හෝමූස් අවිනිශ්චිතතාව මැද ලෝක තෙල් මිල නැවතත් ඉහළට

හෝමූස් සමුද්‍ර සන්ධිය නැවත විවෘත කිරීම පිළිබඳ පවතින අවිනිශ්චිතතාව හේතුවෙන් සඳුදා තෙල් මිල ඉහළ ගියේය. ඉරානය, ඕමානය සමඟ නව නාවික මාර්ග සම්බන්ධයෙන් ගිවිසුමක් අවසන් අදියරට පැමිණ ඇති බව ප්‍රකාශ කළද, එක්සත් ජනපදය අවධාරණය කළේ සමුද්‍ර සන්ධිය නැවත විවෘත කිරීමට පෙර තවත් කොන්දේසි කිහිපයක් සපුරාලිය යුතු බවයි.

ග්‍රිනිච් වේලාවෙන් 00:56 වන විට බ්‍රෙන්ට් බොරතෙල් අනාගත මිල ශත 91කින් හෙවත් 1.09%කින් ඉහළ ගොස් බැරලයකට ඩොලර් 84.46ක් විය.

මේ අතර, එක්සත් ජනපද බටහිර ටෙක්සාස් අතරමැදි (WTI) බොරතෙල් අනාගත මිල ශත 61කින් හෙවත් 0.78%කින් ඉහළ ගොස් බැරලයකට ඩොලර් 78.79ක් විය.

හෝමූස් අර්බුදයට ඕමානයෙන් මැදිහත්වීමක් - ඉරානයෙන් සුබ ලකුණක්, ඒත් ඇමෙරිකාවට කොන්දේසි රැසක්

යුද්ධයට පෙර ලෝකයේ තෙල් සැපයුමෙන් පහෙන් එකක් පමණ ප්‍රවාහනය වූ හෝමූස් සමුද්‍ර සන්ධිය නැවත විවෘත කිරීමට මඟ පාදන ගිවිසුමකට ඉරානය සහ ඕමානය ඉක්මනින් ළඟා වනු ඇතැයි පළ වූ බලාපොරොත්තු හේතුවෙන්, පසුගිය සතියේ බ්‍රෙන්ට් සහ WTI යන මිණුම් සලකුණු දෙකම 7%කට වැඩි ප්‍රමාණයකින් පහත වැටී තිබිණි.

ඉරානය ඉරිදා ප්‍රකාශ කළේ ඕමානය සමඟ ඇති කරගැනීමට නියමිත ගිවිසුම “අවසාන අදියරේ” පවතින බවයි.

කෙසේ වෙතත්, වොෂින්ටනය යළිත් අවධාරණය කළේ ඉරානය විසින් එක්සත් ජනපදයට වන්දි ගෙවීම ඇතුළු පුළුල් කොන්දේසි කිහිපයක් සපුරාලීමෙන් පසුව පමණක් හෝමූස් සමුද්‍ර සන්ධිය නැවත විවෘත කිරීමට ඉඩ ලබාදෙන බවයි.