අයහපත් කාලගුණයෙන් මාර්ග 206ක් අවහිරයි - පාලම් 10කට දැඩි හානි

ජල ගැලීම් සහ නායයෑම් හේතුවෙන් රට පුරා ප්‍රධාන මාර්ග ඇතුළු මාර්ග 206ක් මේ වන විට සම්පූර්ණයෙන්ම හෝ අර්ධ වශයෙන් අවහිර වී ඇති බව මාර්ග සංවර්ධන අධිකාරියේ අධ්‍යක්ෂ ජෙනරාල් විමල් කන්ඩම්බි මහතා පවසයි.

එමෙන්ම පාලම් 10කට දැඩි හානි සිදුව ඇති බවත්, ඒවායෙන් සමහරක් භාවිතයට සම්පූර්ණයෙන්ම නුසුදුසු බවත් ඔහු සඳහන් කළේය.

විශේෂයෙන්ම නුවරඑළිය සහ අනුරාධපුර නගර දෙකටම එන සහ යන සියලුම ප්‍රධාන මාර්ග මේ වන විට අවහිර වී ඇති බැවින් එම නගර දෙක සම්පූර්ණයෙන්ම හුදකලා වී ඇති බව අධ්‍යක්ෂ ජෙනරාල්වරයා අවධාරණය කළේය.

මාර්ග සංවර්ධන අධිකාරිය දැඩි උත්සාහයකින් යුතුව මාර්ග අවහිරතා ඉවත් කිරීමේ කටයුතු සිදු කරන බවත්, ජනතාවට අනවශ්‍ය ගමන් බිමන්වලින් වැළකී සිටින ලෙසත් ඉල්ලා සිටී.