දුර්වල ග්‍රැෆික්ස් නිසා වෛරල් වූ චීන එළදෙනගේ කතාව -කොටි පරාජය කරමින් යුවාන් මිලියන 11ක් හොයපු 'නියු ලායි' පිස්සුව!

අඩු වියදමකින් නිෂ්පාදනය කළ චීන සජීවිකරණ චිත්‍රපටයක් වන ‘නියු ලායි’ (Niu Lai) මේ වනවිට චීනයේ සිනමා ලෝකයේ අනපේක්ෂිත අවධානයක් දිනාගෙන තිබේ. සිහිනමය අනුපිළිවෙලක් තුළ එළදෙනක් වටා ගෙතුණු මෙම චිත්‍රපටය, එහි ව්‍යාකූල කතා වස්තුව සහ දුර්වල ග්‍රැෆික්ස් හේතුවෙන් සමාජ මාධ්‍ය ඔස්සේ වේගයෙන් වෛරල් වීමත් සමඟ ටිකට්පත් අලෙවියද විශාල ලෙස ඉහළ ගොස් ඇත.

චිත්‍රපටය නිකුත් කිරීමෙන් පසු පළමු දින 10 තුළ උපයා තිබුණේ යුවාන් 7,705ක් පමණි.

එහෙත් සමාජ මාධ්‍යවලින් ලැබුණු අනපේක්ෂිත ප්‍රචාරයත් සමඟ එහි ආදායම මේ වනවිට යුවාන් මිලියන 11.4 ඉක්මවා ඇති බව චීන චිත්‍රපට ආදායම් නිරීක්ෂණ වේදිකාවක් වන මාඕ යාන් පෙන්වා දෙයි. එය විශේෂත්වයක් වන්නේ ‘The Odyssey’ සහ ‘Spider-Man: Brand New Day’ වැනි දැවැන්ත හොලිවුඩ් නිෂ්පාදන සමඟද අවධානය දිනාගනිමින් සිටීමයි.

සමාජ මාධ්‍ය භාවිත කරන්නන් අතර චිත්‍රපටය සම්බන්ධයෙන් පළවන අදහස්ද එහි ජනප්‍රියත්වයට තවත් හේතුවක් වී තිබේ. “ඔබ එය නැරඹුවහොත් විනාඩි 80ක් පසුතැවිලි විය හැකියි. නමුත් ඔබ එය නැරඹුවේ නැත්නම්, ජීවිත කාලය පුරාම ඒ ගැන පසුතැවෙනු ඇතැයි” ජනප්‍රිය සමාජ මාධ්‍ය සටහනක සඳහන් විය.

තවත් පිරිසක් මෙම චිත්‍රපටය කෘත්‍රිම බුද්ධිය භාවිතයෙන් නිර්මාණය කරන අන්තර්ගතයන්ට වෙනස් වූ උදාහරණයක් ලෙස හඳුන්වා දී තිබේ. ඔවුන් චිත්‍රපටයේ අඩු ගුණාත්මක සජීවිකරණය පවා “අතින් සාදන ලද” නිර්මාණයක ලක්ෂණයක් ලෙස අර්ථ දක්වමින් එහි කොටස් සමාජ මාධ්‍ය ඔස්සේ බෙදා ගනිමින් සිටිති. “ඒක යම් බරපතළ ශිල්පීය හැකියාවක්,” යනුවෙන් එක් වෙයිබෝ පරිශීලකයෙකු සටහන් කර තිබූ අතර, තවත් අයෙකු එය “පිරිසිදු අතින් සාදන ලද” නිර්මාණයක් සහ මෙම ගිම්හාන සිනමා සමයේ විශාලතම “අඳුරු අශ්වයා” ලෙස හඳුන්වා තිබේ.

