පිළිබඳ ගැඹුරු පණිවිඩයක්ද ප්‍රේක්ෂකයා වෙත රැගෙන යයි.

මේ වනවිට ප්‍රේක්ෂකයන්ගේ ඉහළ ප්‍රතිචාර සහ ආදරය හිමිකරගෙන තිරගත වන "සූරිය සුළඟ", ආදරය, ත්‍රාසය, කුතුහලය සහ සංවේදී හැඟීම් එකට මුසු වූ වෙනස්ම සිනමා අත්දැකීමක් සොයන ඔබට අනිවාර්යයෙන්ම නැරඹිය යුතු සිනමාපටයකි.

එසේ නම්, මේ දිනවල ඔබත් ළඟම සිනමාහල වෙත ගොස් "සූරිය සුළඟ" සමඟ හමා එන ඒ අපූරු සිනමා අත්දැකීම විඳගන්න.