කාන්තාවන් රැකියාවලින් ඉවත් වීමේ ප්‍රධාන රහස 'රැකවරණ බරයි' - කාන්තා හා ළමා කටයුතු නියෝජ්‍ය අමාත්‍යවරියගෙන් විශේෂ හෙළිදරව්වක්

කාන්තාවන් ශ්‍රම බලකායෙන් ඉවත්වීමට බලපාන ප්‍රධාන හේතුවක් ලෙස වැටුප් නොලබන සහ අසමාන ලෙස බෙදී ඇති රැකවරණ වගකීම් හඳුනාගෙන ඇති බව කාන්තා හා ළමා කටයුතු නියෝජ්‍ය අමාත්‍යවරිය පවසයි.

ඇය පෙන්වා දෙන්නේ රැකවරණ කටයුතු කාන්තාවන්ගේ පමණක් වගකීමක් ලෙස නොසලකා, පවුල්, ප්‍රජාව, සේවා යෝජකයන් සහ රජය අතර බෙදාගත් වගකීමක් ලෙස පිළිගැනීම අවශ්‍ය බවයි.

එසේ නොවන්නේ නම් පවුල්වලට මෙන්ම ආර්ථිකයටද කාන්තාවන්ගේ සම්පූර්ණ දායකත්වය ලබාගැනීම අපහසු වන බව ඇය සඳහන් කළාය. දකුණු කොරියාවේ සෝල් නුවර පැවති කාන්තා ආර්ථික සවිබල ගැන්වීම සඳහා රැකවරණ පද්ධති පරිවර්තනය කිරීම පිළිබඳ කලාපීය රැස්වීමක් අමතමින් නියෝජ්‍ය අමාත්‍යවරිය මේ බව ප්‍රකාශ කළාය.

ශ්‍රී ලංකාවේ මෙම ගැටලුව විශේෂයෙන් වැදගත් බව සඳහන් කළ ඇය, කාන්තාවන්ට දරුවන් රැකබලා ගැනීම, වැඩිහිටි පවුලේ සාමාජිකයන්ගේ රැකවරණය, ගෘහ කටයුතු සහ වෙනත් වැටුප් නොලබන රැකවරණ කාර්යයන් සමඟ රැකියාව සමබර කර ගැනීමේදී අභියෝග රැසකට මුහුණදීමට සිදුවන බව පැවසුවාය.

“දිය ඇල්ල ළඟ දරුවෙකු වඩාගෙන සිටියදී දැවැන්ත සර්පයෙක් උරහිසට වැටෙයි'' - අම්බෝලි දිය ඇල්ලේ සංචාරකයාගේ කැමරාවේ සටහන් වූ බියකරු දසුන

“කාන්තාවන් ශ්‍රම බලකායෙන් ඉවත් වන්නේ ඇයි, රැකියාව සහ නිවස අතර සමබරතාව පවත්වා ගැනීමට ඔවුන්ට අපහසු වන්නේ ඇයි, අවස්ථා තවදුරටත් අසමාන වන්නේ ඇයි යන්න විමසූ විට බොහෝවිට ලැබෙන පිළිතුර රැකවරණයයි,” යනුවෙන් ඇය සඳහන් කළාය. පවුල්, සේවා ස්ථාන සහ ආර්ථිකයන් සඳහා රැකවරණ කටයුතු අත්‍යවශ්‍ය වුවද, ඒවා බොහෝවිට නොසලකා හැරීමකට සහ අවතක්සේරුවකට ලක්වන බවද ඇය පෙන්වා දුන්නාය.

