මගීන් 250ක් ගත් ඉන්දුනීසියානු තොටුපළක් මුහුද මැදදී ගිනි ගනී - 5ක් මරුට, 41ක් අතුරුදහන්

අවම වශයෙන් පුද්ගලයින් 250 දෙනෙකු රැගත් ඉන්දුනීසියානු මගී තොටුපළක් මුහුදේදී ගිනි ගැනීමෙන් පුද්ගලයින් පස් දෙනෙකු ජීවිතක්ෂයට පත්ව ඇති අතර තවත් 41 දෙනෙකු අතුරුදහන්ව සිටින බව එරට බලධාරීන් පවසයි.

ඉන්දුනීසියාවේ ජාතික සෙවුම් සහ මුදාගැනීමේ ඒජන්සිය (Basarnas) සඳහන් කළේ KMP Mutiara Sentosa 2 නමැති මගී තොටුපළ නැගෙනහිර ජාවා පළාතේ සුරබයා නගරයේ සිට දකුණු සුලවේසි පළාතේ මකාසාර් නගරය වෙත ගමන් කරමින් සිටියදී, මධුරා දූපතට ඔබ්බෙන් ගින්න හටගත් බවයි.

නැවේ කපිතාන්වරයා ගින්න පිළිබඳව බලධාරීන්ට වාර්තා කර ඇති අතර, ඒ අනුව වහාම සෙවුම් හා මුදාගැනීමේ මෙහෙයුම් ආරම්භ කර තිබේ. දේශීය මාධ්‍ය වන iNews විසින් විකාශය කළ දර්ශනවල ජීවිතාරක්ෂක කබා පැළඳ සිටින මගීන් විශාල පිරිසක් ජීවිතාරක්ෂක බෝට්ටුවලට මාරු කරමින් සිටින අයුරු දැක්වේ.

සංචාරකයින් පිරිසක් රැගත් ගුවන් යානයක් අනතුරට - ගමන් කෙරූ සියලුම දෙනා මරුට

තවත් වීඩියෝ දර්ශනවලින් පෙනී යන්නේ තොටුපළේ ඉහළ කොටස්වලින් දැඩි ගිනිදැල් සහ ඝන දුමක් නැඟී එන අතර, මගීන් හදිසි ලෙස නැවෙන් ඉවත් වන ආකාරයයි.

ඉන්දුනීසියාවේ ජාතික සෙවුම් සහ මුදාගැනීමේ ඒජන්සිය   සිය නිල ටික්ටොක් ගිණුම හරහා ප්‍රකාශ කළේ, සුරබයා සෙවුම් හා මුදාගැනීමේ කාර්යාලයට දේශීය වේලාවෙන් පෙරවරු 8.24ට (GMT 2.24) මෙම ගින්න පිළිබඳ තොරතුරු ලැබුණු බවයි.

නැව් සමාගමෙන් ලැබුණු මූලික තොරතුරු අනුව, ගින්න හටගෙන ඇත්තේ පෙරවරු 6.00ත් 7.00ත් අතර කාලයේදීය.

පසුව නිකුත් කළ යාවත්කාලීන ප්‍රකාශයකදී Basarnas සඳහන් කළේ, තොටුපළ සම්පූර්ණයෙන්ම පාහේ ගිනිදැල්වලින් වැසී තිබූ අතර, ගලවා ගැනීමේ කණ්ඩායම් පැමිණෙන තෙක් මගීන් බොහෝ දෙනෙකු නැවේ පාලමේ රැඳී සිටිමින් උදව් ඉල්ලා සංඥා කළ බවයි.

මේ වන විට පුද්ගලයින් රැසක් ආරක්ෂිතව මුදාගෙන ඇති අතර, අතුරුදහන් වූවන් සොයා සෙවුම් හා මුදාගැනීමේ මෙහෙයුම් තවදුරටත් ක්‍රියාත්මක වේ. ගින්නට හේතුව මෙතෙක් අනාවරණය වී නොමැති අතර, සිද්ධිය සම්බන්ධයෙන් බලධාරීන් විමර්ශනයක් ආරම්භ කර ඇත.