විපක්ෂය අධ්‍යාපන ඇමැතිනී හරිනි අමරසූරියට එරෙහි විශ්වාසභංග යෝජනාවට අත්සන් තබයි

අධ්‍යාපන ප්‍රතිසංස්කරණ යටතේ නිකුත් කෙරුණු 6 ශ්‍රේණියේ ඉංග්‍රීසි මොඩියුලයේ අනුචිත අන්තර්ගතයන් සහ ඒ සම්බන්ධ ගැටලු වගකීමෙන් යුතුව විසඳීමට අසමත් වීම ඇතුළු චෝදනා මුල් කරගෙන, අග්‍රාමාත්‍ය සහ අධ්‍යාපන ඇමැති ආචාර්ය හරිනි අමරසූරිය මෙනෙවියට එරෙහි විශ්වාසභංග යෝජනාවට විපක්ෂය අද (07) අත්සන් තැබීම ආරම්භ කර ඇත.

විපක්ෂ නායක සජිත් ප්‍රේමදාස මහතාගේ ප්‍රධානත්වයෙන් පාර්ලිමේන්තුවේ විපක්ෂ නායක කාර්යාලයේදී මෙම අත්සන් තැබීම සිදුවූ අතර, විපක්ෂ නායකතුමා මෙම යෝජනාවට පළමු අත්සන තැබූ බව වාර්තා වේ.

සමගි ජන බලවේගය ඇතුළු විපක්ෂයේ ප්‍රධාන පක්ෂ ඒකමතිකව මෙම තීරණය ගෙන ඇති බවත්, මෙම සතිය තුළ යෝජනාව කථානායකවරයාට භාරදීමට සැලසුම් කර ඇති බවත් දේශපාලන ආරංචි මාර්ග සඳහන් කරයි.

ආන්දෝලනාත්මක 6 ශ්‍රේණිය ඉංග්‍රීසි මොඩියුලයේ මතභේදකාරී පාඩම ඉවත් කිරීමට අනුමැතිය

මෙම යෝජනාවේ ප්‍රධාන හේතුව වන්නේ 6 ශ්‍රේණියේ ඉංග්‍රීසි මොඩියුලයේ ඇතුළත් අනුචිත වෙබ් සබැඳිය සහ අධ්‍යාපන ප්‍රතිසංස්කරණවල දෝෂ සහ නුසුදුසු අන්තර්ගතයන් බව විපක්ෂය පෙන්වා දෙයි. මෙය දරුවන්ගේ අයිතිවාසිකම් කඩකිරීමක් ලෙසද විපක්ෂ නායකතුමා විසින් විවේචනය කර ඇත.

මෙම සිදුවීම පාර්ලිමේන්තුවේ උණුසුම් දේශපාලන තත්ත්වයක් ඇති කර ඇති අතර, රජයේ අධ්‍යාපන ප්‍රතිසංස්කරණවල විශ්වාසනීයත්වයට බලපෑම් එල්ල වී තිබේ. යෝජනාවේ ඉදිරි පියවර සහ පාර්ලිමේන්තු විවාදය අපේක්ෂාවෙන් සිටිමු.