මෛත්‍රී දුන් ජනාධිපති සමාව ශ්‍රේෂ්ඨාධිකරණය අවලංගු කරයි - ඥානසාර හිමියන් නැවත සිරගත කිරීමට බන්ධනාගාර නිලධාරීන් විහාරස්ථානයට

2019 වසරේදී බොදු බල සේනා (BBS) සංවිධානයේ මහලේකම් පූජ්‍ය ගලගොඩඅත්තේ ඥානසාර හිමියන්ට ලබාදුන් ජනාධිපති සමාව ශ්‍රේෂ්ඨාධිකරණය විසින් අවලංගු කිරීමෙන් අනතුරුව, උන්වහන්සේ සිටින ස්ථානය සොයා ගැනීමට නොහැකි වී ඇති බව වාර්තා වේ.

උන්වහන්සේට නියම කර තිබූ වසර හයක සිර දඬුවමේ ඉතිරි කාලය ගෙවීම සඳහා නැවත බන්ධනාගාරගත කිරීමට අවශ්‍ය පියවරක් ලෙස බන්ධනාගාර නිලධාරීන් රාජගිරිය, නාවල ප්‍රදේශයේ පිහිටි උන්වහන්සේගේ විහාරස්ථානය වෙත ගොස් ඇති බව වාර්තාවේ

කෙසේ වෙතත්, විහාරස්ථානයේ වැඩවසන භික්ෂූන් වහන්සේලා විසින් ඥානසාර හිමියන් මේ වන විට සිටින ස්ථානය පිළිබඳව තමන් නොදන්නා බව බන්ධනාගාර නිලධාරීන්ට දැනුම් දී ඇති බව සඳහන් වේ.

2019 මැයි මාසයේදී හිටපු ජනාධිපති මෛත්‍රීපාල සිරිසේන මහතා විසින් ජනාධිපති සමාව ලබාදීමට පෙර, ඥානසාර හිමියන් සිය වසර හයක සිර දඬුවමෙන් ගත කර තිබුණේ මාස නවයක පමණ කාලයක් බව වාර්තා වේ.

ඒ අනුව, එම ජනාධිපති සමාව අවලංගු සහ බලරහිත බවට ශ්‍රේෂ්ඨාධිකරණය තීන්දු කිරීමත් සමඟ, උන්වහන්සේට මුල් සිර දඬුවමෙන් වැඩි කොටසක් නැවත ගෙවීමට සිදුවන තත්ත්වයක් උද්ගත වී තිබේ. 2019 වසරේදී ලබාදුන් ජනාධිපති සමාව සම්බන්ධයෙන් ත්‍රිපුද්ගල ශ්‍රේෂ්ඨාධිකරණ විනිසුරු මඬුල්ලක් විසින් මෙම තීන්දුව ලබාදී ඇත.

එම සමාව ලබාදීම අත්තනෝමතික ක්‍රියාවක් බවත්, එමගින් මහජන විශ්වාසය සහ ස්වාභාවික යුක්තියේ මූලධර්ම උල්ලංඝනය කර ඇති බවත් ශ්‍රේෂ්ඨාධිකරණය තීරණය කර තිබේ. ශ්‍රේෂ්ඨාධිකරණ තීන්දුවෙන් අනතුරුව ඥානසාර හිමියන් නැවත බන්ධනාගාරගත කිරීම සඳහා බලධාරීන් පියවර ගනිමින් සිටියද, මේ වන විට උන්වහන්සේ සිටින ස්ථානය පිළිබඳව තොරතුරක් නොමැති බව වාර්තා වේ.