"..ලංකාව බේරුනේ කාන්තාවන් 3දෙනෙක් නිසා.." ජනපති හෙළිකරයි
Sewvandhi
අද (08) පෙරවරුවේ පැවති ජාත්‍යන්තර කාන්තා දින ජාතික උත්සවය අමතමින් ජනාධිපතිවරයා සඳහන් කළේ,කඩාවැටුණු ආර්ථිකයෙන් රට ගොඩනැගීම සඳහා ජාත්‍යන්තර සහාය ලබාදීමට මූලික වූයේ කාන්තාවන් තිදෙනෙකු බවයි. අද(8) පෙරවරුවේ බත්තරමුල්ල වෝටර්ස් ඒජ් හෝටලයේදී, 'ඇය දැයේ අභිමානයයි' යන්න තේමා කරගත් ජාත්‍යන්තර කාන්තා දින ජාතික උත්සවය පැවැත්වුණේ ජනාධිපති රනිල් වික්‍රමසිංහ මහතාගේ ප්‍රධානත්වයෙනි.
මෙහිදී ශ්‍රී ලංකාවේ ස්ත්‍රී පුරුෂභාවය, සමාජභාවීය සමානාත්මතාවය තහවුරු කිරීම සඳහාත් ඒ තුළින් කාන්තාවන් සවිබල ගැන්වීම සඳහාත් ප්‍රථම වරට සැකසූ ජාතික කාන්තා ප්‍රඥප්තිය ජනාධිපතිවරයා වෙත පිළිගැන්වීය. ශ්‍රී ලාංකේය අභිමානවත් හා දීප්තිමත් කාන්තාවන් උදෙසා ප්‍රණාම පුදකිරීමත් දිස්ත්‍රික් මට්ටමේ හොඳම ව්‍යවසායිකාවන් 25 දෙනෙකු ඇගයීමත් සිදු කෙරුණි.
මෙහිදී අදහස් දැක්වූ ජනාධිපති රනිල් වික්‍රමසිංහ මහතා,
"2020 - 2022 ජාත්‍යන්තර කාන්තා දිනයත් 2023 ජාත්‍යන්තර කාන්තා දිනයත් අතර මේ රටේ විශාල විපර්යාසයක් සිදුව තිබෙනවා. මූලික හේතුව අපේ ආර්ථිකය කඩාවැටීම. දැන් මේ කාලය තුළදී අපි බලනවා නම්.. අපි වින්ඳ දුක ඒකෙන් අපිව බේරගන්න ක්‍රියාකරපු අයගේ නම් ගත්තොත් කාන්තාවන් තුන්දෙනෙක්ගේ නම්."
"මම හිතුවා.. ඒ අයගේ නම් විශේෂයෙන් ම සඳහන් කරන්න. පළමුවෙන්ම ඉන්නේ නිර්මලා සීතාරාම් තමයි. ඉන්දියාවේ මුදල් අමාත්‍යතුමිය. එතුමිය තමා අගමැතිතුමයි කැබිනට් මණ්ඩලයයි එක්ක කතා කරලා, ලංකාවට ඩොලර් බිලියන 3ක් ණය දෙන්න කියලා තීරණයක් ගත්තේ අප්‍රේල් මාසයේ. අපි ඇත්ත වශයෙන්ම බංකොලොත් වුණා කියලා ප්‍රකාශ කරායින් පස්සේ. මම හිතන්නේ බංකොලොත් වුණ රටකට ණය දෙනවා කියන එක හරි නිර්භීත ක්‍රියාවක්. පළමුවෙන්ම අපි එතුමියට ස්තූති කරන්න ඕනේ පසුගිය මාස තුන හතරේ බිලියන 03 නොතිබුණා නම් රටේ මොකද්ද වෙන්නේ කියලා මම අමුතුවෙන් කියන්න ඕනේ නෑ."
"දෙවනුව අපි ගියා ප්‍රධාන රටවල් එක්ක ආර්ථිකය ගැන කතා කරන්න. එතැනදී ප්‍රධාන රට තමා අමෙරිකාව. එතැනදී නායකත්වය ගත්තේ, ඒ රටේ භාණ්ඩාගාරික ලේකම් ජැනට් යෙලන් මහත්මියටත් මම ස්තූති කරනවා."
"මේ රටවල් එක්ක, පැරිස් සමාජය එක්ක, ලෝක බැංකුව ඔක්කෝම එක්ක සාකච්ඡා කරලා විශේෂයෙන්ම මේකේ නායකත්වය ගත්තේ, ලංකාව වෙනුවෙන් තමන්ගේ පුද්ගලික කැපවීම කළේ, IMF සංවිධානයේ අධ්‍යක්ෂ ජනරාල් ක්‍රිස්ටලීනා ජෝජිවා මහත්මිය කියලා මම කියන්න කැමතියි. මේ කාන්තාවන් තුන්දෙනා හිටියේ නැත්නම් අපි හුඟාක් අමාරු වෙනවා."
සිව්දෙසින් ගලා එන තොරතුරු සැමට කලින්, එසැනින් දැන ගන්න ගගන WhatsApp,වෙත පිවිසෙන්න... |
