පොලිසියෙන් රැකියා පුරප්පාඩු රැසකට අයදුම්පත් කැඳවයි - අයදුම් කළ හැකි නියමිත දිනය මෙන්න

ශ්‍රී ලංකා පොලිසිය විසින් පොලිස් සහායක සේවයේ පුරප්පාඩු 383ක් සඳහා සුදුසුකම් ලත් අයදුම්කරුවන්ගෙන් අයදුම්පත් කැඳවා තිබේ. මෙම බඳවා ගැනීම් යටතේ තාක්ෂණික, වෘත්තීය සහ විශේෂිත ක්ෂේත්‍ර රැසක තනතුරු සඳහා අවස්ථා ලබාදී ඇත.

2026 ජූලි 10 දිනැති අංක 2497 දරන අතිවිශේෂ ගැසට් නිවේදනයට අනුව, උප පොලිස් පරීක්ෂක (Sub Inspector) තනතුරු 177ක් සහ පොලිස් කොස්තාපල් තනතුරු 206ක් සඳහා බඳවා ගැනීම් සිදු කෙරේ.

අයදුම්පත් භාරගැනීම 2026 අගෝස්තු 14 දක්වා සිදු කෙරෙන අතර, සියලුම අයදුම්පත් ශ්‍රී ලංකා පොලිසියේ මාර්ගගත අයදුම්පත් පද්ධතිය ඔස්සේ පමණක් ඉදිරිපත් කළ යුතු බව පොලිසිය දැනුම් දෙයි

. උප පොලිස් පරීක්ෂක තනතුරු සඳහා වෙබ් අඩවි සංවර්ධනය හා සංස්කරණය, පද්ධති විශ්ලේෂණය, මෘදුකාංග ක්‍රමලේඛනය, පරිගණක දෘඩාංග හා ජාලකරණය, ග්‍රැෆික් නිර්මාණය, ප්‍රමාණ සමීක්ෂණය, යාන්ත්‍රික ඉංජිනේරු ක්ෂේත්‍රය, ආහාර සැපයුම් හා සැලසුම්කරණය ඇතුළු විවිධ වෘත්තීය ක්ෂේත්‍ර රැසක් ආවරණය වේ.

ඉන්දියා යන ලාංකිකයන්ට ලැබුණු විශේෂ සහනය - ඉන්දීය මහ කොමසාරිස් කාර්යාලයෙන් නිල නිවේදනයක්

මීට අමතරව, ඖෂධවේදීන්, විදුලි කෙටුම්පත් ශිල්පීන්, වෛද්‍ය රසායනාගාර කාර්මිකයන් සහ හෙද නිලධාරීන් ලෙස පිරිමි හා කාන්තා අපේක්ෂකයින්ට උප පොලිස් පරීක්ෂක තනතුරු සඳහා අයදුම් කළ හැකිය.

පොලිස් කොස්තාපල් තනතුරු සඳහා ශීතකරණ හා වායු සමීකරණ කාර්මිකයන්, රියදුරන්, ඉලෙක්ට්‍රොනික කාර්මිකයන්, යාන්ත්‍රික ශිල්පීන්, පරිගණක ක්‍රියාකරුවන්, වෙල්ඩර්වරුන්, ශබ්ද පද්ධති ක්‍රියාකරුවන් සහ වේදිකා ආලෝකකරණ කාර්මිකයන් ඇතුළු තාක්ෂණික ක්ෂේත්‍ර රැසකට බඳවා ගැනීම් සිදු කෙරේ.

වේශ නිරූපණ ශිල්පීන් සහ යෝග්‍යතා උපදේශකයින් ලෙසද පිරිමි හා කාන්තා අපේක්ෂකයින් බඳවා ගැනීමට නියමිතය. සුදුසුකම් සපුරාලන සියලුම අපේක්ෂකයින් 2026 අගෝස්තු 14 දිනට පෙර මාර්ගගතව අයදුම්පත් ඉදිරිපත් කරන ලෙස ශ්‍රී ලංකා පොලිසිය දැනුම් දී තිබේ.