හරියටම තව දින 100යි..හැමෝම සූදානමින් ඉන්න..
Aruna
ජනාධිපතිවරණය සඳහා අද (07) සිට දින සියයකින් පසුව නාමයෝජනා පත්‍ර කැඳවීමේ බලය මැතිවරණ කොමිසම වෙත හිමිවනවා.
ඒ අනුව, ලබන ජූලි මස 17 වැනිදාට පසුව ඕනෑම මොහොතක ජනාධිපතිවරණයට අදාළ නාමයෝජනා පත්‍ර කැඳවීමට මැතිවරණ කොමිසමට හැකි බවයි පැවසෙන්නේ.
මැතිවරණ කොමිසම මගින් ජනාධිපතිවරණය පැවැත්වීමට අවශ්‍ය කාලවකවානු තීරණය කිරීමෙන් අනතුරුව මැතිවරණ කොමසාරිස් ජනරාල් සමන් රත්නායක මහතා විසින් නාමයෝජනා පත්‍ර කැඳවීමට අදාළ ගැසට් නිවේදනය නිකුත් කරනු ලබයි.
ජනාධිපතිවරණය ලබන ඔක්තෝබර් මස මුල් සතියේදී පැවැත්වීමට නියමිත අතර ප්‍රචාරක කටයුතු සඳහා දින 28ක් හෝ 35ක කාලයක් හිමිවනවා.
ඒ අනුව මැතිවරණ කොමිසමේ ප්‍රකාශකයෙක් පැවැසුවේ, ඡන්ද විමසීමට අදාළ නාමයෝජනා කැඳවීමේ දිනය තීන්දු වන බවයි.
ජනාධිපතිවරණයට අදාළ මූලික කටයුතු මේ වනවිට මැතිවරණ කොමිසම ආරම්භ කර ඇති අතර දිස්ත්‍රික් මැතිවරණ නිලධාරීන්ට අවශ්‍ය කටයුතු සිදු කිරීමට උපදෙස් ලබාදී ඇති බවයි හෙතෙම වැඩිදුරටත් කියා සිටියේ.
