ස්පාඤ්ඤය ගිනිබත් කළ මහා ලැව්ගින්නෙන් 11ක් මරුමුවට

ස්පාඤ්ඤයේ දකුණු ඇන්ඩලූසියා කලාපයේ ලොස් ගල්යාර්ඩෝස් (Los Gallardos) දිස්ත්‍රික්කයට අයත් බෙඩාර් (Bedar) ගම්මානය හරහා වේගයෙන් පැතිර ගිය දරුණු ලැව්ගින්නකින් පුද්ගලයන් 11 දෙනෙකු මියගොස් තවත් 19 දෙනෙකු අතුරුදන්ව ඇති බව එරට බලධාරීහු සිකුරාදා (10) තහවුරු කළහ.

මියගිය අය අතරින් බොහෝ දෙනා විදේශීය සංචාරකයන් විය හැකි බවට සැක පළ කර ඇති අතර, ඔවුන්ගේ අනන්‍යතාව තහවුරු කිරීමේ කටයුතු තවදුරටත් සිදු කෙරෙමින් පවතී.

ඉරාන ඇමෙරිකා සාමය බිදවැටෙමින් යලිත් ගිනියම්වු මැදපෙරදිග යුද්දය

මියගිය පුද්ගලයන් සිව්දෙනෙකු දකුණු පැත්තේ සුක්කානම සහිත මෝටර් රථයක් තුළ පිළිස්සී මියගොස් ඇති අතර, ඔවුන් බ්‍රිතාන්‍ය ජාතිකයන් විය හැකි බවට මූලික සැකයක් පවතින බව බලධාරීහු සඳහන් කළහ.

ඇන්ඩලූසියා හදිසි සේවා අමාත්‍ය ඇන්ටෝනියෝ සැන්ස් පැවසුවේ මෙම ලැව්ගින්න ඉතා වේගයෙන් ව්‍යාප්ත වූ අතර, වනාන්තර සහ ගැඹුරු නිම්නවලින් සමන්විත ප්‍රදේශ හරහා පලා යාමට උත්සාහ කළ පිරිස් අනතුරට ලක්ව ඇති බවයි.

ගිනි පාලනය සඳහා ගිනි නිවන භටයන් සහ හමුදා සාමාජිකයන් ඇතුළු 400කට අධික පිරිසක් යොදවා තිබේ. සාක්ෂිකරුවන් පවසන්නේ විදුලි රැහැනක් කඩා වැටීමෙන් ගින්න ආරම්භ වී වියළි පඳුරු ආවරණය හරහා වේගයෙන් පැතිර ගිය බවයි.

ලැව්ගින්නෙන් පුද්ගලයන් 8 දෙනෙකු තුවාල ලබා ඇති අතර, ඉන් 4 දෙනෙකුගේ තත්ත්වය බරපතළ බව වාර්තා වේ. එමෙන්ම වනාන්තර සහ ගොවිබිම් හෙක්ටයාර 3,150ක් පමණ විනාශ වී තිබේ. ගින්න හේතුවෙන් මාර්ග කිහිපයක් වසා දමා ඇති අතර, ප්‍රදේශවාසීන් ඉවත් කිරීමෙන් පසු පුද්ගලයන් 150කට ආසන්න පිරිසක් සංස්කෘතික මධ්‍යස්ථානයක තාවකාලිකව නවාතැන් ගෙන ඇත.

ස්පාඤ්ඤ අග්‍රාමාත්‍ය පේද්‍රෝ සැන්චෙස් මෙම සිද්ධිය සම්බන්ධයෙන් දැඩි ශෝකය පළ කර තිබේ. මේ අතර, අධික උණුසුම් කාලගුණය හේතුවෙන් ස්පාඤ්ඤයේ සහ ප්‍රංශයේ උෂ්ණත්වය සෙල්සියස් අංශක 40 දක්වා ඉහළ යා හැකි බවට අනාවැකි පළ වී ඇති අතර, දෙරටේම ලැව්ගිනි අවදානම ඉහළ ගොස් තිබේ.

චීනයේ කම්හලක දැවැන්ත ගින්නක් - පුද්ගලයින් 28ක් ජීවිතක්ෂයට - වීඩියෝ දර්ශන ලොව පුරා සමාජ මාධ්‍ය කළඹයි