"T20 වගේම ටෙස්ට් තරුත් බැබළවිය යුතුයි"- ටෙස්ට් ක්‍රිකට් බේරාගන්න සංගක්කාරගෙන් ප්‍රබල සැලසුමක්

ශ්‍රී ලංකාව ඇතුළු ටෙස්ට් ක්‍රිකට් ක්‍රීඩා කරන රටවලට වැඩි අවස්ථාවක් හිමිවන පරිදි සාධාරණ ජාත්‍යන්තර ක්‍රිකට් දින දර්ශනයක් සකස් කළ යුතු බව ශ්‍රී ලංකා හිටපු නායක කුමාර් සංගක්කාර පවසයි. කෙසේ වෙතත්, වර්තමාන ක්‍රිකට් පරිසරය තුළ ටෙස්ට් ක්‍රිකට් ක්‍රීඩාවේ මූල්‍යමය යථාර්ථයන් විශාල අභියෝගයක් බවද ඔහු පෙන්වා දී තිබේ.

ටෙස්ට් ක්‍රිකට් ක්‍රීඩාවේ අනාගතය පිළිබඳ පවතින ගැටලු ශ්‍රී ලංකා ක්‍රිකට් ආයතනයට පමණක් සීමා නොවන බවත්, ඒ පිළිබඳව ජාත්‍යන්තර ක්‍රිකට් කවුන්සිලයේ සාකච්ඡා මෙන්ම පුළුල් ගෝලීය ක්‍රිකට් ප්‍රජාව තුළද නිරන්තරයෙන් අවධානය යොමුව ඇති බවත් සංගක්කාර සඳහන් කළේය.

“මෙය ශ්‍රී ලංකා ක්‍රිකට් ආයතනයට පමණක් නොව, සමස්ත ලෝක ක්‍රිකට් ක්‍රීඩාවටම බලපාන ගැටලුවක්,” යනුවෙන් ඔහු පැවසීය. ටෙස්ට් ක්‍රිකට් සඳහා වැඩි වැදගත්කමක් ලබාදීමේ අරමුණින් ලෝක ටෙස්ට් ශූරතාව හඳුන්වා දී තිබුණද, වර්තමාන අනාගත සංචාර වැඩසටහන (FTP) යටතේ සෑම රටක්ම සමාන හෝ අවම වශයෙන් සමාන මට්ටමේ ටෙස්ට් තරග සංඛ්‍යාවක් ක්‍රීඩා කරන බවට සහතිකයක් නොමැති බවද සංගක්කාර පෙන්වා දුන්නේය.

එක් ටෙස්ට් තරගාවලියකට අවම වශයෙන් තරග තුනක් ඇතුළත් කිරීම සම්බන්ධයෙන් මීට පෙර සාකච්ඡා පැවති නමුත්, ඇතැම් රටවල් මේ වනවිට එක් ටෙස්ට් තරගයකින් පමණක් සමන්විත තරගාවලි ක්‍රීඩා කරන තත්ත්වයක් උද්ගතව ඇති බව ඔහු සඳහන් කළේය.

වත්මන් ගෝලීය ක්‍රිකට් පරිසරය තුළ ඉහළම කණ්ඩායම් තුන හෝ හතර හැරුණු විට අනෙකුත් රටවල් සඳහා ටෙස්ට් ක්‍රිකට් මගින් ලැබෙන ආදායම ඉතා සීමිත බවද සංගක්කාර පැවසීය. ඇතැම් ක්‍රිකට් මණ්ඩල සඳහා ටෙස්ට් ක්‍රිකට් ක්‍රීඩා කිරීම මූල්‍යමය වශයෙන් තිරසාර නොවන තත්ත්වයකට පත්ව ඇති බවද ඔහු පෙන්වා දුන්නේය.

ටෙස්ට් තත්ත්වය හිමි ඇෆ්ගනිස්ථානය සහ අයර්ලන්තය වැනි රටවල් සෑම වසරකම සීමිත ටෙස්ට් තරග සංඛ්‍යාවක් පමණක් ක්‍රීඩා කිරීමද එහි ප්‍රතිඵලයක් බව ඔහු සඳහන් කළේය.

විශේෂඥ ටෙස්ට් ක්‍රීඩකයන්ට ජාත්‍යන්තර මට්ටමේ තරග කිරීමට ලැබෙන අවස්ථා සීමිත වීම හේතුවෙන්, වෙනත් ආකෘතිවලටද ක්‍රීඩා නොකරන ක්‍රීඩකයන්ට දිගුකාලීන වෘත්තීය ජීවිතයක් ගොඩනගා ගැනීම අභියෝගයක් වන බව සංගක්කාර අවධාරණය කළේය.

