කොළඹ රථවාහන තදබදයට තිරසාර විසඳුමක්- 'මෙට්‍රෝ බස්' සේවයෙන් අලුත් බස් රථ 104ක් සැප්තැම්බර් 29 සිට මහපාරට

කොළඹ පවතින රථවාහන තදබදය අවම කරමින් වඩාත් පහසු සහ ආරක්ෂිත පොදු ප්‍රවාහන සේවාවක් සැපයීමේ අරමුණින්, බස්නාහිර පළාතේ මාර්ග හතක් ඔස්සේ නව බස් රථ 104ක් ධාවනයට එක් කිරීමට ‘මෙට්‍රෝ බස්’ ආයතනය සූදානම් වේ.

ජනාධිපතිවරයාගේ ප්‍රධානත්වයෙන් මෙම නව බස් රථ සේවාව ආරම්භ කිරීමට නියමිත අතර, සැප්තැම්බර් 29 වැනිදා සිට මෙහෙයුම් ආරම්භ කිරීම සඳහා සියලු කටයුතු සූදානම් කර ඇති බව ‘මෙට්‍රෝ බස්’ සභාපති එස්.එම්.යූ.පී. තිලකරත්න මහතා පැවසීය.

කොළඹ කේන්ද්‍ර කරගත් මාර්ග හතක් ඔස්සේ මෙම බස් රථ ධාවනය කිරීමට නියමිත අතර, මගීන්ට නියමිත මාර්ග සහ කාලසටහන් අනුව සිය ගමනාන්ත වෙත පහසුවෙන් ළඟාවීමට හැකි වන පරිදි මෙම සේවාව සැලසුම් කර තිබේ.

“මහජනතාවට තම ගමනාන්ත වෙත පහසුවෙන් සහ ආරක්ෂිතව ළඟා වීමට උපකාර කිරීම සඳහා මෙම බස් රථ සේවාව හඳුන්වා දෙනවා,” යැයි තිලකරත්න මහතා පැවසීය.

නව බස් රථ සේවාව හඳුන්වාදීමේ ප්‍රධාන අරමුණක් වන්නේ කොළඹට ඇතුළු වන පෞද්ගලික වාහන සංඛ්‍යාව, විශේෂයෙන් එක් මගියෙකු පමණක් ගමන් කරන වාහන සංඛ්‍යාව, අවම කිරීම බවද ඔහු සඳහන් කළේය. “කොළඹට පැමිණෙන වාහන තදබදය අවම කිරීම අපගේ ප්‍රධාන අපේක්ෂාවක්,” යනුවෙන් ඔහු පැවසීය.

දෛනිකව කාර්යාල වෙත ගමන් කිරීම සඳහා බොහෝ දෙනෙකු පෞද්ගලික වාහන භාවිත කරන අතර, එම වාහනවල බොහෝවිට ගමන් කරන්නේ එක් පුද්ගලයෙකු පමණක් බව තිලකරත්න මහතා පෙන්වා දුන්නේය. එම තත්ත්වය හේතුවෙන් කොළඹට දෛනිකව ඇතුළු වන වාහන සංඛ්‍යාව ඉහළ යන බවද ඔහු සඳහන් කළේය. “මෙම බස් රථ සේවාව හඳුන්වාදීම තුළින් මාර්ගවල භාවිත වන වාහන සංඛ්‍යාව අඩු කිරීම අපගේ බලාපොරොත්තුවයි,” ඔහු පැවසීය.

දෛනික ගමනාගමනය සඳහා පොදු ප්‍රවාහන සේවාවන් භාවිත කිරීමට ජනතාව දිරිමත් කිරීම තුළින් කොළඹ පවතින රථවාහන තදබදය අවම කිරීමට සැලකිය යුතු දායකත්වයක් ලබාදිය හැකි බවද තිලකරත්න මහතා වැඩිදුරටත් සඳහන් කළේය.