ලංකාවේ බිම්බෝම්බ ඉවත් කිරීමේ සාර්ථකත්වය ගැන හොලිවුඩ් නිළි රොසමුන්ඩ් පයික්ගෙන් ඉහළම ඇගයීමක්

සම්මානලාභී හොලිවුඩ් නිළියක මෙන්ම ජාත්‍යන්තර බිම්බෝම්බ ඉවත් කිරීමේ තානාපතිනියක වන රොසමුන්ඩ් පයික්, ශ්‍රී ලංකාවේ බිම්බෝම්බ ඉවත් කිරීමේ වැඩසටහනේ ප්‍රගතිය අගය කරමින් එය ඉතා සාර්ථක වැඩසටහනක් ලෙස ප්‍රශංසා කළාය.

අගෝස්තු 10 වැනිදා නිවාස, ඉදිකිරීම් සහ ජල සම්පාදන අමාත්‍ය ආචාර්ය සුසිල් රණසිංහ සමඟ පැවති සාකච්ඡාවකදී පයික් මේ බව සඳහන් කළාය. එහිදී ශ්‍රී ලංකාවේ බිම්බෝම්බ ඉවත් කිරීමේ මෙහෙයුම්වල වත්මන් ප්‍රගතිය සහ ඉදිරි සැලසුම් පිළිබඳව සාකච්ඡා කෙරිණි. නිලධාරීන් පවසන පරිදි, බිම්බෝම්බවලින් දූෂිත බවට කලින් හඳුනාගත් ප්‍රදේශවලින් සියයට 90කට ආසන්න ප්‍රමාණයක් මේ වන විට සාර්ථකව ඉවත් කර තිබේ.

ඉදිරි වසර හතර තුළ ශ්‍රී ලංකාව සම්පූර්ණයෙන්ම බිම්බෝම්බවලින් තොර රටක් බවට පත් කිරීම රජයේ ඉලක්කය වී ඇති අතර, ඒ සඳහා තවදුරටත් වර්ග කිලෝමීටර් 20.8ක පමණ භූමි ප්‍රමාණයක් ඉවත් කිරීමට නියමිතය. ඉතිරි ප්‍රදේශ බොහෝ දුරට දුෂ්කර හා සංකීර්ණ භූමි ප්‍රදේශවලින් සමන්විත වේ.

හෝමූස් අවිනිශ්චිතතාව මැද ලෝක තෙල් මිල නැවතත් ඉහළට

අනෙකුත් සංවිධාන මගින් සිදුකරන මෙහෙයුම්වලට අමතරව, ශ්‍රී ලංකා යුද හමුදාව වාර්ෂිකව වර්ග කිලෝමීටර් 1.5ක පමණ භූමි ප්‍රමාණයක් බිම්බෝම්බවලින් ඉවත් කිරීමේ ඉලක්කයක් සකස් කර තිබේ. ඒ සඳහා බිම්බෝම්බ ඉවත් කිරීමේ මෙහෙයුම් සඳහා විශේෂ පුහුණුව ලැබූ හමුදා සාමාජිකයන් 500 දෙනෙකු යෙදවීමට ද සැලසුම් කර ඇත.

මේ අතර, පසුගිය වසරට සාපේක්ෂව බිම්බෝම්බ ඉවත් කිරීමේ කටයුතු සඳහා රජය වෙන් කරන මූල්‍ය ප්‍රතිපාදන දෙගුණ කර තිබේ. සාකච්ඡාව අතරතුරදී පයික්, ජාත්‍යන්තර ප්‍රමිතීන්ට අනුකූලව ශ්‍රී ලංකාව බිම්බෝම්බ ඉවත් කිරීමේ මෙහෙයුම් ක්‍රියාත්මක කරමින් ලබා ඇති ප්‍රගතිය පිළිබඳව සිය ප්‍රසාදය සහ කෘතඥතාව පළ කළාය. මෙම වැඩසටහන හරහා උතුරු හා නැගෙනහිර පළාත්වල සංවර්ධනයට සහාය ලබාදීම, සංචාරක කර්මාන්තය ප්‍රවර්ධනය කිරීම මෙන්ම ප්‍රජාවන් අතර විශ්වාසය තවදුරටත් ශක්තිමත් කිරීමට හැකිවනු ඇතැයි නිලධාරීහු පෙන්වා දුන්හ.