ශ්‍රී ලංකා මන්ත්‍රීවරයෙක් තමිල්නාඩු මහ ඇමති සුපිරි නළු විජේ හමුවෙයි - මෙන්න විස්තරේ

ශ්‍රී ලංකාවේ දෙමළ ජාතික ජනතා පෙරමුණ (TNPF) නායකත්වයෙන් යුත් දෙමළ ජාතික කවුන්සිලය නියෝජනය කරන නියෝජිත පිරිසක් සිකුරාදා චෙන්නායිහිදී තමිල්නාඩු ප්‍රධාන අමාත්‍ය සී. ජෝසප් විජේ හමුවී ශ්‍රී ලංකා දෙමළ ජනතාවට බලපාන ගැටළු සාකච්ඡා කළහ. TNPF නායක සහ පාර්ලිමේන්තු මන්ත්‍රී ගජේන්ද්‍රකුමාර් පොන්නම්බලම්ගේ නායකත්වයෙන් යුත් නියෝජිත පිරිස තමිල්නාඩු මහ ඇමතිවරයා හමුවී ප්‍රධාන ගැටළු කිහිපයක් ගෙනහැර දක්වන ලිඛිත සංදේශයක් භාර දුන්හ.

පොන්නම්බලම් විසින් නිකුත් කරන ලද නිවේදනයකට අනුව, ශ්‍රී ලංකා දෙමළ ජනතාව මුහුණ දෙන වත්මන් දේශපාලන හා මානව හිමිකම් ගැටළු, දෙමළ ජාතියේ ස්වෛරීභාවය පිළිගන්නා ෆෙඩරල් දේශපාලන විසඳුමක අවශ්‍යතාවය සහ ඊලම් දෙමළ ජනතාවට එරෙහිව සිදු කරන ලදැයි කියන ම්ලේච්ඡ ක්‍රියා සම්බන්ධයෙන් ස්වාධීන ජාත්‍යන්තර පරීක්ෂණයක් ඉල්ලා සිටීම යන කරුණු කෙරෙහි සාකච්ඡා යොමු විය.

ඉන්දියානු සහ ශ්‍රී ලාංකික දෙමළ ධීවරයින්ට බලපාන ගැටළු සඳහා ස්ථිර විසඳුමක් ලබා ගැනීමේ අවශ්‍යතාවය මෙන්ම ඉන්දියාවේ වෙසෙන ශ්‍රී ලාංකික දෙමළ සරණාගතයින් සම්බන්ධ දිගුකාලීන ගැටළු පිළිබඳව ද නියෝජිත පිරිස සාකච්ඡා කළහ. හත් දෙනෙකුගෙන් යුත් දූත පිරිසට හිටපු පාර්ලිමේන්තු මන්ත්‍රී සෙල්වරාසා ගජේන්ද්‍රන්, දෙමළ ජාතික හරිත ව්‍යාපාරයේ නායක පොන්නතුරෙයි අයිංගරනේසන්, ප්‍රජාතන්ත්‍රවාදී දෙමළ ජාතික පක්ෂ නායක කේ.වී. තවරාසා, ටීඑන්පීඑෆ් ජාතික සංවිධායක දරුමලිංගම් සුරේෂ්, නිල ප්‍රකාශක කනගරත්නම් සුකාෂ් සහ ප්‍රතිපත්ති ලේකම් නඩරාජා කාන්දීපන් ඇතුළත් විය. චෙන්නායි හි තමිල්නාඩු රජයේ ලේකම් කාර්යාලයේදී රැස්වීම පැවැත්විණි.