නාවික භටයින් 11 දෙනෙකුගේ පණ බේරෙයි- අඟුලානේදී අනතුරට ලක්වූ නාවික යාත්‍රාව ගොඩගැනීමේ මෙහෙයුම් දිගටම

අගෝස්තු 15 වැනිදා අඟුලාන මුහුදු ප්‍රදේශයේදී ශ්‍රී ලංකා නාවික හමුදාවේ වේග ප්‍රහාරක යාත්‍රාවක් අනතුරට ලක්වීමෙන් පසු සෝදිසි මෙහෙයුම් අඛණ්ඩව ක්‍රියාත්මක වන අතර, ආපදාවට ලක් වූ යාත්‍රාව ගලවා ගැනීමේ මෙහෙයුම් සඳහා ද කටයුතු සිදු කෙරෙමින් පවතී.

සාමාන්‍ය මුර සංචාරයකින් ආපසු පැමිණෙමින් සිටියදී පෙරවරු 11.40ට පමණ මෙම යාත්‍රාව අනතුරට ලක්ව ඇති අතර, එහි සිටි නාවික භටයින් 11 දෙනෙකු බේරාගෙන තිබේ.

ඔවුන් රෝහල්ගත කර ඇති අතර, ඔවුන්ගේ තත්ත්වය ස්ථාවර බව වාර්තා වේ. සිද්ධියෙන් පසු ශ්‍රී ලංකා නාවික හමුදාව, ශ්‍රී ලංකා ගුවන් හමුදාවේ සහාය මෙන්ම ප්‍රදේශයේ ධීවර ප්‍රජාවේ සහයෝගය ද ඇතිව සෝදිසි මෙහෙයුම් තවදුරටත් සිදු කරයි.

අනතුරට පත් නාවික භටයින් බේරා ගැනීමේදී ප්‍රදේශයේ ධීවර ප්‍රජාව ද වැදගත් දායකත්වයක් ලබාදී ඇත. මේ අතර, අනතුරට පත් නාවික යාත්‍රාව ගලවා ගැනීමේ මෙහෙයුමක් අද දිනයේදී ක්‍රියාත්මක කිරීමට නියමිතය.

කෙසේ වෙතත්, මුහුදේ පවතින රළු තත්ත්වය හේතුවෙන් එම මෙහෙයුම අභියෝගාත්මක වනු ඇතැයි අපේක්ෂා කරන අතර, බලධාරීන් තත්ත්වය සමීපව නිරීක්ෂණය කරමින් සිටී.