ඉන්දියාවට එරෙහි ටෙස්ට් සටනට ශ්‍රී ලංකාවෙන් ලොකු වෙනසක් - දික්වැල්ලත් වසර 3කට පසු යළිත් සංචිතයට

ඉන්දියාවට එරෙහිව ලබන 15 වැනිදා ගාල්ලේදී ආරම්භ වීමට නියමිත පළමු ටෙස්ට් තරගය සඳහා ශ්‍රී ලංකා කණ්ඩායමේ වෙනස්කම් කිහිපයක් සිදුකිරීමට නියමිත බව වාර්තා වේ. ඒ අනුව වසර තුනකට පමණ පසු ටෙස්ට් පිටියට යළි පැමිණීමට නිරෝෂන් දික්වැල්ලට අවස්ථාව හිමිවනු ඇතැයි අපේක්ෂා කෙරේ.

කුසල් මෙන්ඩිස් ආබාධයකට ලක්වීම හේතුවෙන් ඔහු වෙනුවට දික්වැල්ල කඩුලු රැකීමේ වගකීම භාරගනු ඇතැයි සඳහන් වේ. වේග පන්දු යවන ක්‍රීඩක දිල්ෂාන් මධුශංක සහ දඟ පන්දු යවන රමේෂ් මෙන්ඩිස්ද යළි කණ්ඩායමට එක්වීමට නියමිතව තිබේ.

මේ අතර, ඉන්දියා A කණ්ඩායමට එරෙහි තරග සහ මෑතකදී පැවති පුහුණු තරගයේදී දැක්වූ දක්ෂතා හේතුවෙන් කේෂර නුවන්තාටද පළමු වරට ටෙස්ට් සංචිතයට කැඳවීමේ අවස්ථාව හිමිව තිබේ.

“කුසල් මෙන්ඩිස්ට නව වගකීමක් - ශ්‍රී ලංකා වෘත්තීය ක්‍රිකට් ක්‍රීඩක ක්‍රීඩිකාවන්ගේ සංගමයේ පළමු සභාපති වෙයි”

වේග පන්දු යවන ක්‍රීඩක ළහිරු කුමාරද ඔහුගේ ශාරීරික යෝග්‍යතාව මත කණ්ඩායමට ඇතුළත් කිරීම සම්බන්ධයෙන් සලකා බලමින් සිටින බව වාර්තා වේ. මේ අතර, මැණික්කටුවේ සිදුකළ ශල්‍යකර්මයකින් පසු පැතුම් නිස්සංක තවමත් සුවය ලබමින් සිටීම හේතුවෙන් ශ්‍රී ලංකා කණ්ඩායමේ ආරම්භක පිතිකරණ සංයෝජනයේද වෙනසක් සිදුවනු ඇතැයි අපේක්ෂා කෙරේ.

ඒ අනුව නිශාන් මධුෂ්ක සමඟ ළහිරු උදාර ඉනිම ආරම්භ කිරීමට නියමිතය. අත්දැකීම් බහුල ක්‍රීඩකයන් මෙන්ම නවක ක්‍රීඩකයන්ගෙන් සමන්විත සංයෝජනයක් සමඟ ඉන්දියාවට එරෙහි ටෙස්ට් තරගාවලියට ශ්‍රී ලංකාව පිවිසීමට නියමිත අතර, ලෝක ටෙස්ට් ශූරතා තරගාවලියේ සිය ස්ථානය ශක්තිමත් කරගැනීම ශ්‍රී ලංකා කණ්ඩායමේ ප්‍රධාන අරමුණක් වනු ඇත.

කෙසේ වෙතත් ශ්‍රී ලංකා ක්‍රිකට් ආයතනය විසින් මෙම සංචිතය මෙතෙක් නිල වශයෙන් ප්‍රකාශයට පත් කර නොමැත. ඉන්දියාවට එරෙහි පළමු ටෙස්ට් තරගය අගෝස්තු 15 වැනිදා ගාල්ල ජාත්‍යන්තර ක්‍රිකට් ක්‍රීඩාංගණයේදී ආරම්භ වීමට නියමිතය.

එක්දින ජාත්‍යන්තර ක්‍රිකට් ඉතිහාසයේ 5000 වැනි සන්ධිස්ථානය සනිටුහන් වෙයි