එක්දින සහ විස්සයි20 ක්‍රිකට් හරහා ලැබෙන ආදායමෙන් කොටසක් ටෙස්ට් ක්‍රිකට් සඳහා යොදාගත හැකි ආකාරය මෙන්ම, ටෙස්ට් ආකෘතිය වඩාත් ආකර්ෂණීය ලෙස ප්‍රවර්ධනය කළ හැකි ක්‍රම පිළිබඳව ක්‍රිකට් පරිපාලකයන් අවධානය යොමු කළ යුතු බවද ඔහු පැවසීය.

ටෙස්ට් තරගාවලි කල්තියා ප්‍රචාරණය කිරීම සහ ප්‍රමුඛ පෙළේ ටෙස්ට් ක්‍රීඩකයන්ගේ ජනප්‍රියත්වය වර්ධනය කිරීමද ඉතා වැදගත් බව සංගක්කාර පෙන්වා දුන්නේය.

දක්ෂ ටෙස්ට් ක්‍රීඩකයන් විස්සයි20 සහ එක්දින ක්‍රිකට් තරු මෙන්ම ජනප්‍රිය කරවිය යුතු බවද ඔහු සඳහන් කළේය.

“අපි ඔවුන් වටා කතා ගොඩනගා ගත යුතුයි,” යනුවෙන් පැවසූ සංගක්කාර, අවශ්‍ය අවස්ථාවලදී ටෙස්ට් ක්‍රීඩකයන්ගේ වටිනාකම විස්සයි20 තරු ක්‍රීඩකයන්ට වඩා ඉහළ මට්ටමකට ගෙන ඒමට හැකි විය යුතු බවද කියා සිටියේය. ජාත්‍යන්තර ක්‍රිකට් දින දර්ශනයේ පවතින අසමානතාවද ඔහු මෙහිදී පෙන්වා දුන්නේය.

එංගලන්තය සහ ඕස්ට්‍රේලියාව සිය සාම්ප්‍රදායික ටෙස්ට් සංචාර චක්‍ර පවත්වාගෙන යන අතර, ඉන්දියාවද වෙනත් රටවල සංචාරය කරන්නේ එම තරගාවලි හරහා විශාල වාණිජ වටිනාකමක් ජනනය වන බැවින් බව සංගක්කාර පැවසීය. වාණිජමය වශයෙන් ශක්තිමත් කණ්ඩායම්වල සංචාර, අනෙකුත් ක්‍රිකට් මණ්ඩලවල මූල්‍ය ස්ථාවරත්වය පවත්වා ගැනීමට පවා තීරණාත්මක විය හැකි බව ඔහු පෙන්වා දුන්නේය.

මෙම ගැටලුවට සරල විසඳුමක් නොමැති බව පිළිගත් සංගක්කාර, සියලු රටවලට ප්‍රමාණවත් ටෙස්ට් ක්‍රිකට් අවස්ථා ලබාදීම සඳහා ජාතික, කලාපීය සහ ජාත්‍යන්තර මට්ටමින් ක්‍රියාමාර්ග ගත යුතු බව සඳහන් කළේය. ශ්‍රී ලංකාව ඉදිරි අනාගත සංචාර වැඩසටහන් සකස් කිරීමේදී සිය අවශ්‍යතා වෙනුවෙන් බලපෑම් කළ යුතු අතර, වැඩි ටෙස්ට් තරග සංඛ්‍යාවක් ලබාගැනීම සඳහා අනෙකුත් ක්‍රිකට් මණ්ඩල සමඟ සාකච්ඡා කළ යුතු බවද ඔහු පැවසීය.

රුමේෂ් තරංගට අභියෝග කරන්න සැරසුණු ඉන්දියාවේ නීරජ් චොප්රාට ඩයමන්ඩ් ලීග් අවසන් අදියර අහිමි වෙයි

“FTP වඩාත් සාධාරණ කරගැනීමට අපට බලපෑම් කළ හැකි නම් සහ වැඩි ටෙස්ට් ක්‍රිකට් ක්‍රීඩා කිරීම සඳහා අනෙකුත් රටවල් සමඟ සාකච්ඡා කළ හැකි නම්, ශ්‍රී ලංකා ක්‍රිකට් තවදුරටත් ශක්තිමත් වනු ඇතැයි මම සිතනවා,” යනුවෙන් සංගක්කාර සඳහන් කළේය.

එක්දින සහ විස්සයි20 ආකෘතිවලින් අඛණ්ඩව සාර්ථකත්වයක් අත්කර ගැනීමට නම්, ශ්‍රී ලංකාව ශක්තිමත් ටෙස්ට් කණ්ඩායමක් ලෙසද පවත්වාගෙන යාම අත්‍යවශ්‍ය බව ඔහු වැඩිදුරටත් අවධාරණය කළේය.