ඉදිරි පැය 36 සඳහා මුළු ලංකාවටම වලංගු නිවේදනයක්

දිවයිනේ නිරිතදිග කොටසේ දැනට පවතින වැසි සහිත දේශගුණික තත්ත්වය ඉදිරි කාලය තුළදීත් එලෙසම සක්‍රීයව පවතිනු ඇතැයි අපේක්ෂා කරන බව කාලගුණ විද්‍යා දෙපාර්තමේන්තුව පවසයි.

ඉදිරි පැය 36 ක කාලය පුරා වලංගු වන පරිදි එම දෙපාර්තමේන්තුව විසින් අද දින අලුත්ම කාලගුණ අනාවැකිය නිකුත් කර තිබේ.

ඒ අනුව බස්නාහිර, සබරගමුව සහ වයඹ යන පළාත්වල වැසියන්ට මෙන්ම ගාල්ල, මාතර, මහනුවර සහ නුවරඑළිය යන දිස්ත්‍රික්කවල ජීවත්වන ජනතාවට ද විටින් විට වැසි හෝ ගිගුරුම් සහිත වැසි ඇති විය හැකි බවට එම නිවේදනය මඟින් පූර්ව දැනුම්දීමක් සිදු කරයි. 

මීට අමතරව, දිවයිනේ සෙසු ප්‍රදේශවල පවතින තත්ත්වය පිළිබඳව පැහැදිලි කරමින් කාලගුණ විද්‍යා දෙපාර්තමේන්තුව පෙන්වා දෙන්නේ ඌව පළාතේත්, නැගෙනහිර පළාතට අයත් අම්පාර සහ මඩකලපුව යන දිස්ත්‍රික්කවලත් ස්ථාන කිහිපයක පස්වරු 1.00 න් පසුව වැසි හෝ ගිගුරුම් සහිත වැසි හටගැනීමේ හැකියාවක් පවතින බවයි.

එමෙන්ම මධ්‍යම කඳුකරයේ බටහිර බැවුම් ප්‍රදේශවල මෙන්ම උතුර, උතුරුමැද, වයඹ සහ දකුණු පළාත්වලත්, ත්‍රිකුණාමලය දිස්ත්‍රික්කය පුරාත් පැයට කිලෝමීටර් 30 ත් 40 ත් අතර වේගයකින් හමන තරමක තද සුළං තත්ත්වයක් ද බලාපොරොත්තු විය හැක.

රජයේ විශේෂ නිවාඩු දිනයක් ප්‍රකාශයට - ගැසට් නිවේදනය නිකුත් වේ

පවතින අහිතකර කාලගුණ තත්ත්වය හේතුවෙන් ගිගුරුම් සහිත වැසි ඇති වන අවස්ථාවන්හිදී එම ප්‍රදේශවල තාවකාලිකව ප්‍රබල තද සුළං තත්ත්වයක් හටගත හැකි බවද කාලගුණ බලධාරීහු අනතුරු අඟවති.

එම නිසා, එම තද සුළංවලින් සහ හදිසි අකුණු සැර වැදීම්වලින් සිදුවිය හැකි අනතුරු මෙන්ම දේපළ හානි අවම කරගැනීම සඳහා අවශ්‍ය සියලුම ආරක්ෂිත පියවර කල්තියා ගන්නා ලෙස කාලගුණ විද්‍යා දෙපාර්තමේන්තුව මහජනතාවගෙන් කාරුණිකව ඉල්ලා සිටියි.

චීන ජාතිකයන්ගෙන් ලක්ෂ 3 බැගින් අල්ලස් ඉල්ලූ වැලිකඩ OIC රිමාන්ඩ්