මඩකලපුවම හෙල්ලූ එකම පවුලේ දරුවන් දෙදෙනාගේ මරණ වල තවත් කරුණු රැසක් එළියට

මඩකලපුව ප්‍රදේශයේ හෝටල් කාමරයක හටගත් ගින්නක දුමාරය ආඝ්‍රාණය වීමෙන් එකම පවුලේ දරුවන් දෙදෙනෙකු අවාසනාවන්ත ලෙස ජීවිතක්ෂයට පත්වීමේ සිදුවීම පසුපස තිබූ වංචාවක් අනාවරණය කර ගැනීමට මඩකලපුව පොලීසිය සමත්ව ඇත.

  පියා විසින් හෝටල් කාමරයේ දොර පිටතින් වසා දමා ගොස් තිබූ අවස්ථාවක, එහි තිබූ මෙට්ටයකට ගිනිගෙන හටගත් අධික දුමාරය ආඝ්‍රාණය වීමෙන් මෙම දරුවන් දෙදෙනා මියගොස් තිබුණි.

මේ අයුරින් මරණයට පත්වූයේ එකම පවුලේ අවුරුදු 3ක පිරිමි දරුවෙකු සහ අවුරුදු 5ක ගැහැණු දරුවෙක්ය. සිද්ධිය පිළිබඳව මඩකලපුව මූලස්ථාන පොලීසිය සිදුකළ දීර්ඝ විමර්ශනවලදී තවත් කරුණු රැසක් හෙළිවිය

ඒ අනුව සැකකාර පියා මඩකලපුව පොලීසිය විසින් ඊයේ (28) පොලිස් අත්අඩංගුවට ගෙන තිබේ මුලදී වාර්තා වූයේ පිළිකා රෝගයෙන් පෙළෙන සිය මව බැලීම සඳහා දරුවන් මඩකලපුවට පැමිණ ඇති බවය.

නමුත් වෛද්‍ය හා පොලිස් පරීක්ෂණවලදී තහවුරු වී ඇත්තේ, දරුවන්ගේ මවට කිසිදු පිළිකා රෝගී තත්ත්වයක් නොමැති බවයි. ඇය මේ වනවිට මාතර ප්‍රදේශයේ පිහිටි ඇගේ නිවසේ පසුවන බව හෙළි වී තිබේ.

ඒ වගේම දැනට සිදුකළ පරීක්ෂණවලදී අනාවරණය වී ඇත්තේ සැකකරු සිය බිරිඳට පිළිකාවක් වැළඳී ඇති බව පවසමින්, මෙම අහිංසක දරුවන් දෙදෙනාද උපයෝගී කරගනිමින් විවිධ ප්‍රදේශවල සිඟමනේ යොදවා මුදල් උපයා ඇති බවයි .

අනුරපුරයෙන් කණගාටුදායක අනාවරණයක් - අනාරක්ෂිත දරුවන් 5000කට අධික සංඛ්‍යාවක්

සැකකරු තමන් බදුල්ල ප්‍රදේශයේ පදිංචිකරුවෙකු බව පවසා තිබුණද, පොලිස් ප්‍රශ්න කිරීම්වලදී ඔහු අකුරැස්ස ප්‍රදේශයේ පදිංචිකරුවෙකු බව හෙළි වී තිබේ. ඔහු ළඟ තිබූ ජාතික හැඳුනුම්පත බදුල්ල ප්‍රදේශයේ වෙනත් පුද්ගලයෙකුට අයත් එකකි.

එම හැඳුනුම්පත 2023 වසරේදී අස්ථානගත වූවක් වන බව වාර්තා වේ .

එහි සැබෑ අයිතිකරු මේ වනවිට නීත්‍යානුකූලව නව හැඳුනුම්පතක් ලබාගෙන කඩවත ප්‍රදේශයේ පදිංචිව සිටියි. මෙම සැකකරු එම හැඳුනුම්පත භාවිත කරමින් කාලයක් තිස්සේ ජනතාව මුලා කර තිබුණි.

මෙම සැකකාර පියාට එරෙහිව මීට පෙරද ප්‍රදේශ කිහිපයක පොලිස් ස්ථානවල වංචා කිරීම් සම්බන්ධයෙන් පැමිණිලි රැසක් පවතින බව සදහන්ය සිද්ධිය සම්බන්ධයෙන් වැඩිදුර ප්‍රශ්න කිරීම් සඳහා මියගිය දරුවන්ගේ මවද මේ වනවිට පොලීසිය වෙත කැඳවීමට පියවර ගෙන තිබේ මඩකලපුව පොලීසිය විසින් මේ සම්බන්ධයෙන් ඉදිරි විමර්ශන සිදුකරනු ලබයි.

අස්වැසුම ලාභීන්ට සුබ පණිවිඩයක්- අස්වැසුම අද සිට බැංකු ගිණුම්වලට