රියාද් ගුවන්තොටුපළට හවුති මිසයිල ප්‍රහාරයක් - සෞදියා ගුවන් නියමුවෙකුට අවාසනාවන්ත ඉරණමක්

සෞදි අරාබියේ ජාතික ගුවන් සේවය වන සෞදියා (Saudia), ඔක්තෝබර් 8 වැනිදා රියාද්හි කිං කාලිඩ් ජාත්‍යන්තර ගුවන්තොටුපළේ සිදුවූ සිදුවීමකින් සිය ගුවන් නියමුවෙකු ජීවිතක්ෂයට පත්වූ බව නිවේදනය කර තිබේ.

ඔක්තෝබර් 9 වැනිදා නිකුත් කළ නිවේදනයකින් ගුවන් සේවය මියගිය නියමුවා කපිතාන් හමූද් අලි අල්කල්තාමි ලෙස හඳුනාගෙන ඇත.

“2026 ඔක්තෝබර් 8 වැනිදා රියාද්හි කිං කාලිඩ් ජාත්‍යන්තර ගුවන්තොටුපළේ සිදුවූ සිදුවීමෙන් ජීවිතක්ෂයට පත් කපිතාන් හමූද් අලි අල්කල්තාමිගේ අභාවය සෞදියා දැඩි ශෝකයෙන් යුතුව දැනුම් දෙයි” යනුවෙන් එම නිවේදනයේ සඳහන් විය.

සෞදියා ගුවන් සේවය වෙනුවෙන් සිය වෘත්තීය ජීවිතය පුරා කපිතාන් අල්කල්තාමි සිදුකළ සේවය සහ ඔහු සිය සහෝදර සේවකයන්ගේ සිත් තුළ තැබූ නොමැකෙන මතකය ද ගුවන් සේවය මෙහිදී සිහිපත් කළේය.

එමෙන්ම, ඔහුගේ පවුලේ සාමාජිකයන්, සමීපතමයන් සහ සගයන් වෙත සිය බලවත් ශෝකය පළ කිරීමට ද සෞදියා කටයුතු කර තිබේ. සෞදි අරාබියේ සිවිල් ගුවන් සේවා පිළිබඳ සාමාන්‍ය අධිකාරිය (GACA) සඳහන් කළේ ඔක්තෝබර් 8 වැනිදා කිං කාලිඩ් ජාත්‍යන්තර ගුවන්තොටුපළ ඉලක්ක කරගනිමින් ප්‍රහාර දෙකක් එල්ල වූ බවයි.

ඉන් එක් ප්‍රහාරයක් ගුවන්තොටුපළේ පහසුකම් ඉලක්ක කරගෙන එල්ල වූ අතර, අනෙක් ප්‍රහාරය සෞදියා ගුවන් යානයක් ඉලක්ක කරගෙන සිදුකර ඇති බව අධිකාරිය පැවසීය. යේමනයේ හවුති කැරලිකරුවන් බැලස්ටික් මිසයිලයක් යොදා ගනිමින් ගුවන්තොටුපළට ප්‍රහාර එල්ල කිරීමේ වගකීම භාරගෙන තිබේ.

මේ අතර, ගුවන්තොටුපළ පර්යන්තයක නවතා තිබූ සෞදියා ගුවන් යානයක් ගින්නකට හසුවීමෙන් දැඩි ලෙස හානි වී ඇති බව රොයිටර් පුවත් සේවය වාර්තා කළේය. සිද්ධිය සිදුවන අවස්ථාවේ එම යානය තුළ මගීන් නොසිටි බවට විශ්වාස කෙරේ.

කෙසේ වෙතත්, කපිතාන් හමූද් අලි අල්කල්තාමිගේ මරණයට හේතු වූ නිශ්චිත තත්ත්වයන් පිළිබඳව මෙතෙක් තොරතුරු අනාවරණය වී නොමැත.

ඉදිරි පැය 36 ගැන කාලගුණෙන් හදිසි අනතුරු ඇඟවීමක්- පළාත් රැසකට ම්.මී. 100 පැන්න තද වැසි

දිස්ත්‍රික්ක පහක ජනතාවට තම ප්‍රදේශයෙන්ම යතුරුපැදි ලියාපදිංචි කිරීමේ පහසුකම