චිත්‍රපටයේ නම චීන කොටස් වෙළෙඳපොළ සමඟ සම්බන්ධ කරමින් විහිළු කළ පිරිසක්ද සිටිති. “ගොනා” සහ “ගවයා” යන වචන චීන භාෂාවෙන් එකම අක්ෂරයක් බෙදා ගැනීම මෙම විහිළුවට පාදක වී තිබේ. එක් වෙයිබෝ පරිශීලකයෙකු පවසා තිබුණේ කොටස් වෙළෙඳපොළ දර්ශකය 4,000 සීමාවට ළඟා වුවහොත් චිත්‍රපටයට සහාය දැක්වීම සඳහා සිනමා ශාලාවකට යන බවයි. ‘නියු ලායි’ මුල සිටම අඩු වියදම්, පහළ මට්ටමේ නිෂ්පාදනයක් ලෙස සැලකුණු අතර, එය නිකුත් කිරීමට පෙර විශාල ප්‍රචාරණ ව්‍යාපාරයක්ද ක්‍රියාත්මක කර නොතිබිණි. එහෙත් සමාජ මාධ්‍ය හරහා ඇති වූ ජනප්‍රියත්වය හේතුවෙන් චිත්‍රපටය සඳහා ඉල්ලුම වේගයෙන් ඉහළ ගොස් තිබේ.

18 හැවිරිදි තරුණයෙකුට කෝටි 98ක රන් නිධානයක් හමුවෙයි – බෙල්ජියමේ තරුණයාට අහම්බෙන් පෑදුණු වාසනාව

ඒ අනුව, ඇතැම් සිනමා ශාලා වැඩි ප්‍රදර්ශන වාර එකතු කිරීමටද පියවර ගෙන ඇත. චිත්‍රපටයට නිල ප්‍රවර්ධන පෝස්ටරයක් පවා නොතිබීම තවත් විශේෂත්වයකි. ඒ හේතුවෙන් ඇතැම් සිනමා ශාලා සේවකයන් ප්‍රේක්ෂකයන් ආකර්ෂණය කර ගැනීම සඳහා තමන් විසින්ම චිත්‍රපට පෝස්ටර් නිර්මාණය කර ප්‍රදර්ශනය කර තිබේ. කෙසේ වෙතත්, චිත්‍රපටයේ අනපේක්ෂිත සාර්ථකත්වය සියලු දෙනාම පිළිගන්නේ නැත. රජයට අයත් ‘බීජිං නිවුස්’ පුවත්පතේ පළ වූ විවරණයකින් සිනමා ශාලා වෙත අනතුරු ඇඟවීමක් කර තිබුණේ, ‘නියු ලායි’ වැනි චිත්‍රපට සඳහා අධික ප්‍රදර්ශන වාර ලබාදීම හේතුවෙන් සිනමා කර්මාන්තය පිළිබඳ ප්‍රේක්ෂකයන්ගේ විශ්වාසය අඩුවිය හැකි බවයි. දුර්වල නිෂ්පාදන ගුණාත්මකභාවය හේතුවෙන් මීට පෙර විවේචනයට ලක් වූ චිත්‍රපට කිහිපයක්ද සඳහන් කරමින් එම විවරණය පෙන්වා දී ඇත්තේ, ‘නියු ලායි’ වැනි නිෂ්පාදන හරහා දුර්වල චිත්‍රපට සම්බන්ධයෙන් ප්‍රේක්ෂකයන්ගේ පිළිගැනීමේ සීමාව තවදුරටත් පහළ යා හැකි බවයි.

 සිනමා ශාලා හිමිකරුවන්ගෙන් ඉල්ලා ඇත්තේ ප්‍රේක්ෂකයන් වෙනුවෙන් “දොරටු පාලකයන්” ලෙස කටයුතු කරමින් පැහැදිලිවම ගුණාත්මක ප්‍රමිතීන් සපුරා නොමැති චිත්‍රපටවලට අධික ප්‍රදර්ශන අවස්ථා ලබාදීමෙන් වළකින ලෙසය. කෙසේ වෙතත්, විවේචන මධ්‍යයේ වුවද ‘නියු ලායි’ මේ වනවිට අන්තර්ජාලයේ වෛරස් ජනප්‍රියත්වය සහ සිනමා ආදායම අතර ඇති සම්බන්ධය පිළිබඳ කතාබහක් ඇති කළ අනපේක්ෂිත සිනමා සංසිද්ධියක් බවට පත්ව තිබේ.