විනිසුරු මඩුල්ල නිසියාකාරව සම්පූර්ණ වී නොමැති හේතුවෙන් ශිෂ්‍යත්ව විභාගයේ පෙත්සම් විභාගය කල් යයි...
Piyumika
මෑතකදී අවසන් වූ පහ වසර ශිෂ්‍යත්ව විභාගයේ පළමු ප්‍රශ්න පත්‍රයේ ප්‍රශ්න තුනක් කළින් පිටවීම නිසා යළි විභාගය පවත්වන ලෙස නියෝගයක් නිකුත් කරන්නැයි ඉල්ලා ගොනුකර ඇති පෙත්සම් වලට අදාළ විභාගය මේ මස 16 වැනිදා දක්වා කල් තැබීමට ශ්‍රේෂ්ඨාධිකරණය අද (11) නියම කළා.
මෙම පෙත්සම් එස්. තුරෙයි රාජා සහ ශිරාන් ගුණරත්න යන අයගෙන් සමන්විත විනිසුරු මඩුල්ල ඉදිරියේ කැඳවනු ලැබුවා.
එහිදී ත්‍රිපුද්ගල විනිසුරු මඩුල්ල නිසියාකාරව සම්පූර්ණ වී නොමැති හෙයින් පෙත්සම් විභාගය ලබන 16 වැනිදා දක්වා කල් තබන බව විනිසුරු මඩුල්ල නියෝග කළා.
අදාළ විභාගයට ඉදිරිපත් වූ සිසු සිසුවියන් හා ඔවුන්ගේ මව්පියන් පිරිසක් විසින් මෙම පෙත්සම් තුන ඉදිරිපත් කර තිබුණා.
මෙම පෙත්සම ඉකුත්දා කැඳවූ අවස්ථාවේදී නීතිපතිවරයා අධිකරණයට දැනුම් දුන්නේ, කළින් පිටවූ ප්‍රශ්න බව කියන ප්‍රශ්න තුන ඇතුළත් පළමු ප්‍රශ්න පත්‍රය සඳහා යළි විභාගයක් නොපැවැත්වීමට අමාත්‍ය මණ්ඩලය විසින් නිර්දේශ කර තිබෙන බවයි.
ඊට අමතරව කළින් පිටවූ බව කියන ප්‍රශ්න තුන සඳහා එම විභාගයට ඉදිරිපත් වූ සෑම ශිෂ්‍ය ශිෂ්‍යාවකටම නිදහස් ලකුණු ලබාදීමට ද අමාත්‍ය මණ්ඩලය විසින් නිර්දේශ කර තිබෙන බවත්, නීතිපතිවරයා විසින් මීට පෙර අධිකරණයට දැනුම්දී තිබුණා.
You may like this video