ශ්‍රී ලංකාව වඩාත් ඇතුළත් සහ ඵලදායී සමාජ රැකවරණ පද්ධතියක් ගොඩනැගීම සඳහා පියවර ගනිමින් සිටින බව නියෝජ්‍ය අමාත්‍යවරිය පැවසුවාය. ජාතික සමාජ ආරක්ෂණ උපායමාර්ගය තුළ රැකවරණය ප්‍රමුඛතා ක්ෂේත්‍රයක් ලෙස හඳුනාගෙන ඇති අතර, සමාජ රැකවරණය පිළිබඳ ජාතික ක්‍රියාකාරී සැලැස්මක්ද සකස් කර ඇති බව ඇය සඳහන් කළාය.

එම ක්‍රියාකාරී සැලැස්ම මේ වන විට අමාත්‍ය අනුමැතිය සඳහා ඉදිරිපත් කර ඇති බවද ඇය පැවසුවාය. රැකවරණ සේවා සඳහා වැඩි ආයෝජනයක් කිරීම මෙන්ම සමාජ ආකල්පවල වෙනසක්ද අවශ්‍ය බව නියෝජ්‍ය අමාත්‍යවරිය අවධාරණය කළාය.

විශේෂයෙන් ළමා රැකවරණය, වැඩිහිටි රැකවරණය සහ ආබාධ සහිත පුද්ගලයන් සඳහා වන සේවාවන් පුළුල් කිරීමේ අවශ්‍යතාව ඇය පෙන්වා දුන්නාය. මේ අතර, කොරියානු ජනරජයේ සහාය ඇතිව එක්සත් ජාතීන්ගේ කාන්තා සංවිධානය සහ සාර්ක් හවුල්කරුවන් විසින් සංවිධානය කළ දකුණු ආසියානු කලාපීය සංවාදයට ශ්‍රී ලංකාව සහභාගී වී තිබේ.

එම සංවාදය මඟින් රැකවරණ පද්ධති පරිවර්තනය කිරීම සඳහා කලාපීය ක්‍රියාකාරී සැලැස්මක් සකස් කිරීමට දායකත්වය ලබාදී ඇත. ළමා රැකවරණය, වැඩිහිටි රැකවරණය, ආබාධ සහිත පුද්ගලයන් ඇතුළත් කරගැනීම, රාජ්‍ය ආයෝජන, දත්ත පද්ධති සහ සමාජ ආකල්ප ඇතුළු ක්ෂේත්‍ර සම්බන්ධයෙන් කලාපීය රටවලට එකිනෙකාගේ අත්දැකීම්වලින් ඉගෙන ගත හැකි බවද නියෝජ්‍ය අමාත්‍යවරිය සඳහන් කළාය.

“කිසිදු රටකට සියලු පිළිතුරු නොමැති බැවින්, ප්‍රායෝගික විසඳුම් සෙවීමේදී කලාපීය සහයෝගීතාව වැදගත්,” යනුවෙන් ඇය පැවසුවාය. රැකවරණ පද්ධති ශක්තිමත් කිරීම සඳහා කොරියානු ජනරජය, එක්සත් ජාතීන්ගේ කාන්තා සංවිධානය සහ කලාපීය හවුල්කරුවන් සමඟ ඉදිරියටත් කටයුතු කිරීමට ශ්‍රී ලංකාව සූදානම් බවද ඇය අවධාරණය කළාය.

රැකවරණ කටයුතු ආර්ථිකයට සහ පවුල්වල පැවැත්මට මෙන්ම කාන්තා සවිබල ගැන්වීමටද අත්‍යවශ්‍ය බැවින්, ඒ සඳහා ආයෝජනය කිරීම හැකියාව පිළිබඳ ප්‍රශ්නයක් නොව, එය නොකර සිටීමට ඇති හැකියාව පිළිබඳ ප්‍රශ්නයක් බවද නියෝජ්‍ය අමාත්‍යවරිය වැඩිදුරටත් සඳහන් කළාය.

''තවත් සහන කාල දෙන්නේ නැහැ" - අධිවේගී මාර්ගයේ ආසන පටි නොපළඳින රියදුරන්ට සහ මගීන්ට හෙට සිට තදින්ම නීතිය