විද්‍යා ඝාතනයේ විත්තිකරුවන් තමන් නිදොස් කොට නිදහස් කරන්නැයි ඉල්ලූ අභියාචනා පෙත්සම් විභාගයට දින නියම වෙයි..
Piyumika
2015 වසරේ මහත් ආන්දෝලනයකට තුඩු දුන් යාපනයේ සිවලෝගනාදන් විද්‍යා දැරිය ඝාතනය කිරීම සම්බන්ධයෙන් යාපනය මහාධිකරණය විසින් මරණීය දණ්ඩනය නියම කර සිටින විත්තිකරුවන් හය දෙනා එම දඬුවමින් තමන්ව නිදොස් කොට නිදහස් කරන ලෙස ඉල්ලා ඉදිරිපත් කර තිබෙන අභියාචනා විභාගය ජනවාරි මස 20 වනදා පැවැත්වීමට ශ්‍රේෂ්ඨාධිකරණය දින නියම කර ඇත.
මෙම අභියාචනා පෙත්සම් ඊයේ දින (30) ප්‍රීති පද්මන් සූරසේන, යසන්ත කෝදාගොඩ, ඒ.එච්.එම්.ඩී. නවාස්, ශිරාන් ගුණරත්න සහ ප්‍රියන්ත ප්‍රනාන්දු යන මහත්වරුන්ගෙන් සමන්විත පංච පුද්ගල ශ්‍රේෂ්ඨාධිකරණ විනිසුරු මඩුල්ලක් ඉදිරියේ කැඳවනු ලැබීය.
එහිදී මෙම නඩුවට සම්බන්ධ එක් විත්තිකරුවකු මියගොස් සිටින බව බන්ධනාගාර නිලධාරීන් විසින් අධිකරණයට දැනුම් දුන්නේය.
විත්තිය වෙනුවෙන් පෙනී සිටි නීතිඥ ආරුමුගම් රගුපති මහතා අධිකරණය හමුවේ කරුණු දක්වමින් මෙම නඩුකරයට අදාළ පරිවර්තන කළ ලේඛන ලැබීමේ ප්‍රමාදය නිසා මෙම විත්තිකරුවන් වසර 08කට අධික කාලයක් නිකරුනේ බන්ධනාගාර ගතව සිටින බව සඳහන් කළේය.
එම අවස්ථාවේදී සොලිසිටර් ජෙනරාල් අයේෂා ජිනසේන මෙනෙවිය අධිකරණයට දැනුම් දුන්නේ මෙම නඩුකරයට අදාළ පරිවර්ථන කළ ලේඛන කඩිනමින් ලබාදීමට පියවර ගන්නා බවය.
මෙම විත්තිකරුවන් මිනීමැරීම, ඊට කුමන්ත්‍රණය කිරීම හා නීතිවිරෝධී ජනරාශිය යනාදී චෝදනාවලට වරදකරු වී සිටින බව සඳහන් කළ සොලිසිටර් ජෙනරාල්වරිය විත්තිකරුවන් දෙදෙනෙකු යාපනය මහාධිකරණයේ පැවති නඩු විභාගයේදි නිදහස් කර තිබූ බවත් සඳහන් කළාය.
ඉදිරිපත් වූ කරුණු සලකා බැලූ පංච පුද්ගල ශ්‍රේෂ්ඨාධිකරණ විනිසුරු මඩුල්ල මෙම නඩුකරයට අදාළ පරිවර්ථන ලේඛන කඩිනමින් අභියාචක විත්තිකරුවන් වෙත ලබාදීමට පියවර ගන්නා ලෙස සොලිසිටර් ජෙනරාල්වරියට දැනුම් දුන්නාය.
ඉන් අනතුරුව මෙම අභියාචනා පෙත්සම් විභාගය ජනවාරි මස 20 වනදා පැවැත්වීමට ද අධිකරණය දින නියම කළේය.
කයිට්ස් පුන්කුඩුතිව් මහා විද්‍යාලයේ ඉගෙනුම ලැබූ සිවලෝගනාදන් විද්‍යා දැරිය 2015 මැයි මස දහතුන් වැනිදා සමූහ දූෂණයකට ලක් කර මරා දැමුණු අතර ඒ සම්බන්ධයෙන් සැකකරුවන් දොළොස් දෙනෙකුට එරෙහිව නීතිපතිවරයා විසින් යාපනය මහාධිකරණයේදී ත්‍රිපුද්ගල මහාධිකරණ විනිසුරු මඬුල්ලක් හමුවේ නඩු විභාගය සිදු කිරීමට අධිචෝදනා ගොනු කරන ලදී.
එම නඩුව විභාග කිරීමෙන් අනතුරුව 2017 සැප්තැම්බර් මස 17 වැනිදා සිය නඩු තීන්දුව ප්‍රකාශයට පත් කළ, එම ත්‍රිපුද්ගල මහාධිකරණ විනිසුරු මඬුල්ල විත්තිකරුවන් හත් දෙනෙකු ඔවුන්ට එල්ල වූ චෝදනාවන්ට වරදකරුවන් බවට තීන්දු කළේය.
ඒ අනුව බූබාල සිංහම් ජෙය කුමාර්, බූබාල සිංහම් තව කුමාර්, මහා ලිංගම් ශෂි දරන්, තිලේ නාදන් චන්ද්‍රනාසන්, ශිවනේෂන් දුෂාන්තන්, ජෙයනාතන් කෝකිලන්,ස්විස් කුමාර් හෙවත් මහා ලිංගම් ශෂි කුමාර් යන විත්තිකරුවන්ට මරණ දඬුවම නියම වූ අතර ඊට අමතරව වසර තිහක බරපතළ වැඩ සහිත සිර දඬුවම් නියම කෙරිණි.
![දේශබන්දුගේ නොදුටු පැත්ත සහ පාස්කු ප්‍රහාරයට සම්බන්ධ වුන හැටි මෙන්න [VIDEO]](https://cdn.ibcstack.com/article/8188a173-26d0-4cf2-b00e-4088ab61ae29/25-67f38dc094dcf-sm.webp)
